Bahan : Ketangkasen 2:1-7
Thema : “Mpekeke Keleng Ate Man Kristus”
Tujun :
- Gelah ngawan perpulungen niksiki keleng atena man Kristus
- Gelah ngawan perpulungen mpekeke semangat kiniteken si pernah igejapkenna
Ngerana kerna keleng ate man Kristus tentu labo terjeng cakap saja ngenca tapi teridah arah kegeluhen sitep-tep wari. Kalak sikeleng atena Kristus tentu lit perubahanen ibas dirina alu ncidahken kegeluhen sipayo, benar, dem ibas kekelengen, rsd.
Bahan PJJ Minggu enda ncidahken kegeluhen selaku anak Dibata si ncidahken kekelengen man Kristus eme alu tetap setia ndalani kegeluhen bagi siisuraken Kristus. Erbage situasi banci jadi erbahanca jadi erbage perubahen. Perubahen e banci ku simehuli, tapi banci ka kusila mehuli. Litna erbage perbeben nggeluh banci jadi erbahanca kita reh dewasana ibas erkiniteken man Tuhan, tapi sisi sideban banci erbahanca kita nadingken Tuhan ibas kegeluhen enda (lanai kita tek man baNa). Siniarapken ibas kita ngorati bahan PJJ enda reh terangna pengidahta kerna keleng ate Kristus nandangi kita seh maka ibas kita ndalani kegeluhen enda pe reh tetapna kinitekenta nandangi Ia alu tetap erkeleng ate man baNa.
Ketangkasen 2:1-7
Kitab ketangkasen enda isuratkem man Yohanes guna mereken pengarapen ras gegeh man singogesa erkiteken ibas masa sie jadi me kesusahen nandangi kalak Kristen erkiteken kinitekenna man Kristus ia igasgasi kalak. Ibas kitab enda pe jadi pengenehenen ras ketangkasen Yohanes guna nurikensa alu make erbage-bage simbol guna ngertikensa man kalak sierkiniteken ibas masa sie.
Ketangkasen 2:1-7 si jadi oraten PJJ enda eme ipeseh nandangi perpulungen i Efesus si enggo ndekah pantek. Berita siipeseh enda eme arah Dibata nari si icidahken dem alu kuasa simbelin termasuk erkuasa nandangi kerinana (ay1). Arah nats enda pe icidahken keberadaan perpulungen e si iidah ras ieteh Dibata kecibalna nai nari seh genduari. Sienda pe nuduhken kuasa Dibata nandangi kegeluhen manusia ras meteh kerina sijadi nandangi manusia. Icidahken arah bahan enda kerna kegeluhen perpulungen Efesus sieteh Dibata :
1. Ieteh Dibata kerna kai siidahikenna
2. Kuga latihna akapna erdahin
3. Kerna Kesabaren
4. La ngena ate man sijahat
5. Metenget, tahan uji
6. Megenggeng
Sienda kerina ipeseh man Efesus ibas perbahanenna simehuli, tapi sie kerina terjeng ingeten ngenca sebab genduari perpulungen e lanai bage bahkan enggo sebalikna. Perpulungen sindube ncidahken kiniersadaan bagepe kekelengen enggo berubah jadi batu antuken nandangi kalak sideban sincurnaken gelar Tuhan. Kekelengen nandangi Kristus enggo semu. Sienda kerina erbahanca Dibata arah kitab enda erlebuh man perpulungen e segelah mulihken bagi sigel-gel. Perpulungen e arus mulihken ku perubahen sipemena sedem alu keleng ate. Kata bertobat jadi bagin perubahen si arus lit ibas perpulungen e.
Iajuk perpulungen jadi simegiken kata Dibata seh jadi ka perubahen ibas dirina. Ibas sie icidahken Dibata kuasana maka ibas Ia nge banci idatken kemalemen ate bagepe kegeluhen si tuhu-tuhu. Ibas perayaken manusia ndatken kemalemen ate bagepe kegeluhen situhu-tuhu uluna eme ibas Dibata. Guna banci enda jadi baginta tentu arus kita tetap erkeleng ate man baNa alu cara ndalanken siiperentahkenNa bage pe mpedauh dirinta arah kai sienggoilarangNa.
Arah bahan enda perlu ka pe sirenungken kerna kekelengenta man Kristus ibas jaman genduari enda. Seh ija kita tetap setia man bana. Siakui nge ibas kegeluhen enda melala kejadin/peristiwa si la bagi ukurta si jadi. Litna erbage perbebeb nggeluh tentu erbahanca jadi erbage perubahen ibas dirinta. Sijadi penungkunen payo nge perubahen si lit e reh deherna kita ras Tuhan Dibatanta ? Payo nge kesusahen/kesuliten siinanami kita tetap reh tutusna ateta ersembah, ersada ras Dibata ? Adi payo bage tentu Puji Tuhan arus tetap sipertahanken. Tapi sebalikna adi lit kenca persoalen/perbeben minter kita nilah ibas kiniteken nari tentu sienda erbahanca lanai sidatken kai siipadankenNa eme kemalemen ras kegeluhen situhu-tuhu.
Mari dage sigejapken pengalamen kinitekenta ras Tuhan, jenari siuji ibas kegeluhenta. Adi sirenungken ibas lagu : Hitunglah berkat Tuhan maka Kita akan terheran... Sienda pe ngajari kita ngerenungken perbahanen Tuhan ibas kegeluhen ta situhuna seh kel malemna ateta. Jadi gia banci jadi erbage situasi sinihadapi kita lalaplah siinget kerna keleng ate Tuhan seh maka tetap erburak keleng ateta nandangi Ia.
Pdt.Alexander Simanungkalit
0 komentar:
Post a Comment