Renungan / Khotbah Yoel 2:28-32, Pekan Doa Wari V Tahun 2013

Introitus : 

Nina Jusup njabapsa, "Labo terantusi aku, o Raja, tapi Dibata banci mereken antusen si mehuli." (Kejadin 41:16)

Ogen : Perbahanen Rasul 11:23-30; Khotbah : Joel 2:28-32

Tema : 

Kesah Sibadia Mpengasup Kita Ngidah Sura-Sura Dibata

Bena Kata

Erbage situasi jadi ibas kegeluhenta. Lit bagi ukur lit ka la bagi ukur. Ibas erina situasi enda situhuna kita iajari guna tetap erkiniteken rikut ras erpengarapen man Tuhan Dibata. Ibas situasi sibagenda padan Dibata arus tetap sicikep eme ibas Ia tetap nehken kekelengen nandangi anak-anakNa.

Itengah situasi jamanta genduari, erbage persoalen turah sierbahanca maun kita “pesimis” jadi sada situasi si dem kemalemen ate ras pe kedamen. Sienda tentu lit alasenna eme ngidah keberadaan manusia si megati lanai bagi siniarapken Dibata. Manusia cenderungnggeluh erbana-bana, rate-ate seh pe berusaha ndarami kesenangenna saja alu lanai ngukurken kalak sideban. Karakter nggeluh individualisme, ndarami keuntungen pribadi jadi hal biasa itengah perkembangen jaman. Bencana si terjadi nuduhken pe alam ingan manusia enda nggeluh pe lanai bersahabat erkiteken ulah manusia kange sierbahanca. Ibas situasi enda payo nge banci jadi “nderkuh” kita ngalaken situasi enda. Gia bage iarapken labo kita putus asa, tapi tetap dem erpengarapen man Tuhan Dibata.

Ibas Pekan Doa wari V enda erlajar kita kerna padan Dibata guna mpekena-kena kita si banci jadi enggo melala cedana. Padan enda guna banci mpelimbarui pusuh perukurenta guna tetap ndalanken sura-sura Dibata ibas kegeluhen enda kutera kai pe sinialaken kita ibas kegeluhen enda. Iarapken kita tetap ngasup erpengendes man baNa, jenari alu mbages banci sirenungken uga keleng ateNa nandangi kita anak-anakNa.

Joel 2:28-32

Ibas kitab enda ituriken kerna sada situasi si terjadi nandangi kegeluhen bangsa Dibata ija i daerah Palestina lit “serangen” labang si ncedai negeri e. Sienda erbahanca turah kepiceten si mesangat seh maka tempa enggo bene pengarapen kerna kegeluhen (masa depan). Kepiceten si mesangat enda icidahken alu nuriken kerina sinuan-sinuan keri ipangani labang seh maka terbegi sora tangis si mesangat. Tole ipeseh ibas kitab enda eme arus lit perubahen sikap man kalak Yuda eme erkadiola dingen jera. Joel nuduhken kerna wari Tuhan enggo ndeher, emaka arus jera alu nuduhken pusuh si getem nuduhken ate ceda (ay. 13), sebab la bias ate ceda e icidahken terjeng ncaingken uis si lit. Kerina kalak arus ertoto, erpuasa janah mindo penampat man Tuhan Dibata (ay.17).

Ibas situasi enda teridah maka lit gia pernembeh ate Dibata nandangi bangsaNa, tapi lebihen lalap keleng ateNa. Padan Dibata icidahken alu mereken gandum, anggur ras minak zaitun seh besur, janah bangsa sideban lanai megombang (ay. 19), jenari kai sierbahanca lit jadi kepiceten e ipelawes Dibata janah Ia ngulihken kai sienggo bene (ay. 20, 25) seh maka enggo melala pangan isikapken (ay. 26)

Padan Dibata teridah pe alu Ia mereken kuasa man bangsaNa eme KesahNa si nampati bangsa e ernubuat, ernipi bagepe er pengenehenen. Sie nuduhken maka nandangi anak-anakNa ate Dibata teridah kuasaNa. Man kalak si mindo penampat man Dibata icidahken Dibata kuasa keleng ateNa.

Arah bahan enda jelas siertiken maka :

1. Dibata tetap nge erkeleng ate man banta anak-anakta, jadi perlu sikap/pengakunta kerna kesetiaan man baNa kutera kai pe sinihadapi kita ibas kegeluhen enda.
2. Labo lit beluh ras gegehta ndalani kai siisuraken Dibata, tapi erkiteken keleng ateNa nge maka banci sidalani kerina e.
3. La lit dalanna kita ermegah kerna kegeluhenta enda sebab kerina e erkiteken kuasa Dibata siipetangkasNa man banta
4. Kerina situasi si jadi man banta tetap iidah Dibata. Jadi perlu sikap erpengendes secara total ku Ia ibas kegeluhen enda.
5. Ibas kerina situasi si jadi ibas kegeluhenta enda perlu lalap kita mindo penampat man baNa sebab tek kita ibas kita erpengendes, mindo ku Ia maka ialonina kerina si iendesken kita.
6. Arus lit lalap turah perubahen simehuli ibas kegeluhenta enda sebab labo ngena ate Dibata kegeluhen si melket.
7. Pindo lalap gegeh man baNa, ula erleja-leja.... maka Ia lalap nuduhken dalan si man dalanenkenta, sebab lebihen lalap keleng ateNa asangken kai pe si lit ibas kegeluhen enda.

Pdt.Alexander Simanungkalit

Artikel lain yang terkait: