Renungan / Khotbah I Korintus 6:19-20, Pekan Doa Wari IV Tahun 2013

Introitus : 

KesahKu kutamaken ibas pusuhndu, janah tetap Kuperdiateken maka ikutkenndu undang-undangKu janah patuh man perentah si Kubereken man bandu (Esekiel 36:27).

Ogen : Esekiel 11:19-21; Khotbah : I Korinti 6:19-20.

Thema: 

Kesah Sibadia Mulahi ras Mpebadiaken Kulanta

Pokok Pikiren:

1. Gelah Ngawan Perpulungen meteh maka kulanta eme Rumah Pertoton Kesah.
2. Gelah Ngawan Perpulungen Ngasup njagai kebadian kula (makanan, pergaulan, narkoba, judi) janah ula jadi batu antuken.
3. Perpulungen geluh ibas pusuh si mbaru (lanai batu-batun).

Kata Perlebe

Kapatuhen manusia si enggo ndabuh ku bas dosa nandangi undang-undang Tuhan mengalami kegagalen. Reh hebatna usaha manusia reh teridahna kegagalen e (bd. Masm. 14:12 sinikutif Rasul Paulus ibas Rm. 3:10-12 singataken maka: la lit ise pe sibujur i lebe-lebe Dibata. La lit ise pe si pentar, la lit ise pe si ndarami Dibata. Kerina manusia enggo nilah Ibas Dibata nari, kerina ia enggo macik, la lit ise pe erbahan si mehuli sada pe lang. Ertina arah pernyataan Paulus i datas ngataken man mbanta maka arah usahanta sendiri labo kita ngasup ndalanken singena ate Dibata bagepe geluh alu badia.

Nats Pekan Doanta ibas berngi sipeempatkken I Kor. 6:19-20 nehken persinget man kalak si enggo pulah ibas kuasa dosa nari (bd. Ef. 2:8-9, sebab erdandanken lias ate Dibata maka kam enggo terkelin, erkiteken tek man Kristus. Labo bekas perbahanenndu e,tapi pemere Dibata kap e. Labo ulih pendahinndu e, emaka labo lit dalanna ise pe muji bana). Man Kalak si enggo ngaloken keselamaten ibas Tuhan Yesus Kristus nari, ijadikenna kita guna ndahiken dahin-dahin si mehuli, si enggo irencanakenNa, gelah sidahiken e (Ef. 2:10).

Pembahansen Nats I Korinti 6:19-20

Sipemena, man kalak si enggo itebus (Kristen), maka kula eme Rumah Pertoton Kesah entah ingan tading pribadi Kesah Sibadia. (Kesah Si Badia eme pribadi sipeteluken, si la i idah alu mata. Kesah Si Badia tading ibas kula si enggo i tebus ngajari, mereken gegeh, ras mpebadiaken kalak si tek.

Kecibal sesekalak mbue itentuken ise temanna. Adi perampok entah pinangko kecendrungenna temanna eme perampok entah pinangko ka, labo mungkin temanna polisi (cataten: kecuali kerja sama). Kalak si tek itemani Kesah Si Badia, alu bage status kalak si tek (kula) tuhu-tuhu meherga.

Sipeduaken, Adi kula e Rumah Pertoton Kesah Si Badia maka kula (kalak si enggo i tebus ndai ay. 19, kula e labo kam empuna) nggeluh sue ras sura-sura Kesah (Bd. teologi milik: yang memilikilah yang mengatur, alu bage kula si enggo itebus ndai tetap badia). Kebadian kula ertina kula si iserapken guna kemulian Tuhan.

Kebadian kula arah pangan, pergaulan, narkoba, judi eme arah pembabai Kesah Si Badia ngenca. Ibas penampat Kesah Si Badia ngasup engkuasai diri. Engkuasai diri arah pangan eme kengasupen milih pangan si cocok ras kesehaten kula, alu pangan ndukung kesehaten, labo encedai kesehaten. Semboyan empat sehat lima sempurna, ipelimbarui empat sehat lima seimbang. Ngasup engkuasai diri arah pergaulen alu maba pasu-pasu man kalak si deban. Ngasup engkuasai diri arah Narkoba si erusaha dilo kita ibas litna permasalahen. Ngasup engkuasai dir arah permainen-permainen doni (judi) si njajiken keriahen ras keuntungen, padahal e kerina erbahanca kita bene/musil.

Sipeteluken,enggo itukur meherga (ay. 20). Barang si itukur alu meherga biasana inganna pe labo sembarangen. Contoh emas, permata, berlian labo isimpan kalak ibas tong sampah tapi inganna pe cocok ras nilai barangna. Kalak si tek enggo itukur/itebus alu dareh ni Tuhan Yesus (la ternilai ergana, simambur i uruk Golgota) ras genduari Kesah Si Badia ringan ibas pusuh kalak si tek guna geluh pemuliaken Tuhan. Beda kegeluhen sope itukur ras kenca itukur. Sope itukur kegeluhen kalak perdosa ngelawan Tuhan tapi kenca itukur kegeluhen kalak si tek guna pemuliaken Tuhan saja.

Penutup

Sipemena, kalak sitek enggo itebus ibas kuasa dosa nari janah Tuhan Yesus meteh maka kalak sitek baNa labo ngasup menang ngelawan dosa adi la arah penampat Kesah Si Badia. Erdandanken si e Kesah Si Badia si ringan ibas pusuh jemaat Tuhan, mereken kesadaren maka kalak sitek e sikerajangen Dibata, si enggo itukur alu meherga, geluh guna kemulian Dibata.

Sipeduaken, la lit nari alasen ngawan perpulungen guna mbela kelemahenna, alu ngataken kita enda kalak perdosa kap, sementara la mbuka pusuh peratenna gelah Kesah Si Badia ringan ije. Tapi nintalah ersaksi maka ibas penampat Kesah Si Badia, aku kalak sitek ngasup pebadiaken kulaku guna kemulian Tuhan saja. Singena ate Tuhan kulakoken, si la ngena ateNa kusilahken janah malem ateta… Amin.

Cilleungsi, 30 Agustus 2013

Pdt. Rasmidi Sembiring M.Th.

Artikel lain yang terkait: