Khotbah Efesus 5:1-10, Pekan Penatalayanen GBKP, Minggu 16 Januari 2011 (Wari I)

Introitus:
Arah kiniteken me maka kam kerina jadi anak-anak Dibata i bas persadanndu ras Kristus Jesus (Galatia 3:26)

Ogen: Kolose 1:15-23; Khotbah: Efesus 5:1-10

Thema:
Nggeluh bagi Kula ni Kristus

Perlebe
Thema pekan penatalayanen berngi sipemena enda eme sijadi visi GBP GBKP tahun 2010-2015, “NGGELUHLAH BAGI KULA NI KRISTUS”. Thema enda sederhana tempa, tapi adi kuakap bages kal ertina, ras sangat relevan ibas konteks kegeluhenta genduari. Lit dua hal silang-langna relevansi thema enda. Pemena, eme jadi persinget, enggo me kalak kristen, ntah pe si ngaku kristen nggeluh bagi kula ni Kristus? Payo, cukup semarak ibadah-ibadah kalak kristen, terlebih ibas perayaan Natal, bagepe ibas membangun sarana fisik (membangun gereja) banci kataken luar biasa. Ndube gerejana kitik genduari enggo galang. Lit deba anggotana la dem 30 KK, gerejana she kal galangna, siat 500 kalak. Labo salah, saja rikut thema enda ras enda me situhuna sura-suranta kal adi jujur kita, eme enggo me kita nggeluh bagi kula ni kristus? Sipeduaken, nggeluh bagi kula ni Kristus eme panggilen kerina kalak si tek. La saja guna keselamaten pribadi, tapi pe panggilen jadi model kegeluhen singena ate Dibata ipertontonken man doni enda. Eme nggeluh si keleng-kelengen, saling mperdiateken, sisampat-sampaten. Bagi ringring ibas kula, amin gia erbage-bage tapi sepengodak-sepengole ia. La lit ije pinakit IHA (iri hati), la lit I je kesombongen, la lit ije saling menjatuhken, la lit ije korupsi, rsd. Enda jadi relevan erkiteken kinatana nggeluh genduari mekatep la bage. Ula padah sinin organisasi sideban (doni), organisasi si palasna keagaman pe mekatep mekelek denga si idah. Emaka arah visi GBP GBKP 5 tahun enda iarapken warga GBKP jadi teladan nggeluh singena ate Dibata.

Pendalamen Nats
Nina Paulus, “erkiteken kam anak-anak kekelengen Dibata”…. Arah kata enda, Paulus ngingetken ise kin situhuna kalak si enggo tek man Kkristus. Payo kin kita anak-anak Dibata? Banci kap lanai si eteh, la nai si inget ise kita. Lupa kita, maka kita anak-anak Dibata kap. Banci jadi bagi bagi nde-nden “Ula kata-kataken” kita. Lanai itehna kai mergana ras beru kai ndube nandena. Syairna lengkapna bagenda: “Andiko jilana, nande karo ah, pernah kuidah ia cirem. Kutatap kenca ayona, minter aku lupa kai merga sikubaba ras beru kai ndube nande”.

Si lang-langna lit dua hal penekanen arah persinget ras terlebih penekanen (“erkiteken”) si isingetken Paulus ijenda. Pemena, kita kap anak-anak Dibata. La sekedar anak-anak Dibata, tapi anak-anak kekelengen Dibata. Engkai maka banci kita salih jadi anak-anak kekelengen Dibata? Ibas kontek Surat Efesus, enda erkiteken pemilihen Dibata sendiri. Inisiatif Dibata. Labo kam si milih Aku, tapi Aku nge similih kam. Dibata nge si milih ras ngangkat kita jadi anak ibas keluargaNa (adopsi)[1] Selaku anak lit kap hak ras kewajibenta. Hakta eme ndatken perhatian, keklengen, pengkawali/penemani, ras kecukupen. Kewajipenta eme patuh, megiken ajar ras nggeluh ibas ajaren si iberekenNa, bagepe ngkelengi Dibata selaku Bapanta[2]. Sipeduaken, eme konsekwensi selaku anak-anak Dibata eme nggeluh ngusih Yesus Kristus. Enda la gampang, terlebih adi kita erpenalemken gegehta, bahken la mungkin pe kita ngasup[3]. Nggeluh ngusih Tuhan Yesus eme nggeluh erpalasken kekelengen, eme kekelengen agave (ayat 2), bagepe kebadian (ayat 3-5). Nggeluh erlua-lua, erlagu la mehuli, merangap, melasken cakap caram, cakap silang-lang ntah si kemali, mengingkari statusta selaku anak-anak Dibata kap. Alu kata sideban adi e denga si lakoken berarti labo tuhu kita anak-anak Dibata.

Ayat 3-5 enda itekanken Paulus erkiteken lit denga pengakap perpulungn eme pengakap si ipengaruhi aliren filsafat si igelari Gnostisisme ngataken maka roh saja nge si payo, benda ntah materi lang. Erkiteken si e aliren enda erpendapat sipenting ibas jelma eme rohna, labo kulana. Emaka kai pe iban kulana labo masalah, termasuk pe ngelakoken perbahanen erlua-lua, cakap caram, rsd. Alu kata sideban dosa jasmani ras dosa seksual labo jadi masalah. Engkai maka bage? Sabab nina ajaren enda, sie turah arah sura-sura kula kap, labo arah sura roh. Ajaren enda tentuna menarik kal. Emaka gampang kalak ibabaina papak. Emaka ibas ngalaken pengajaren si bage, Paulus menekanken kula ras tendi seri pentingna, duana ijadiken Dibata. Janah penebusen si ilakoken Dibata ibas Yesus Kristus eme penebusen secara utuh, secara total. Labo roh ngenca. Bandingken pe rumusen pengakun kiniteken kalak kristen kerna “kekeken kula”.

Nginget ajaren enda gampangkal langket, desken pinakit menular, sebab mbelinkal daya tarikna, khususna menyangkut erlua-lua. Emaka nina Paulus tole ibas ayat 6-7, ula pelepas ise pe nipu kam alu kata ntah ajaren si la payo, janah ula pe erkandu-kandu ras kalak si bage. Engkai, sabab banci gampang kita langketina. Sijelas, kalak si ngikutken pengajaren enda eme nggeluh la badia alu ngelakoken perbahanen erlua-lua, erlagu la mehuli ntah pe kalak merangap la dat bagin ibas Kinirajan Dibata.

Memang, enggeluh selaku anak-anak Dibata labo gampang. Mbue tantangen. Tapi adi siingetlah katawari pe ise kita, kita eme anak-anak kekelengen Dibata, erpenalemken gegeh siibereken Dibata ngasup kita nggeluh ngusih Yesus Kristus. Ibas ayat 8-10 Paulus menganalogiken kalak sitek/kalak kristen eme terang, labo kegelapen. Engkai? Sabab menurut Paulus terang e mbaba ulih buah simehuli eme si bujur ras si tuhu-tuhu. Emaka implikasi anak-anak Dibata eme nggeluh ibas terang.

Poiter Aplikasi
(1) Kerina kalak sitek eme anak-anak Dibata. La saja anak-anak Dibata, tapi anak-anak Dibata si ikelengina. Adopsi enda jadi eme arah kinitekenta (Galatia 3:26). Kiniteken siipeturah Dibata arah pemilihenNa nadangi kita. Alu bage dage sura-sura Dibata nandangi kita labo gelah kita bene, tapi sebalikna gelah ndatken kemalemen ate ras kegeluhen sirasa lalap[4].

(2) Selaku anak-anak Dibata lit kap hak ras tanggungjawabta. Hakta eme ndatken perhatian, kekelengen, pengkawali ras kecukupen ibas kerina kebutuhenta. Tanggungjawabta eme tek ras patuh man Dibata, megiken ras ndalanken pedahna, berarti enggeluh ngusih Tuhan Yesus. Nggeluh ngusih Tuhan Yesus eme nggeluh erpalasken kekelengen, eme kekelengen agave, bagepe kebadian (la erlua-lua, melasken cakap caram ras rangap).

Jatiwaringin, 10 Januari 2011
Pdt.S Brahmana, S.Th,MA
-----------------------------

[1] Roma 8:23, Galatia 4:5
[2] Ulangan 6:5; Mazmur 31:24; Matius 22:37; Markus 12:30; Lukas 10:27
[3] Bd.Yohanes 15:5
[4] Bd.Yeremia 11:29

Artikel lain yang terkait: