Invocatio :
“Perukurenndu bali min ras perukuren Kristus Jesus” (Pilipi 2:5).
Ogen : Epesus 4 : 17 – 24; Khotbah : Kejadin 1 : 26 – 28
Tema : “Nggeluh ibas tempas Dibata” (“Berbudaya”)
Ope terdauhen kita niksiki themata berngi enda, perlu kuakap lebe sipebagesi pengangkanta kerna nasta Kejadin 1:26-28.
Ayat 26 “Nina Dibata, "Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik”.
Arah ayat enda ngataken maka Dibata ndungi pendahinna alu njadiken manusia arah abu taneh ras mereken kegeluhen alu ngembusken kesahNa sendiri (Kej. 2:7). Alu bage manusia memiliki keuniken ibandingken ciptan sideban, eme ibas manusia lit bagin materi (tubuh) ras non materi (jiwa/roh).
Jenari perlu pe siteh kai tafsiren kata “kita” ijenda. Lit 3 (telu) pendapat kerna tafsiren kata enda; (1) Dibata ngerana man malaikat-malaikat si ngelai Ia I surga (Yahudi rabbinik, Kristen non Trinitarian bagepe ibas tafsiren Alkitab Masakini); (2) Dibata ngerana man pribadiNa sendiri, erkiteken pribadi Dibata e sendiri kompleks. Ibassa lit Firmanna, RohNa, kehendaNa, rsd (Yahudi Messianik), (3) Dibata sangana ngerana man Anak, ras man Kesah Sibadia (Kristen Trinitarian).
Seterusna pengertin kata “si sentudu ras tempasTa, simenam seri ras Kita” (“Gambar dan Rupa”). Pengertin sederhana eme berarti manusia ijadiken “menyerupai” (sentudu) ras Dibata. Kata enda labo berarti Dibata bagi manusia lit dareh ras daging, sabab ibas Yohanes 4:24 ikataken maka Dibata e eme Kesah (Roh) erkiteken si e Dibata memiliki keberadan tanpa kula/tubuh. Tapi kula Adam mencerminken geluh Tuhan erkiteken ijadiken alu kesehatan si sempurna ras la tunduk kubas kuasa kematen.
Sinimaksud tempas Dibata/Gambar Dibata ijenda nuduhken bagin non material manusia, si membedaken ia ras rubia-rubia ras si pengasup manusi ndalanken “kekuasan” bagi si enggo irencanaken Dibata ibas ayat 28, bagepe pengasup manusia erkomunikasi ras Dibata sinjadiken ia. Kesentudun/keserupaan ijenda eme kubas hal material, moral ras sosial.
Secara mental, manusia ijadiken selaku mahluk rasional ras “berkehendak”, alu kata sideban manusia banci nggunaken pikirenna ras banci memilih. Enda me refleksi akal budi ras kebebasen Tuhan. Setiap kali kalak njadiken ntah menciptaken mesin, nulis buku, ngelukis pemandangen, mereken gelar rubia-rubia, sutuhuna manusia e memproklamasiken fakta maka ia ijadiken sentudu ras gambar Dibata.
Secara moral, manusia ijadiken ibas keberadan ras kepolosen si sempurna, enda sada refleksi ibas kebadian/kesucian Tuhan. Dibata ngidah kai si ijadikenNa e “sungguh amat baik” (tuhu-tuhu mehuli). Em sababna she genduari lit hati nurani ntah pe “kompas moral” ibas manusia. Contohna, waktu sekalak jelma nulis Hukum, bertobat, mejiken perbahanen mehuli, ntah merasa bersalah eme faktana maka manusia ijadiken senturu ras tempas Dibata.
Secara sosial, manusia diciptakan untuk bersekutu. Hal enda mencerminkan ketritunggalan Dibata ras keleng ateNa. I taman Eden relasi manusia terutama eme ras Dibata (Kej 3:8). Erkiteken Dibata ngidah la mehuli manusia sisada-sisada emaka Ijadiken Dibata diberu (Kej 2:18). Emaka adi lit kalak erjabu, erteman, mengikuti kebaktin, rsd, e nuduhken maka kita ijadiken Dibata sue ras tempasNa.
Engkai maka Adam ras Hawa ndabuh ku bas dosa? Erkiteken man Adam ras Hawa selaku tinepa “segambar ras Dibata” ibereken kebebasen memilih. Manausia labo robot. Amin gia man bana ibereken ka nge pribadi badia/suci, tapi Adam milih si jahat ras mberotak ngelawan sinjadiken Ia. Perbahanen e ncedaken gambar Dibata si lit ibas dirina, ras mewarisken kesentudunna si ceda e pe man keturunenna, termasuk kita (Roma 5:12). Payo ibas kita lit denga tempas Dibata e (Yakobus 3:9), tapi kita pe nanggung bekas-bekas dosa. Secara mental, moral, sosial ras fisikta ncidahken efek-efek dosa e.
Berita simeriah man manusia eme paksa Tuhan reh ku doni enda arah Yesus Kristus. Ibas Yesus Kristus Dibata mpelimbarui manusia jadi manusia si mbaru (Efesus 4:24, Kolose 3:10), bagi tempas Dibata ndube si lit ibas Adam.
Seterusna ibas ayat e pe lit kata “gelah I kuasaina kerina nurung, perik ….rst. Ayat enda sehubungen pe ras ayat 28. Kata “ipasu-pasu Dibata manusia enda” eme legitimasi segelah ngasup ia ndahiken tugas si ibereken eme “ertuah jadi nterem ras ngkuasi tinepa sidebanna, termasuk naluken doni enda. Kata enda eksplisit nuduhken tugas si ibereken Dibata man manusia. Guna si e me maka bagi enggo ijelasken ndai manusia ijadiken sentudu ras tempas Dibata. Enggo ibereken modal ibas manusia jadi si erkuasa selaku tinepa si ijadiken berbeda ras tinepa sidebanna. Eme sababna peradapen manusia terus berkembang maju. Ibas jamanta genduari misalna kemajun tekhnologi enggo luar biasa majuna. Kemajun enda maba dampak nandangi kegeluhen manusia e sendiri, baik dampak positif bagepe negatif, tergantung uga manusia mensikapisa.
Erpalasken penjelasen nas enda, arah themata berngi enda “Nggeluh ibas Tempas Dibata” (Berbudaya), kita iajuk, sipemena, gelah sisadari maka kita tinepa Dibata sisentudu ras tempasNa. Kesadaren enda penting sabab amin gia kita enggo ngaloken kegeluhen si mbaru ibas Yesus Kristus tapi kinata kegeluhen sidekah lalap denga ngerimrim jadi perbeben ibas usaha nggeluh sentudu ras peraten Dibata. Tek kita arah kesedaren e, ngasup kita nggeluh erpalasken budaya singena ate Dibata. Budaya ertina “Suatu cara hidup yang berkembang dan dimiliki bersamqa oleh suatu kelompok orang dan diwariskan dari generasi ke generasi”. Arah arti budaya enda, tentuna si nimaksud budaya kristen eme ngkelengi Dibata ras manusia. Enda banci ijabarken luas.
Tahun enda kita ibabai kubas proritas program GBKP eme peningkaten sosial ekonomi dan budaya jemaat. Sehubungen ras budaya jemaat, akap kami eme uga sikembangken kebiasan simehuli erpalasken nilai budayata kalak karo si la bertentangen ras kinitekenta, bagepe budaya krenten e sendiri. Peningkaten enda penting, sebab arah kegeluhen berbudaya sibage ngasup kita mempilter dampak negatif kemajun jaman si luar biasa enda, terlebih ibas jaman pasar bebas Asian (AFTA), arah budaya e banci pe kita tetap eksis erkiteken salah sada budaya kalak kristen eme kerja keras, erdahin guna mpermuliaken Dibata berarti lit ije kebujuren ntah pe terteki. Amin.
Pdt. S. Brahmana
0 komentar:
Post a Comment