Introitus :
KesahKu Kucurcurken man bangsangKu
Israel, janah lanai ndigan pe ia Kutundalken. Aku, TUHAN si Erdolat nggo
melasken katangKu. Esekiel 39 : 29
Ogen : Esekiel 36 : 27 - 30 Khotbah : Perbahanen Rasul-Rasul 8 : 26 - 38
Thema :
Kesah si Badia Si Njemba Perpulungen Guna Ersaksi
Senina ras turang ibas Yesus Kristus,
Ibas wari sendah enda, si umputi ka Pekan Penatalayanenta. Lit 2 batang
belin si ibas wari enda ateta si pebagesi eme kerna ersaksi ras uga kita
nggejabken litna Kesah si Badia ibas kegeluhenta si mpengasup kita guna
ngelakokenta ersaksi e. Adi ngerana kita kerna ersaksi; maka arus nge
lebe si eteh kai si man saksinken e. Engkai maka bege? Sabab adi ibas
kita ersaksi tapi labo sieteh kerna “kebenaren” kerna isi kesaksin e
maka situhuna kita labo ersaksi tapi nuri-nuri. Kerna payo ras lang, e
labo jadi tanggung jawab si nurikenca. Tapi adi ersaksi ningen e, si
eteh kai si man turinken janah pang ka kita mpertanggungjawabken kerna
kai si ni saksinken kita e. Jadi labo bagi gung si erbulnang saja,
megang sorana tapi banci saja ia pe labo ietehna kerna sora si
ipedaratna e. Alu bage, bicara lit si atena nungkun kebenaren kerna
sinituriken e man banta, la kita ngataken “nina kalak”, tapi pang kita
ngataken “ningku”. Sabab lit kin kita “ibassa”, la “idarat”.
Mari dage si turihi kerna kai si enggo
radu ras kita ngogesa kerna kai si jadi khotbahta ibas wari enda.
Pilipus eme sekalak anak Tuhan si ndatken pendilo guna nehken kerna
kebenaren isi Pustaka si Badia. Janah ibas kegeluhenna teridah maka
mbelin kal sura-surana lako banci nehken kerna uga perkuah ate Tuhan
nandangi manusia. Tentu enggo lebe igejabkenna kerna uga Tuhan ngkelengi
dirina, la terjeng ngkelengi ia tapi pe masu-masu geluhna. Seh maka
“lanai tergengkenna” guna sinik saja. Tuhan ngidah sura-surana e, emaka
ipejumpakenNa ia ras sekalak jelma i Etiopia nari (nen ay. 27). Tuhan
ngataken maka ia arus njumpai kalak e, sabab ibas kalak e lit sura-sura
Tuhan si atena icidahkenNa nandangi Pilipus. Ibas perjumpaan e, adi si
bahan narasina maka lit percakapen si cukup mbages. Memang tempa
gendek-gendek saja adi si oge; tapi ngidah ‘ulih” si lit ija kalak e
mindo iperidiken, tentu labo sada bagin pendahin si mesunah. La banci
lang Pilipus arus nge ncidahken la terjeng pemetehna kerna Tuhan e, tapi
ngasup ka ia encidahken kuasa Tuhan e. Luar biasa ma, Pilipus ngasup
mereken kerina siiperluken kalak e maka dungna ia tek. Ibas bahasa si
rusur si datken ibas tiga-tiga eme: Pilipus bali bagi sekalak perbinaga
si ngasup ngataken maka barang si lit bas ia e tuhu-tuhu mejile ras
ermutu janah ise saja si atena muatca ntah nukursa la banci rugi, pasti
untung. Emaka kedungenna kalak e (adi ibas tiga-tiga ndai), ngena atena
dungna, janah lanai lit pilihen si deban seakatan muat barang man bana.
Senina ras turang,
Tapi payo kin enda kebeluhen Pilipus
ngenca, ntah lit denga nge “si deban” si jadi pendukung utama si
erbahanca ia berhasil. Ndai pe enggo si kataken maka lit kuasa si deban
si erbahanca maka ia banci sukses. Janah e ninta ndai Tuhan. Saja uga
banci kuasa Tuhan e jadi peran sentral ibas peristiwa enda? Jelas kal
adi si perdiateken, maka tang-tangna nari “kuasa Tuhan” nge (oge : Kesah
si Badia) si nuruh ia lako njumpai kalak e. Ibas Pilipus megi
“perentah” enda, reh turahna sura-surana lako ndahi kalak e bagi
“persuruhen” Kesah e. Lang cubaken min ndai, ibegina ngenca, tapi la
ilakokenna; banci kin tersehi kerina bagi si enggo isuraken Tuhan arah
ia. Tentu lang. Sabab labo erdahin Kuasa e adi lakin kita nggit
“nggerakkenca”. Emaka ibas nehken kesaksinna e, ipeturutna ‘Kuasa Kesah
e” ringan, nkuasai, ras pe ngajari ia. Enda me sinikataken kita : “tek
tuhu-tuhu, tuhu-tuhu tek” Sabab enterem kal genduari enda kalak si ngaku
tek, tapi mekatep la pang lako nuriken kerna kai si nina itekina e.
Kai kin si mekatep jadi halangen guna
“mpelepas” kuasa Kesah e erdahin ibas kegeluhenta. Ih.... seh kal si
tuhuna buena. Tapi salah sadana eme, kata “tek” e terjeng biber denga,
entah enggo me ie seh ku bas pusuh ras kegeluhenta, tapi “ Kesah e si
pepedem” ibas geluhta. Alu erbage-bage alasen, si turiken me man kalak
maka kita langa denga payo lako ndalanken sura-sura Kesah e. Terlebih,
lit denga rusur “kebiaren-kebiaren” si ngkuasai kegeluhenta. Mindo
ningen, mbiar la ibere, erpengendes ningen mbiar la lit si megikenca,
tek ningen..... tapi la “tunduk” alias si pejang-jang ka kinirincuhen
dagingta. Adi ibas dunia medis : “percaya adalah kekuatan untuk
menjadikan kita sembuh” sabab adi labo kita tek nandangi tambar
siibereken, pinakit si lit ibas kulanta pe tentu mesera ka nge malemna.
Padahal adi si tulihken ku bas pengogenta ibas kitab Esekiel ndai maka
jelaskal isehken maka Tuhan enggo mpesikap kai si iperluken. Leben nge
iateh Tuhan kai kin si mehulina guna kegeluhenta. Kenca enggo ietehna,
lebihen asa si e pe, Tuhan mereken Jaminen man manusia si ernalem man
baNa
Senina ras turang.....
Kai dage si banci si datken ibas wari sendah enda; adi kami ngidah maka lit piga piga bagin si perlu sipergermetken eme :
- Ninta maka kita enggo jadi anak-anak Tuhan. Selaku anak-anak Tuhan, tentu enggo si eteh dingen si tandai kerna Tuhan ras perbahanenna nandangi manusia tinepaNa ras pe khususna nandangi dirinta. Labo gelar saja, tapi bage kin enggo kecibal geluhta.,.. Janah kerina e, lanai dosa sijadi “penguasa” kegeluhenta, tapi kita arah Kuasa Kesah e erbahanca lit tempa-tempa “si lompat” ndarat atena ibas geluhta nari. Entah pe rugi kal si akap adi kalak si deban lit denga si terjeng erkiniteken nina, kinata na labo lit sura-surana lit denga kuasa si megegeh denga ibas dirinta lako mbagiken kinilitenna ibas erkiniteken man Tuhan. Itehna maka Tuhan e enggo lit sope denga kerinana, Tuhan ka nge si mpebelin-belin kita, gelah arah kegeluhenta pe reh teremna kalak si megi Kata Tuhan jenari ngikutkenca. Janah tuhu-tuhu kal jadi “kinirugin”, adi tading ngenca ibas geluhta, tapi la keke ia.
- Ersaksi labo banci erkiteken sura-sura saja, tapi arus njadiken maka Tuhan kap si puna dahin, janah dahin e banci tersehi adi lit pengendesen nandangi kuasaNa e lako banci nuduhi, ngajari, dingen mpeteguhi kininggiten Pilipus. Sabab megati kita ngidah maka ibas paksa enda enggo sehkal buena dahin-dahin si nina palasna guna “Kemuliaan Tuhan” tapi dirina nge si ipersukutina; adi istilah si rusur kupakai eme : memperalat Tuhan demi kehidupan pribadi. labo sisi pelayanan ras pengabdian si ipebelin tapi bagi sifat kalak si nukur barang. Ngena atena, itukurna, tapi banci saja barang e seh kal situhuna mejilena, tapi erkiteken bentukna maka dung terabaiken sisi si mehuli si banci jadi. Kata enda banci saja seh man banta : Pdt, Pt-Dk, bage pe kerina perpulungen. Berarti ibas bagin enda seh kal perluna “uji diri” si dungna mpeturah kesadaren maka adi enggo “risi” tambe kinitekenta, tapi terus iisi, maka kedungenta teridah kin maka erburak ia sabab lanai siat ingan nampungsa pe.
- Kesah si badia memang labo si idah alu mata daging kulanta, tapi sehkal tangkasna adi si pake mata kinitekenta, beda ras kegeluhen kulanta... Banci saja “teridah” kal kita ibas kerina dahin kiniteken, bagi pergerejanta, aktifitasta ibas ngukuti kerina dahin-dahin gereja (ibas dampar apai pe rusur kita terlibat ras ilibatken kin); ibas si enda uga kinitekenna si payo banci la teridah. Kegeluhen Pilipus sehkal ulina jadi contoh kegeluhenta, mbue pe perbahanenna si mehuli ibas geluhna, janah reh dekahna bali bagi page si risi, reh tuana ia maka reh “mbengkai”na, tapi kerina kalak ngatakenca maka mejile ia. Bage ka pe ibas kita “ersaksi” ninta e; tergejab kin maka adi la ndahiken “perentah Tuhan”, bagi si kurang iakap ibas geluhta, tapi ibas ijemba Kesah kita, maka lit kin nanamna kecibal geluhte e nandangi kalak si deban. Ipujiken pe, la mbabai meganjang ukurta, tapi reh mbelinna ka si akap “utangta” nandangi Tuhan.
- Emaka mari..... gejabken penjembana.... adi ijemba pasti reh ku lebena... Kita anak-anak Tuhan pe ibas Tahun enda arus reh majuna caranta ngelai Tuhan ras kerina manusia. Tuhan pastu ngajari... Tuhan pasti mbabai. Amin
0 komentar:
Post a Comment