Monday 22 April 2013

Suplemen Bimbingen Pjj 21-27 April 2013, Mikha 4:1-4

Bahan   : Miha 4:1-4
Thema  : “Ikelengi-Na Kerina Jelma”
Tujun    :

  • Gelah ngawan perpulungen meteh maka kegeluhen ibas Tuhan mpeturah kedamen ras kemalemen ate
  • Gelah ngawan perpulungen nggeluh ibas perdamen

Miha 4:1-4

4:1 I bas wari-wari si reh pagi, deleng ingan Rumah Pertoton e pajek, e me deleng si meganjangna kal ganjangen asa kerina uruk-uruk. Bangsa-bangsa reh erdemuyung ku je,
4:2 janah nina bangsa-bangsa e, "Nangkenglah kita ku Deleng TUHAN ku Rumah Pertoton Dibata nu Israel. Kai ateNa sibahan, iajarkenNa me banta; arah dalan si enggo ipilihNa erdalan me kita. Sabap pengajaren TUHAN i Jerusalem nari kap rehna, i Sion nari, ngerana Ia."
4:3 Perjengilen sapih bangsa-bangsa idungiNa, subuk bangsa-bangsa si megegeh, si ndeher tah ndauh pe ia. E maka itepa kalak me pedangna jadi gigi tenggala, janah lembing jadi sabi-sabi ibahanna. Lanai ndigan pe bangsa erperang ras bangsa lanai ndigan pe taktik perang ipelajarina.
4:4 Kerina kalak nggeluh alu dame sekalak-sekalak kundul i teruh batang anggur ras batang arana jine; janah la ise pe erbahanca ia mbiar. TUHAN si Mada Kuasa enggo erpadan si enda.


Perlebe
Sada hal si perlu jadi perenungen man banta ibas jaman enda eme uga kita banci merubah paradigma perukurenta kerna situasi siterjadi ibas jaman enda eme membudayana “kekerasan”. Erbage informasi banci siidah ras sisaksiken entah pe maun pernah sialami kerna kekerasen siterjadi, perampasen hak ibas erti pemaksaan, krisis moralitas si terus terjadi rsd, si banci turah ras pe mpetrah sikap ernembeh ate, merawa, sikap erbalas, rsd. Hal sisederhana eme reh teridahna sikap saling curiga, seh pe tindaken propokasi terus terjadi. Ija nge kekelengen e...? Me kerina nge agama kususna ibas bangsanta enda ngajarken kekelengen ibas erti “damai” ?
Arah perenungen enda isadarken kita kerna damai e bagi “semu”, terjeng icakapken tapi kinatana la idalanken. Sepakat kita maka slogan “damai itu indah” seh kel ulina, tapi megati terjeng slogan saja tanpa isi (baca : ilakoken). Sikap ras perilaku sibagenda jadi erkiteken sempitna pengertin, kita siakap sipayona/pembenaren diri sidungna kita masuk kubas ranah nggeluh secara eksklusif alu membangun tembok pertahanan diri termasuk tembok “zona aman”. Dampakna banci si idah jelas maka kecenderungen “sesama manusia” pe kita “lanai sitandan” atau bahkan jadi “homo homini lipus”. Payo nge bage rencana Dibata nandangi kegeluhen manusia...? sipasti labo payo, sebab rancangen Dibata nandangi manusia eme simehuli. Perbedaan si lit ibas kegeluhen enda guna banci teridah kegeluhen sikeleng-kelengen ras sisampat-sampaten. Labo erndobahen manusia enda iadepen Dibata. Ise pe ia, kai pe agamana tetap nge Dibata e erkeleng ate sebab Dibatanta eme “Allah universal”.
Adi payo pengertinta manusia enda maka Dibata eme universal, maka arus ka pe siertiken maka Ia erkeleng ate man kerina manusia i pertibi enda. KekelengenNa enda labo banci sikotak-kotakken guna pembenaren dirinta seh siakap kita anak emas janah kalak sideban “anak tiri”. Pengertin sipayo kerna Dibata mahan bana kita ngergai kalak sideban, ngkelengi kalak sideban gia berbeda kita sada ras sidebanna. Membangun karakter perdamen arus imulai ibas pengertin maka Dibata e dem ibas dame. Ertina kita nehken kekelengen, ngelakoken perdamen labo jadi “terpaksa” tapi erkiteken eme salah sada identitasta selaku anak-anakNa.
Arah bahan PJJ Minggu enda i ingetken kita sekaligus maba perenungen simbages seh maka terjadi perubahen paradigma perukurenta ibas kita nggeluh itengah-tengah masyarakat si majemuk ras multikultural enda. Arah bahan enda pe iarapken perubahen guna masa depan generasinta itengah-tengah bangsa enda seh pagin jadi kegeluhen manusia si damai sejahtera.

Miha 4:1-4
Bahan enda eme nubuaten nabi Miha ibas pengertinna kerna : Kedamen si reh ibas kepemimpinen Dibata (Allah memerintah). Sienda ipeseh Miha ibas situasi si jadi paksa sie eme : krisis kepemimpinen (raja Jehuda) lanai ngikutken/ndalanken sura-sura Dibata, Pemimpin agama lanai nuduhken sipayo termasuk jadi alat merampas bagin rakyat, itambah beban simbelin ibas Asyur nari si memaksa Juda nggalari upeti. Ibas situasi si mberat enda me ipeseh Miha nubuaten pengharapenna kerna Juda, ija ipindokenna maka rakyat arus tetap setia kubas pengajaren Dibata labo mengandalken gegehna bagepe kalak sideban.
Pengajuk ras nubuaten Miha enda icidahken alu :
  1. Ketedehen jelma sinterem guna jumpa ras Tuhan ibas kemulianna (gambaren rumah pertoton = menggambarken kekuasaan/ kemahakuasaan Dibata) seh maka rehen bangsa-bangsa erdemuyung kuje. Kerehen bangsa enda nuduhken keyakinen sekaligus pengakun kerna Kuasa Dibata. Sienda pe nuduhken kerna pengakun maka Dibata ngenca simeganjangna.
  2. Perjumpaan ras Tuhan nuduhken maka lit erti kesetiaan sekaligus ikut ibas perintah/aturen si itetapkenNa. Pengakun kuasa Dibata ibuktiken alu ikut ibas dalan siituduhkenNa.
  3. Arah nubuaten Miha enda igambarken kerna perubahen kalak si ngakuken ras setia njadiken Dibata si muliana eme alu terjadina perubahen paradigma perukuren :
  • 1. Perjengilen idungina : jadi perdamen sebab kerina enggo ngidah kubas sada aturen si payo eme aturen Dibata.
  • 2. Perubahen alat-alat silit sindube jadi alat perang, alat menyakiti, alat membunuh salih jadi alat si fungsina guna ndalanken kegeluhen.Pengertin enda pe ncidahken man banta maka litna perukuren guna menyakiti, membunuh (unsur elem-elem) salih jadi rukur uga kegeluhen enda reh ulina.
  • 3. Adi ndube lit lalap kebiaren, saling curiga, memprotek diri rsd, sie salih maka lanai lit kebiaren sebab kerina banci terteki sada ras sidebanna, turah dame ras malem ate, saling memperlengkapi bagepe sikeleng-kelengen.
Arah nubuaten Miha enda iarapken jadi penjemba man banta ibas jaman enda “Menghadirkan kerajaan Allah” alu ncidahken kemulianNa e ibas kegeluhen enda eme ngidah maka kalak sideban siberbeda ras kita epe kekelengen Dibata kap seh maka ibas kita nggeluh berdampingen ras kepelbagaian suku agama, warna kulit tetap banci nggeluh dame ras sikeleng-kelengen.

Pdt.Alexander S


Artikel lain yang terkait:



0 komentar:

Post a Comment