Bahan : 1 Tesalonika 2:9-12
Thema : “Nggeluh Guna Kemuliaan Dibata”
Tujun :
- Gelah ngawan perpulungen meteh maka keleng ate Dibata bali bagi keleng ate bapa man anak-anakna
- Gelah ngawan perpulungen n cidahken ras ndalanken kemuliaan Dibata
Dibata njadiken manusia tentu lit tujunna. Selaku tinepaNa sisempurna, manusia iarapken ngasup ncidahken kemuliaan Dibata ibas kegeluhenna. Erbage-bage pemere Dibata ipeseh man manusia guna kiniulin manusia seh maka malem atena jenari igejapna rusur keleng ate Dibata ibas geluhna. Alu kata sideban, manusia ijadiken segelah banci kita erguna ibas kegeluhen enda. Erguna man banta rikut ras temanta manusia bagepe erguna kita ibas kemuliaan Dibata (njadiken Dibata ermulia).
Ibas kinatana, melala kel manusia lanai igejapkenna keberadanna selaku mahluk sierguna, entahpe ibas sie ia terjeng erguna man dirina saja, tambah sie ngerana kerna mpermuliaken Dibata megati lanai siakap baginta, sebab ninta Dibata e enggo mulia jadi lanai perlu ipermuliaken (alasen ibas pembenaren diri).
Arah bahan PJJ sekalenda iajuk kita ngidah uga keleng ate Dibata jenari mabai kita ka pe rukur guna nehken “respon” man baNa eme alu kita banci mpermuliaken Ia.
1 Tesalonika 2:9-12
Surat enda eme bagin ibas surat “penggembalaan” siipeseh Paulus guna mpetetap ukur perpulungen Tesalonika. Sie ipesehna erkiteken erbage tantangen sinihadapi Paulus bagepe perpulungen Tesalonika ibas kalak Jahudi erkiteken la senang ia kerna pengajaren Paulus. Janah ibas paksa sie ka pe erbage pengajaren si la payo jadi ibas perpulungen e kerna kegeluhen sirasa lalap bagepe kerna kerehen Yesus peduakaliken.
Ibas Pasal 2 enda ituriken kerna dahin Paulus i Tesalonika guna mpebarken berita simeriah gia erbage tantangen, kiniseran sinihadapina (ay. 2). Arah suratna enda Paulus nuduhken maka pendahinna eme guna kemuliaan Dibata, sebab siibahan Paulus labo guna ngena ate manusia tapi guna ngena ate Dibata (ay.4).
Arah surat enda pe ipeseh Paulus kerna dirina silabo nggit mberatken kalak sideban ibas dahinna meritaken berita simeriah sebab ia pe terus erdahin la erngadi-ngadi. Kai simehuli enda nge ilakoken Paulus nandangi perpulungen seh maka enda jadi kesaksin man perpulungen. Paulus nuduhken keleng atena man perpulungen bagi keleng ate bapa nandangi anak-anakna. Ibas sie icidahken kerna perjuangen Paulus guna perpulungen seh lanai erngadi-ngadi guna kiniulin perpulungen e. Sienda kerina ilakoken Paulus guna kemulian Dibata sebab bagem dahin sienggo iampeken man bana. Sada tujun siniarapkenna eme labo kemegahen Paulus, entahpe materi, tapi kemenangen perpulungen ibas kegeluhen seh idatna kegeluhen ibas kinirajan Dibata.
Sienda nuduhken uga perbahanen Paulus man perpulungen Tesalonika erkiteken keleng ate sienggo ialokenna ibas Dibata nari.
Arah bahan enda ibabai kita ngidah cara nggeluh Paulus ibas ndahiken dahin Dibata : labo kemegahen/kemulianna selaku sindahiken dahin e (gia banci lit hakna ndatkensa), tapi siniarapkenna eme kemulian Dibata. Sienda mabai kita ngerenungken kegeluhenta enda selaku anak Dibata, seh ija perjuangen geluhta enggo teridah kemulian Dibata ? Ibas kita ndalani kegeluhen enda kai nge ndia perayakenta : erta..., tahta.... wanita.... rsd ???
Adi terjeng sie jadi perayakenta tentu enda terjeng kemegahenta saja ngenca siukuri. Siperlu eme uga kita jadi erguna, ernanam ibas kegeluhen enda selaku anak Dibata nandangi kalak sideban seh maka enda pe nuduhken kemulian man Dibata. Siinget maka “kai siibahan kita man simusilna eme perbahanenta man Dibata.” ???
Ibas HUT Moria 55 tahun enda jadi penungkunen sekaligus perenungen ka man banta ? seh ija kita enggo teridah mpermuliaken Dibata, seh ija kita enggo jadi kalak sierguna ?
Sada hal arus siinget, kegeluhenta, jabunta, termasuk Morianta enggo 55 tahun seh genduari, gia erbage-kekurangen silit kekurangen, sipasti maka bagenda gia jadi e kerina erkiteken perkuah ate Dibata. Jadi arus lalap siimani maka Dibata tetap atena keleng nandangi kita anak-anakna seh maka lalap nge situhuna kita ipekena-kenana.
Bagepe Moria ibas persadanna, lalap nge situhuna reh ulina, melala perubahen-perubahen simehuli enggo jadi, sie kerina jadi labo erkiteken beluh, gegeh ras pentar Moria e saja. Payo lit nge e dalanna, sipasti kerina e erkiteken keleng ate Dibata man Moria GBKP. Perlu rusur siinget, kerna keleng ate Dibata, adi anakNa sitonggal pe iberekenNa man banta guna nebusi kita, me arus nge siakuken labo pernah iuraki entahpe bene keleng ate Dibata man banta.
Ibas kita nggejapken keleng ateNa e tentu sirespon ka ibas kegeluhenta segelah erjuang kita bagi Paulus guna tetap mpermuliaken Dibata alu ncidahken kekelengen man perpulungen gia tantangen ras kiniseran nderpa ia. Kita pe ibas kegeluhen enda khususna Moria GBKP, terus ndalanken peran tanggung jawab seh maka ernanam kehadirenta (dirinta, jabu, lingkungan, gereja terlebih man Tuhan Dibata).
Selamat HUT Moria.... Maju terus ibas Tuhan... Amin
Pdt.Alexander Simanungkalit
GBKP Bekasi
GBKP Bekasi
0 komentar:
Post a Comment