Monday 19 September 2011

Khotbah Perbahanen Rasul 2:42-47, Pekan Doa Wari III (27 September 2011)

Introitus :
Adi kalak mehuli ertoto, ibegiken Tuhan pertotonna, tapi la diateNa pe kalak jahat. (Kuan-kuanen 15: 29 )

Ogen : Mazmur 5 : 2-8; Khotbah : Perbahanen rasul-rasul 2 : 42-47

Tema :
Ertoto guna meningkatken spritualitas kerina ngawan perpulungen

KATA PERLEBE

Pertoton eme perkatan manusia siitujuken man Dibata. Daniel ertoto (Dan 6: 10-11), Elia ertoto (1 Raj.18:36-38 ), Elisa ertoto (2 Raj.4:33), Yesus ertoto ( Matius 6: 5-15 ), kalak sitek arus terus menerus ertoto ( Perb.4:23-31) sebab toto eme kesah kegeluhen kalak sitek man Tuhan Yesus ras toto eme gegeh, pengendesen ras pengarapan kerna kegeluhenta man Tuhan simada kegeluhennta. Bas kitab ende-enden GBKP No 176: 1 ikataken :

Ibas toto kubelasken seh man banNdu Tuhanku
Ajar aku lah ngaloken simehuli akapNdu
Pertotonku bagi Yesus sanga bas kiniseranNa
Labo peratenku Bapa tapi peratenNdu jadilah.

Payo tuhu ibas toto kita ercakap-cakap ras Tuhan, nuriken kerina keriahen ras perbebennta, penggejabennta bagepe pengaloita kerna keleng atena alu ngataken bujur rusur arah pertotonnta bagepe teridah arah kinata geluhta. Pertotonnta seh man Tuhan janah bagi sura-sura Tuhan lah sijadi iberekenNa man banta.Labo peratennta tapi peratenNa. Bapa isurga megiken pertoton anak-anakNa/kalak sitek (Luk.11 : 9-13, Mat.7:7-11)

PENDALAMAN NATS
Kitab perbahanen rasul-rasul 2 : 42-47 eme bagin rangkaian pasal 2: 1-47, uraian kerna nusurna Kesah siBadia (uga kronologis kejadinna, kerna melala bangsa simengalamisa bagepe respon terhadap khotbah Petrus). Peristiwa e jadi sada gerakan simbelin, sebab lit 3000 kalak tambah ku bas perpulungen e. Peristiwa e jadi pesta peridin mbelin, ncidahken gegeh kuasa Kesah siBadia ija rasul-rasul mereken kesaksin kerna kai siituriken/siniajarken Yesus man bana. Paksa nusur Kesah siBadia eme jadi bukti sinyata kerna kai siikatakan Tuhan Yesus e jadi tuhu-tuhu (band.Yoh 14:26). La hanya iperidiken tapi pe perpulungen e tutus megiken pengajaren ibas rasul-rasul nari, nggeluh sikeleng-kelengen bagi si ersenina. Ras-ras pe ia ertoto man Dibata. Ternyata selain ertoto irumahna sekalak-sekalak perpulungen e pe ertoto ras-ras ku rumah pertoton tep-tep wari (ay.46). Melala tanda-tanda sengget ras kejadin-kejadin simejin ibahan rasul-rasul, lit na kekelengen sapih-sapih ia maka kai si lit ibas ia ipake ras-ras , kalak pe erngena ate man perpulungen e. Tentu sienda terjadi sebagai ulih pertoton ras-ras (doa bersama) perpulungen e. Amin pe rakyat ibas lapisan besar la bergabung ku perpulungen e tapi ia erngena ate man perpulungen e janah tep-tep wari itambahi Tuhan ku perpulungen e kalak siiselamatken, perpulungen-perpulungen e pe ertambahna ibabo doni enda.

POINTER APLIKASI

  1. Ertoto ras-ras eme ertoto pekepar kerna teman ras kalak sideban labo kerna dirinta saja, pertoton kalak sibujur ergegeh kel (Yakup 5 : 16b).
  2. Ibas kita ertoto, isi pertoton e secara tidak langsung jadi geluhta ras sura-suranta janah e silakoken. “ Doakan yang kamu kerjakan dan kerjakan yang kamu doakan “. Alu bage turah spritualitas simeningkat bas geluhta bagepe tengah-tengah perpulungenta.Bagi perpulungen sipemena ndube toto e jadi penggerak/gegeh banci ia pulung ras-ras muji Dibata, erbahan singena ate Tuhan seh maka kalak sideban erngena ate man perpulungen e sebab turah rusur kekelengen ras persadan sinteguh sapih-sapih ia.
  3. Ketutusen ate ibas ertoto la sia-sia pasti lit ulihna bagi Nabi Elia alu tutus ate ertoto ia gelah ola nusur udan, jenari lego telu setengah tahun dekahna, kenca ertoto ka ia mulihken reh udan ilangit nari, jenari taneh mereken hasilna.
  4. Toto arus iikuti perbahanen singena ate Tuhan, sebab Dibata rate ciga nandangi perbahanen si la payo, jahat dingen perguak ras penipu (mazmur 5: 2-8).
Cijantung, 7 September 2011
Pdt.Karvintaria Br.Ginting
Catatan sermon:
  1. Kerehen Tuhan sipeduakaliken enggo deher, enda salah sada si erbahansa perpulungen enda luar biasa ibas kiniersadan ras sisampaten. Perpulungenta genduari la bage, erkiteken dekah denga akapna maka reh Tuhan e. Ngkelengi sue ras keperluanna masing-masing, tapi sedekah enda eme sue ras aturen. Ertoto i a kerna keperlun bersama, kai ngenda maksudna? Gelah solidaritas e reh belinna, gelah lanai ogeis. CU eme salah sada cara sisampatsampaten.
  2. Kiniteken sipaguh menciptaken produk yang baik, seri pemahamanna.


Artikel lain yang terkait:



0 komentar:

Post a Comment