Introitus :
Ola aloken uang sogok, sabab uang sogok erbahanca kalak lanai ngidah si benar, janah perkara kalak si la ersalah ibalikken (Keluaren 23:8).
Ogen : Matius 5:13-16; Khotbah : Masmur 127:1, Jeremia 29:7
Tema : "Keluarga GBKP Eme Bagin Ibas Bangsa Ras Negara"
Kata penaruh
Manusia e me makhluk sosial si membutuhken teman sebab hubungen ketergantungen saling membutuhken guna ndatken kemajunna. Tapi sijadi megati hubungen kerjasama melala jadi hanya ibas keuntungen sepihak. Melala pe jadi kalak nggeluh ngukurken kepentingenna saja, iakapna kai pe banci igegehina sisada, janah keberhasilenna erkiteken beluhna. Kerna si e me si jadi pembahasen ibas bahan Pekan Kelaurga wari-berngi si pepituken enda, eme ngerana kerna pentingna nggeluh ndahiken kiniulin kalak si deban sebab adi sejahtera ia kita pe ikut sejahtera.
Tafsiren ras pembahasen teks
Masmur 127:1
Pemasmur ngerana kerna ketergantungen manusia kempak campur tan Dibata ras kesia sian nggeluh, maka sia sia me adi rumah la bekas Tuhan mantekisa, sia sia pendahin Tukang si enggo ndahikenca. Sipeduaken adi kuta la ikawali Tuhan, sia sia me pengawal erjaga jaga. Ibas pengertin kata sia sia lit ije penyesalen ibas wari si reh, gegeh enggo ipekeri, dana ras waktu melala keri, ulih pendahin tukang enggo mehuli tapi adi la bekas pemasu masun Tuhan rumah si mejile e pe labo mbaba dame. Penjaga erjaga jaga, latih iakapna, igengkenna madat matana maun maun mungkin tertunduh pe ia. Tapi Dibata penjaga si la pernah madat matana, la tertunduh pe ia. Ibas jaman si nai negeri si itandai sebage bangsa si makmur usur jadi incaren bangsa bangsa si megegeh, la aman. Adi prajurit si erjaga jaga tentuna terbatas nge gegehna, labo seri ras pengkawali Dibata labo lit gegeh si belinen asa gegeh Dibata. Ancamen ancamen pe labo ergegeh. Tole nari adi Dibata hadir maka kerina jadi erguna ras meningkat kwalitasna.
Mari tertulih kita kerna peristiwa peperangen bangsa Filistin si iwakili Goliat ngelawan bangsa Israel si iwakili Daud. Ibas Bangsa Filistin nokoh nokohi Bangsa Israel, Daud ngidah maka labo Israel si itokohina tapi Dibata Israel nge si itokohina. Bagepe asum Daud erperang ngelawan Goliat, ia maju ku medan peperangen hanya salu senjata si sederhana, tapi situhuna senjata si paling utama Daud erperang salu gelar Tuhan ras ia naluken Goliat ras bangsa Filistin. Kai si jadi e ncidahken maka bansa labo berdiri sendii tapi lit kap Dibata sembahenna.
Jeremia 29:7
Situasi bangsa Israel asum berita enda i sehken, paksana itaban bangsa Babel ras Tuhan enggo netapken maka kenca seh masa pitu puluh tahun me maka terjadi pembebasen (ayat 10). Jeremia mpersingeti bangsa Israel ula tek nandangi pengajaren arah nubuaten ras nipi nipi ibas nabi nabi nari singataken pembuangen labo ndekah, seh me paksana Israel ibebasken. Arusna Israel ngangka ndekah gia masa pembuangen e tapi sura sura Dibata gelah Israel senang labo cilaka. Gelah Israel reh ras erlebuh man Dibata.
Ibas pembuangen e, sebagin bangsa Israel si ibas kelompok masyarakat si ekonomina sulit jadi budak bansa Babel. Tapi masyarakat Israel si ibas kelompok si terpandang ras bangsawan i negeri babel ia ndalani masa pengasingen, ija kebebasenna ibatasi ras ipedauh ibas kutana nari. Kata Jeremia e khususna ipesehna man kelompok masyarakat si terpandang e sebab aminna pe ia iasingken tapi mbue hal si banci ilakokenna, tapi nginget isu lanai bo ndekah masa pembuangen e, madin sinik saja (tidak usah berbuat).
Aminna pe Israel ibas pembuangen, sura sura Dibata maka bangsa Israel tetap mempertahankan ras meningkatken kuantitas ras kualitasna. Emaka Tuhan nuruh: "Pajekkenlah rumah, janah tetaplah kam ije (ula ukurken masa pembebasen, tapi i Babilon lah bahan ukurndu). Erjabulah kam dingen mupuslah. Pejabu ka anakndu maka ia pe mupus (ayat 6-7). Sura sura Dibata aminna israel tertaban arus tetap iperjuangkenna kegeluhen sinusurna eme " generasi si ngaloken janji Tuhan.
Guna kiniulin Israel arus maka ia erdahin guna kiniulin Bangsa Babel. Sabab sebage bangsa tabanen kiniulin Bangsa Babel me si nentuken kesejahteran Israel. Adi Israel makmur ibas negeri Babel maka cian me ate bangsa Babel seh maka isakitina me Israel. Tapi adi iperjuangken Israel kiniulin Babel ialokenna me Israel salu mehuli. Tole arah kata Jeremia e ngajarken lit kap kewajiben Israel (kalak sierkiniteken) nandangi kuta inganna tading, ia arus jadi pelayan nandangi kalak babel.
Pemberitan ras perenungena
Pernah ibegi kami ajar ibas nini nari nina "Adi ibas sada paksa kam tading ibas sada kuta, adi lit sura surandu nuan tebu tapi ibas kuta e langa lit anak kuta si nuan tebu, ajaklah anak kuta e pe ikut nuansa, bereken bibitna, ajari cara nuansa, gelah adi enggo pagi gedang ngawan tebundu e ula ibuat anak kuta sabab ibas anak kuta e pe lit nge tebuna. Tapi adi kam ngenca nuan tebu ibas kuta e labo aman, mengga kari ate anak kuta e ibuatna me kari tebundu e." Ajar e mpersingeti kita maka labo banci kita maju si sada, sabab ibas ndahiken kemajunta arus pe sidahiken kemajun kalak sideban.
Sebage contoh si la man usihen umpamana ibas sada daerah lingkungen si kumuh, lingkungen kalak si musil. Lit pe ije sekalak keluarga janah lit ka pe ije si bayak ibahanna rumahna si cukup megah ras mewah tapi demi keamanen ibahanna bidena erlapis ras meganjang, bide si arah daratna ibas gerbang ijaga satpam, bide si lapisen peduaken ijaga biang herder si galang ras merawa, ras ijah ije ipasngna cicii tv sebab mbiar ia i ganggu masyarakat ibas lingkungen e nari. Si bayak enda labo lit menjalin hubungen ras berinteraksi ras masyarakat, erkiteken si e turah cian ate ibas masyarakat nari, maun maun lit ka anak perana kuta si gutul ibenterna rumah si bayak e. Ibas sada paksa terjadi kepesengen ibas rumah si bayak e, tapi labo lit perhatin anak kuta guna namptisa. Bageme jadina man kalak si la medite man lingkungen inganna tading.
Ibas turi turin i lingkungen sideban situasi masyarakatna seri ras situasi masyarakat bagi idatas ndai , lit ka ije kalak si bayak si tuhu tuhu peduli man lingkungenna, isampatina masyarakat gelah maju, imotivasi ras imodalina, ibas paksa ibahanna usahana, iperdayakenna masyarakat sebage tenaga kerjana, seh maka tuhu tuhu ernanam kal man anak kuta kerna kehadiren si bayak e. Ulih perbahanen si bayak, ia ndatken keriahen, enterem kade kadena. Ibas kerina si jadi man bana anak kuta e tuhu tuhu mediate man bana.
Pemberitan e labo khusus man kalak si bayak, kami hanya menyinggung si bayak sebage contoh, tapi si imaksut kata si ipeseh ibasteks khotbahta enda uga kita labo jadi manusia si egois si hanya ngukurken bana, tapi sigejapken min tanggung jawabta memajukan kalak sideban. Labo kebetulen kita tading ibas lingkungen inganta tading e, tapi iutus Dibata kap kita guna ngelai ije. Adi enggo isehken persinget mediate man anak kuta gelah banci ngenanmi keriahen maka ibas setia ndalankenca ije me pasu pasu Dibata icur curkenNa.
Pdt. Ekwin W. Ginting
GBKP Sitelusada
0 komentar:
Post a Comment