Invocatio :
Terpaksa igegehindu erdahin alu cur-cur panasndu, gelah taneh enda banci mereken ulihna man bandu, seh mulih ka kam kutaneh, sebab ije nari kam ijadiken. Ibas taneh nari kam ijadiken, janah jadi taneh ka kam mulihken” (Kej 3:9).
Ogen : Lukas 14:28-32;; Khotbah : Kuan-kuanen 23:17-23
Tema : Megermetlah Ngaturken perdalanen nggeluh
Kitab Kuan-kuan igelari pe “Amsal Orang Bijak” sabab isina nuriken pedah-pedah gelah kita bijak/pentar ibas ndalani kegeluhen enda. Ibas nas renungen Pekan Penatalayanen wari sip e empatken enda isehken pedah man banta:
1. Gelah ula morahi kalak perdosa. Kerna si enda, ibas kitab Mazmur pe ningetkenca alu lebih gedang, eme ibas Mazmur 37:1 “Ola atendu nembeh kempak kalak jahat, ola mecimberu ngenehen kalak si erbahan jahat. Bagepe ibs Mazmur 37:7 “Timailah TUHAN alu teneng, sabarlah nimai perbahanenNa. Ola morahi kalak si rulih ngelakoken pertakin si jahat. Engkai maka ula morahi? Sabab Kesangapen kalak jahat labo kekal, masap me ia, bagi sinuan-sinuan mate me ia (Mazmur 37:2), bagepe adi si oge Mazmur 1:4-5 ije ikataken maka kalak jahat e desken segal iembus angin, la banci lang iukum Dibata, sabab kalak jahat lit kap ibas dalan ku kebenen.
Payo selaku manusia hal enda labo nukah. Bagi enggo isingetken ibas Pekan Penatalayanen wari si pe duaken, megati kurang kita tekna nandangi padan Dibata e erkiteken: (1) iakapna la nai mungkin secara logika. Bagi Sara ndahara Abraham, erkiteken Abraham ras ia enggo metua lalap denga la lit pupusna emaka isuruhna Abraham muat Hagar budakna segelah arah e datsa keturunen. (2) nimai padan Dibata e bagi ukurna min atena. Adi enggo ertoto ras ku ku gereja alu tutus, jenari erdahin pe rajin maka secara logikana arusna ipasu-pasu Dibata ia alu simpar, lebih asa kalak si la tutus. Tapi kinatana mekatep ka la bage, si la tutus e lebih sukses asangken situtus e. Ntah pe alu kata sideban “sangapen” ka kalak si jahat e asangken kalak benar. Ngingit-nginget si enda, banci ka turah morah ate.
Emaka pedah si isingetken Kuan-kuan gelah ulanai ermorah ate nandangi kalak perdosa eme alu “Erkemalangenlah man Tuhan”. Kai maksudna pedah enda? Sipemena, segelah ula monce-once kinitekenta nandangi Ia, maka Ia me Dibata si mada kuasa I surga rs I doni. Ertina, labo Dibata la ngasup erbahansa suksesen kita asangken kalak perdosa. Ngasup kal ia. Man Dibata perkara kitik kap e. Saja ngenca, engkai maka lit si la bage? Adi pemahamenku, tandai Dibata kap kita secara jelas, tehna kai simehulina man banta. Emaka penungkunen selanjutna? Nggit nge kita bagi kalak perdosa, rulih ia, suskses tempa secara doni tapi bagi ikataken ibas Mazmur 1:4-6 ndai iukum Dibata, ia lit ibas dalin ku kebenen. Nggit kita? Sipeduaken, pedah gelah kita tetap erkemalangen man Diba eme segelah bagi isingetken ibas ayat 18 “gelah terang wari-warindu si pepagi, janah pengharapenndu la bene”. Ibas bahasa Indonesia terjemahen bahasa sehari-hari isuratken bagenda ”supaya masa depanmu terjamin, dan harapanmu tidak hilang”. Ertina eme adi kita tetap konsiten erkemalangen man Dibata (Taat selalu kepada Allah) labo kita kemalun, terjamin nge masa depanta, bahken she ku kempu-kemputa bagi isingetken ibas Mazmur 37:25 “Mulai kin kitik-kitikku nari seh bagenda enggo metua, la enggo kuidah kalak bujur itadingken TUHAN, tah kempuna jadi pemindo-mindo”. Terjamin berarti tercukupi, cukup.
2. Tole pedah ibas nas renungenta enda eme “Jadilah Pentar” (Bijaksana). Salomo igelari raja si bijaksana ertina lit kengasupen ibereken Dibata mutusken perkara alu payo amin gia e perkara si sulit. Pintar ntah e bijaksana ijenda berarti pe meteh/ngangkai apai si mehuli ras ndalankenca bagepe apai si la mehuli, ntah pe la erguna ras ngasup nilahisa. Emaka adi si perdiateken ayat 19-21 maka pedah segelah jadi kalak pentar eme sehubungen ras uga cara geluhta (perdalinen nggeluhta) sedekah enda enggo me payo ntah lang. Ibas terjemahen Indonesia sehari hari iterjemahken “Perhatikanlah sungguh-sungguh cara hidupmu”. Lit kata “megermetlah” ertina ula gelah enggo tapi mperdiatekenca alu serius, alu cermat enggo me payo caranta nggeluh ntah lenga. Cara nggeluh si perlu I silahken bagi iingetken ibas ayat 20 eme pemabuk ras merangap. Cara nggeluh sibagenda labo erbahansa kalak reh majuna, bahken sebalikna bagi si isingetken ibas ayat 21 eme jadi kalak musil sabab biasana adi kalak pemabuk dahinna eme merampus jenari medem, bagepe kalak merangap/rakus bisana beltekna ngenca ukurina jenari tunduh. Cara nggeluh bagenda labo erpikiren maju, tapi ikategoriken pemalas, adi medem ngenca pendahindu nina pengamsal labo kam ergonje. Lebih tegas nina rasul Paulus kalak si la erdahin/malas ula padah bere man (2 Tes 3:10b).
3. Ayat 22-23 ije isehken pedah segelah mehamat man orang tua. Isamping e perintah Dibata gelah ilakoken, tapi pe pengamsal mpersingeti uga peran orang tua ibas kegeluhen sekalak anak. Ibas kegeluhen kalak Israel salah sada tugas orang tua eme nehken didiken, hikmat ras pe pengertin uga kin arusna nggeluh erkemalengen man Dibata. Emaka didiken e meherga kal. Nina kuan-kuan enda ula dayaken, ula persilahang.
Thema pekan berngi enda eme “Megermet Ngaturken Perdalinen Nggeluh”. Thema enda mpersingeti kita “kuja nge ateta si arahken perdalinen geluhta”. Alu kata sideban kai nge visi ras misinta ibas merespons kegeluhen si ibereken Dibata denga man banta. Adi enggo lit, kai strategita gelah she bagi siniarapken kita sue ras visi misi e. Ibas pengogen Lukas 14:28-32 isingetken pentingna perencanan ibas ngelakoken kai pe. Ije icontohken bagi kalak membangun menara, tentuna ope ibenaken enggo lit perencanan si matang, uga galang gedangna, uga anggarenna, rsd. Bage me pe arusna ibas ndalani kegeluhenta sekalak-sekalak. Uga nge ateta sibahan kegeluhen enda, sehat nge ateta ntah lang. Adi sehat si atur perpanta, pertunduhta, rsd. sehubungen ras upaya erbahansa tetap sehat. Sehubungen ras kinitekenta, masuk surga nge ateta ntah lang. Adi masuk surga ateta kai nge perlu sipersiapken ras silakoken. Bagepe ibas pendahinta, usahanta, berhasil nge ate ta ntah lang. Adi berhasil ateta kai nge perlu si persikapken. Terlebih ibas tahun 2015 enda enggo imulai Pasar bebas Asean (AFTA). Tentu ibas era enda persaingen reh belinna sehubungen ras kualitas produksi, kinerja, terteki, ras sidebanna. Adi bage kai nge arusna si lakoken? La lit dalin mundur emaka sitingkatken pemetehta, semangat ras kualitas kerja, bujur terteki ras tentuna pe inovatif. Ibabo si e kerina “erkemalangenlah man Dibata”.
Bagem kata “megermet” ntah pe cermat eme segelah ula kita salah prioritas, salah dalan, salah perencanan. Amin.
Pdt. S. Brahmana
0 komentar:
Post a Comment