Saturday 22 December 2012

PESAN NATAL MODERAMEN GBKP TAHUN 2012

"Perukurenndu bali min ras perukuren Kristus Yesus" (Pilipi 2:5)

Senina ras turang si nikelengi Tuhan Yesus,
  1. Dibata erkeleng ate man kerina manusia. La ateNa bene sada pe manusia, tapi gelah terkelin. Guna ngkelini kerina manusia, bage pe kerina tinepaNa, Dibata reh ku doni enda jadi manusia ibas pribadi Yesus Kristus si iperingeti kita teptep perayan Natal (Yoh. 1: 14). La erpilihen, kerina manusia ikelengiNa, terlebih kalak si lit ibas kiniseran. Usihen enda perlu idalanken Gereja ras teptep kalak Kristen ija pa pe. Kekristenen labo terjeng pemeteh bagi meteh isi Pustaka si Badia, aturen-aturen Agama, tapi arus lebih teridah ibas perbahanen si konkrit, si erguna man manusia idarat institusi gereja. Bali ras Yesus erguna (fungsional) man kerina manusia, ras kerina tinepaNa (bd.Pil.2:5).
  2. Ibas mperingeti Wari Natal tahun 2012, kita iajuk ncidahken keprihatinenta nandangi kecibal bangsanta khususna, bage pe doni enda umumna, eme :
    1. Harga jual produksi pertanian rakyat menukik tajam si jadi perbeben jelma si nterem, tapi ibas situasi sibage ka la sitik pemimpin bangsanta si tega erbahan ceda ukurta, terlibat ibas tindak pidana korupsi.
    2. Peta politik bangsanta rentan ku bas perpecahen bangsa. Semangat ras jiwa Pancasila, UUD 1945 Negara Kesatuan Republik Indonesia, Bhineka Tunggal Ika sangana iuji. Golongen-golongen tertentu si bergaris keras berusaha memaksaken sura-surana alu berbagai cara, subuk secara terselubung bage pe terang-terangen. Peraturan Bersama 2 Menteri kerna pembangunen rumah ibadah empersulit pembangunen gereja. Peraturen enda mbuka peluang man masyarakat tertentu ngawasi ras melarang pembangunen gedung gereja. Ibas situasi ekonomi sinderpa jelma sinterem, situasi poitik ras masalah kerukunan beragama, pinakit-pinakit sosial tetap menghantui masyarakat/bangsanta eme peningkaten jumlah penderita HIV/AIDS, narkoba, judi, ras sidebanna.
    3. Pemilukada Gubernur ras Wakil Gubernur Sumatera Utara ilakoken tahun 2013. Enggo itetapken pasangen-pasangen Cagubsu/Cawagubsu. Ibas kegiaten berpolitik menjelang Pemilukada Gubsu/Wagubsu enda perlu sijaga gelah gereja ula terlibat ibas politik praktis. Institusi gereja la banci ipake jadi sarana politik praktis.
  3. Ibas situasi ras kondisi bangsa ija Gereja ras Umat Kristen (termasuk GBKP) sebagai bagian integral bangsa Indonesia perlu encidahken ras menyumbangken nilai-nilai perdamen ras kekelengen si ersumber ibas kekelengen Kristus nari. Hindari perpecahen ras dorongen kepentingen pribadi ras golongen subuk ibas gereja, masyarakat ras bangsanta. Si bengketi tahun 2013, tahun oeningkaten solidaritas eksternal GBKP alu thema : “ Mehuli man kerina tinepaNa”.
  4. Ngidah situasi ras kondisi masyarakat ras bangsanta si genduari, Moderamen GBKP nehken pesan Natal man banta :
    1. Ngerayaken Natal tahun 2012 alu sederhana, tapi dem alu makna simbages, kuga Dibata nggit peteruk baNa guna engkelengi kerina manusia rsa kerina tinepaNa.
    2. Pegegehi semangat persadan ras keersadan i tengah-tengah jabu, PJJ, Perpulungen, Runggun Gereja, Klasis ras Sinode GBKP ulih peningkaten solidaritas internal GBKP tahun 2012 enda.
    3. Ibas ngalaken krisis ekonomi, nggeluhlah alu sederhana. Hindari gaya hidup boros ras konsumerisme, spekulasi. Tutus ertoto ras erdahin.
    4. Gunakenlah hak politikta alu ikut serta ibas Pemilukada Gubsu/Wagubsu ibas Maret 2013 si reh enda, alu la ngelibatken gerejanta GBKP secara institusi kubas politik praktis.
    5. “Semangat inklusif ikedepanken ibas nggeluh ermasyarakat, tanpa memperhitungken latar belakang suku, agama, ras golongen, gelah terwujud dunia si lebih damai, adil ras sejahtera. Alu semangat enda si bengketi Tahun 2013 sebagai “Tahun Peningkatan Solidaritas Eksternal GBKP”.
  5. Moderamen GBKP nehken salam Selamat Wari Natal 25 – 26 Desember 2012, ras ngalo-ngalo Tahun Baru 1 Januari 2013. Tuhan Yesus masu-masu kita kerina.
Tabi ras mejuah-juah.
MODERAMEN GEREJA BATAK KARO PROTESTAN
Ketua Umum
Sekretaris Umum






Pdt.M.P.Barus,M.Th
Pdt.Simon Tarigan,S.Th


Artikel lain yang terkait:



0 komentar:

Post a Comment