Khotbah Esra 3:7-13, Penatalayanen Tahun 2010 wari sipeteluken

Thema:
MENATALAYANKEN ERTA GUNA KEMANDIRIAN DANA GEREJA

Introitus : Kuan-kuanen 3:9-10; Ogen : Ulangen 8:11-14
Khotba : Esra 3:7-13

Perlebe
Berngi si pe II kita nggo ncakapken cara mandiri ibas dana. Maka banci mandiri ibas dana eme mengandalken Tuhan, la perkisat/rajin erahin, pintar (meteh potensi diri ras strategi), beluh makekenca alu payo ulih pencarin sue ras singena ate Tuhan. Uga kin singena ate Tuhan? Sipakeken erta buaten lit e labo guna keperlunta saja tapi pe guna keperlun kalak sideban, terlebih guna keperlun gereja alu nehken persembahen gelah tri tugas pendilo gereja banci terus ilakoken.

Pebagesi Nas
Nasta pekan si pe III enda nuriken kecibal kalak Yehuda si enggo mulih I Babel nari. Kai si ilakoken bangsa enda? Ituriken ibas ayat 1-6, ibas kira-kira bulan si pepituken kenca kalak enda enggo ringan ibas kuta-kuta kemulihenna, ibas sada paksa pulung ia kerina I Yerusalem mpersada arih ras tekad guna mulihken ndalanken praktek keagamaen. Ibas ayat 2 I turiken ipajekken na batar-bara Dibata Israel ibas tapakna sindekah gelah ije isehken persembahen tutungen. Jadi amin gia rumah pertoton lenga muliuhken ipajekken, tapi ersada arih bangsa enda lako erbahan batar-batar persembahen lebe. Bageme tutusna ate kalak enda ersembah man Dibata. Amin gia musil denga kalak enda secara ekonomi erkiteken baru mulih ibas taneh pembuangen, tapi la ngkurangi semangatna ras ketutusenna nehken persembahen man Dibata. Ibas ngerayaken wari sapo-sapo tiap wari kalak enda nehken persembahen gelehen rikutken perluna, bagepe persembahen gelehen si itutung kerina ras persembahen-persembahen Wari Raya Bulan si Mbaru, persembahen tupung ia pulung nembah TUHAN , bage pe persembahen si ibereken man TUHAN sue ukur meriah. Mbue tuhu jenis persembahen, tapi ngasup kalak enda ndalankenca alu meriah ukur erkiteken igejapkenna uga keleng ate ras perbahanen Dibata si enggo naruhkensa mulihken ku Yerusalem. Penggejapen sibagenda kame sierbahansa bangsa enda kerina ergiah-giah mereken silit ibas ia guna membangun mulihken rumah pertoton. Ibas ayat 7 ituriken bangsa e mereken duit guna nggalari upah tukang batu ras tukang kayu, dingen mereken pangan, inemen, ras minak saitun guna ikirem ku kuta-kuta Tirus ras Sidon gelah itukarken ras kayu aras i Libanon nari, si ibaba arah lawit ku Joppa. Bagepe ibas ayat 8 ituriken maka kerina kalak buangen si enggo mulih ku Jerusalem e, ikut i bas dahin e.

Pointer aplikasi
(1) Themata pekan si pe III enda menatalayanken erta guna kemandirian gereja. Menatalayanken erta berarti ngaturken erta silit ibas kita alu mehuli. Mehuli sinimaksud eme sue ras singena ate Dibata ntah pe sue ras tujun Dibata mereken erta e. Simenarik ibas kegeluhen kalak Israel eme lit mbue jenis persembahen si arus isehkenna man Dibata. Tapi simenarik ka eme labo erkiteken sie maka bangsa enda jadi bangsa musil, malah sebalikna she asa gundari kitik gia negara kalak enda, ibas negara kalak sideban gia ia tapi ternyata tetap eksis. Kerna persepuluhen misalna. Ibas Padan sindekah lit 3 jenis persepuluhen si arus ilakoken kalak enda. Pertama, 10% penghasilen wajib ipersembahken gelah lit mbue ije pangan (Maleaki 3:10a) eme guna pengerja I rumah Tuhan.Janah Persembahen enda tiap tahun isehken (Ulangen 14:22). Sipeduaken, 10% ibas penghasilen nari, janah enda ipepulung 3 kali sada tahun (Ulangen 16:16). Persepuluhen enda la iserahken ku rumah pertoton, tapi ipepulung selaku celengen eme guna persedian biaya perayaen-perayan ibas sada tahun eme Paskah, Pantekosta ras wari raya pondok daun. Perpuluhen enda la banci ipan irumah seniri tapi ilebe-lebe hadirat Tuhan (Ulangen 12:4-7). Sipeteluken, eme 10% ipepulung ibas tiap-tiap tahun sipeteluken. Persepuluhen enda eme guna bantuan man anak-anak yatim piatu, janda bagepe hamba Tuhan (Ulangen 14:28-29). Begem arah aturen enda mahan bana kegeluhen kalak Israel iaturken, khususna erta siidasa arah pendahin sinilakokenna. Emaka alu pengaturen sibagenda ternyata kegeluhen kalak Israel reh sikapna. Engkai maka bage? Lasaja secara managemen enda mehuli, tapi terlebih pemahamen secara erDibata. Bagi isingetken ibas Maleaki 3:10 kalak sipatuh nehken persepuluhen ipasu-pasu Dibata kap. Jadi kuakap endame rahasiana bangsa Israel enda sukses.

(2) Bagepe kerna kemandirian dana gereja GBKP. Kuakap mbelinkal potensi ibas ngawan perpulungen. Masalahna eme lenga seri penggejapenta ibas erDibata. Adi labo siakap erta silit e rehna bas Dibata nari labo kita ngasup mere melumbar, labo kita ngasup makeken talenta silit ibas kita alu optimal ras meriah ukur. Kalak Yehuda ibas kemusilenna selaku bangsa simbaru mulih kunegerina ergiah-giah ia nehken persembahen, ergiah-giah ia makeken kengasupen si lit ibas ia guna membangun rumah pertoten erkiteken igejapkenna penampat Dibata si nggo erbahansa ia banci mulihken kunegerina. Kuakap adi kita pe nggejapken maka kerina silit ibas kita sialoken ibas Dibata nari, terlebih keselamaten pe enggo ibereken Dibata man banta ibas Yesus Kristus kuakap ngasup kita menatalayanken ertata e, ntah talentata si lit ibas kita e alu mehuli.

Pondok Gede, 19 Januari 2010
Pdt.S.Brahmana

Artikel lain yang terkait: