Saturday 21 May 2011

Khotbah Matius 21:14-22, Minggu 22 Mei 2011 (Kantate=Rendelah)

Introitus:
Ersuraklah man TUHAN , o doni kerina, ersuraklah dingen rendelah perban riahna/ Bersorak-soraklah bagi TUHAN, hai seluruh bumi, bergembiralah, bersorak-sorailah dan bermazmurlah (Masmur 98:4).

Pembacaan : Mazmur 108:1-4; Khotbah: Matius 21:14-22

Thema:
Ersuraklah Erkiteken Perbahanen Dibata simbeli (Bersoraklah karena perbuatan Allah yang besar).

Renungen:
Lit 2 hal ateta si nin arah kata Dibata Minggu enda. Sipemena eme Pujin si isehken danak-danak kerna Yesus. Anak-anak e ersurak muji Yesus alu ngataken “Pujin man Anak Daud”. Enda sada hal si luar biasa. Anak-anak siipahami kalak dewasa identik ras kalak la serius, bodoh, la bages pengertinna, rsd.ternyata lebih ngasup ngidah ntah nandai Yesus selaku mesias arah kai siibahan Yesus pepalem kalak pentang ras kalak simate serapen si reh ndahi Yesus. Emaka nina ersurak: Pujin man Anak Daud. Imam-imam simbelin ras guru-guru agama, sebalikna. Kalak enda la ngasup ngidah ras ngaloken Yesus selaku mesias e. Enggo pe ngidah tanda-tanda siban Yesus, pusuh ras babahna la ngasup ersurak muji Yesus selaku mesias erkiteken… erkiteken kai akapndu? Banci mbue jababna:
  1. Banci saja erkiteken lit motivasi sisalah ibas ia eragama, ibas ia ersembah.
  2. La akapna metunggung Yesus e eme mesias, baik arah penampilen bagepe latarbelakang secara manusia.
  3. Segat atena Yesus erkiteken tindaken sinilakoken Yesus mpelawes kalak si erbinaga ras sinukur ikesain rumah pertoton e, nunggalingken meja-meja bagepe bangku-bangku si erbinaga ije (ayat 12-13).
  4. Rsd.

Kuakap kita sipulung enda labo nggit ntah banci saja megelut adi ikataken kalak kita bagi danak-danak. Adi bage, tentu arusna lebihen asa anak-anak e kita ersurak muji-muji Dibata. Artina ngasup kita ngidah perbahanen Dibata si mbelin ibas geluhta, emaka ersurak kita muji-muji Ia. Perbahanen Dibata si mbelin si enggo tangkas icidahkenNa eme Ia enggo mete I kayu persilang gantiken kita gelah ula mate erkiteken dosata. Bagepe perbahanen Dibata sideban. Kita banci medak erpagi-pagi ndai ras banci kita ersembah ibas rumah pertoton enda, epe perbahanen Dibata si mbelin nge man banta. Malem me ateta adi sigejapken perbahanen Dibata e ibas geluhta. Kalak si bage, teridah nge ibas geluhna: meteruk ukur, meriah katawari pe (bersukacita senantiasa), ramah, la pergelut, la pertewas, rsd, perbahanen si mehuli singena ate Dibata. Muji-muji Dibata tentu labo saja arah babahta, tapi pe arah perbahanenta. Dibata terpuji adi nggit kita ras meriah ukurta nampati kalak, nggit kita ras meriah ukurta nehken persembahen adi pesikap gereja ingan kita ersembah, ntah pesikap rumah pendeta, rsd. Anak kecil saja tahu. Bagaimana dengan kita yang dewasa?

Sipeduaken eme batang ara si isumpahi Yesus jadi kerah erkiteken mbur ngenca bulunngna tapi la erbuah.

Ibas ayat 18 isingetken “Pepagina lampas erpagi-pagi, asum Jesus ibas perdalanen mulih ku Jerusalem, melihe Ia”. Yesus I Betani nari ku Yerusalem (ayat 17). Jarakna lit 3 Km. Mungkin Yesus lenga sarapen, emaka itengah dalan melihe Ia. La bagi jamanta genduari, tengah dalan lit si jumpai kalak erbinaga. Ibas jaman Yesus batang ara ngenca lit ijumpai gedang-gedang dalan e. Emaka waktu idahna batang arah si mbur buahna, ideherina batang ara e, ntah lit buahna banci ipan. Kepeken ibas jaman Yesus muat buah ara guna ipan si lit itepe dalan e labo nagko gelarna (bd.Ulangen 23:24-25). Tapi la lit sada pe. She maka isumpahi Yesus batang ara e jadi kerah.

Lit dua pengertin kerna si enda. Pertama, enda sada gambaren bangsa Israel si la erbuah. Payo semarak ia eragama, ndalanken aturen-aturen agama, tapi la erbuah. Eme la nggeluh sue ras singena ate Dibata, nggeluh alu pekulah-kulah. Tempa patuh eragama tapi perbahanenna pereh rawa Dibata eme la bujur, la adil, la meteruk ukur, rsd, terlebih nulak Yesus si reh ku doni enda selaku mesias guna nelamatken manusia. Emaka bangsa Israel sibage desken ara si mbur bulungna tapi la erbuah, pereh rawa Yesus alu numbahisa she kerah.

Enda jadi persinget pe manbanta kalak kristen, gelah ula sempat kita pe kena rawa Dibata erkiteken la erbuah eme hanya dalanken aturen agama alu pekulah-kulah saja, pengakunta terjeng biber ngenca. Ngaku kita kalak kristen, tapi la jadi sira ras terang.

Sipeduaken sehubungen ras batang arah si karah isumpahi Yesus, eme iterangken Yesus pe kerna kuasa si lit ibas kalak si tek man Dibata (tek la monce-once). Nina Yesus, "Ingetlah! Adi tek kam man Dibata dingen la monce-once ukurndu, ngasup kap kam erbahanca bagi si enggo Kubahan nandangi batang ara enda; janah labo terjeng si e saja, tapi ngasup pe kam ngataken man uruk enda, 'Angkatken bandu jenari benterken bandu ku lawit,' e maka jadi me bage! Adi tek kam, ialokenndu kap i bas Dibata nari kai saja si ipindondu man baNa arah pertotonndu”. Enda kata si isehken Yesus, tentu berlaku pe man banta ibas jaman genduari. Adi tek kita, jenari isehken arah pertoton ibere Dibata nge kai si ipindo kita e.

Kai kin tandana tek?
  1. Rikut ras tahungerejanta, minggu enda eme minggu “Kantante” ertina “rendelah”. Rende muji Tuhan. Medak erpagi-pagi mis rende muji Tuhan ras ertoto.
  2. Rikut Introitusta ras thema eme gejapna perbahanen Dibata si mbelin ibas geluhna emaka la terbanca sinik. Bagi danak-danak e, ersurah ia muji Dibata. Ersaksi ia. Saksikenna kerna perbahanen Dibata e man kalak sideban.
  3. Rikut ras Masmur 108:1-4 pengogenta, kalak sitek teridah arah ngasup ngatakn bujur man Dibata
  4. Erkomunikasi ras Dibata arah pertoton. Ertoto ia secara teratur.
  5. Rsd, banci itambahken.

Pdt.S.Brahmana


Artikel lain yang terkait:



0 komentar:

Post a Comment