Invocatio :
“Sipeduaken bali ras si ndai e me, Kelengilah temanndu manusia bagi kam ngkelengi dirindu”. Matius 22:39.
Ogen : Keluaren 23:1-9;; Khotbah : Mazmur 112:1-9
Tema : Malem Me Ate Kalak Si ndalanken Kekelengen
Renungen
Pujilah Tuhan. Kata enda Pengajuk ras sekaligus perintah man bangsa Tuhan segelah sipuji Tuhan. Engkai? Sabab menurut pemasmur, Tuhan eme sinjadiken sinasa lit, Ia me sierkuasa mereken kemalemen ate, wibawa/keduduken ibas masyarakat, kesusuren si membanggaken (si luarbiasa), kebayaken, mereken pasu-pasu si iperluken, rsd. Enda me isehken pemasmur menaken pasal 112 si jadi nas renungenta.
Uga maka padan Dibata enda jadi sekerajangenta? Ibas ayat ayat 1b ikataken “Malem ate kalak si erkemalangen man TUHAN , si ermeriah ukur ngikutken perentah-perentahNa”. Arah ayat enda ijelasken guna ndatkenca eme “erkemalangen man Tuhan ras ermeriah ukur ngikutken perentah-perentahNa”. Kerna sienda banci pe sibandingken Mazmur 128:1-6. Secara terperinci isingetken pemasmur dampak adi erkemalengen man Tuhan ras ermeriah ukur ngikuitken perentah-perentahNa eme:
1. Anak-anakna kalak si erkuasa i negeri,
2. kesusurenna ipasu-pasu me pagi
3. Isi jabuna jadi kalak bayak namura,
4. kebujurenna lit rasa lalap
Tole ibas ayat 5 “Malem kal ate kalak si melumbar pepinjamken, dingen bujur i bas kerina urusen”. Arah ayat enda secara khusus isingetken ulih melumbar pepinjamken, dingen bujur i bas kerina urusen si nilakonen anak-anak Tuhan. Mbue perintah-perintah Tuhan, tapi khusus melumbar pepinjamken ras bujur ibas kerina urusen isingetken pemasmur maka ulihna jadi kemalemen ate eme:
1. Asa digan pe la guling
2. Tetap iinget kalak ia
3. La ia mbiar ngaloken berita si la mehuli
4. Kinitekenna paguh, la mbiar ras aru ate.
5. Lit kiniteken maka kerina imbang-imbangna talu ngeErmulia dingen ihamati kalak
Khusus ayat 10 isingetken pemasmur pe maka, erkemalangen pe kita man Dibata, mehuli pe perbahanenta, sisampaiti pe kalak labo kerina erngena ate man banta eme menurut pemasmur si tergolong kalak jahat. Enda me tanatangen nai nari she genduari, engkai? Sabab kalak jahat ngidah cara nggeluh anak-anak Tuhan gara kin atena, tole nina pemasmur “erderik pe ipenna, nembeh atena”. Tapi man anak-anak Tuhan si tetap konsisten nggeluh erkemalangen man Dibata labo perlu mbiar sebab, sipemana Dibata ibas Yesus Kristus erkuasa kap nandangi kerina sinasa lit baik I doni bagepe isurga, alu bage ngasup kap Ia mulahi kita, sipeduaken, kalak jahat e masap me. Menurut Mazmur 1:4-6 .. kalak jahat bali ras segal I embus angin, … kalak jahat iukum Dibata sabab ia lit ibas dalan ku kebenen”.
Thema Pekan Penatalayanen berngi si pe III ken enda: “Malem me ate kalak sindalanken kekelengen”. Arah thema enda itekanken si “ndalanken Kekelengen”. Erpalasken Matius 22:37-39 eme rangkumen Undang-Undang Tuhan (Hukum Taurat) kekelengen e iarahken ku dua sisi eme “Ngkelengi Dibata ras ngkelengi manusia”. Ngkelengi Dibata eme arah:
1. Dibata ngenca si sembah
2. La nembah gana-gana
3. Mehamat man Tuhan alu la melasken gelarna ibas sia-sia
4. Ersembah man Dibata ibas wari sabab/Minggu.
Ngkelengi manusia eme arah:
1. Mehamat man orang tua
2. La munuh
3. La erlua-lua
4. La nangko
5. La melasken kata si la tuhu (la erbual)
6. La mengga ate nandangi kai pe si lit ibas kalak
Arah dampar enda banci ijabarken ku mbue hal kerna ndalanken kekelengen. Secara khusus ibas kata Dibata si niorati kita eme “melumbar pepinjamken” (ayat 5a), melumbar pemerena man kalak si kekurangen (ayat 9), bujur ia ibas kerina urusen (5b), adil (ayat 4), rsd. Bagepe si isingetken ibas ogen, Keluaren 23:19. Ije isingetken:
1. La nggosip (ayat 1)
2. Adil (ayat 2)
3. La rayo-ayo (ayat 3)
4. La pertewas (ayat 4-5)
5. Kepate. Keberpihaken nandangi kalak si la ergegeh, si kitik, si terpinggirken, kalak si la lit sima-simana (ayat 6). Enda isingetken erkiteken umumna kalak lebih mperdiateken kalak si mehaga sabab lit nilai keuntungenna.
6. La korupsi (ayat 8)
7. Solider nandangi kalak petandang (ayat 9)
Sekali nari, nehken kekelengen tentuna banci ilakoken ku bas mbue perbahanen. Saja ngenca kai pe siibahan kita arusna erpalasken kekelengen si tulus erkiteken kita enggo kap leben ikelengi ntah pe ngaloken kekelengen si spektakuler eme arah kematen Yesus Kristus guna nebusi salah dosanta. Emaka mari ula erleja-leja ndalanken kekelengen ibas kegeluhenta sabab bagekap singena ate Dibata si dalanken. Amin.
Pdt. S. Brahmana
0 komentar:
Post a Comment