Saturday 25 April 2015

Suplemen Bimbingen PJJ Tanggal 26 April - 02 Mei 2015, ogen Kejadin 41:53-57

Ogen : Kejadin 41:53-57
Tema : Ngerencanaken Perbeliten ras Masa Depan bas Jabu alu Payo

Tujun :
1. Gelah ngawan ni perpulungen ngasup ngaturken perbeliten jabuna alu payo
2. Gelah ngawan ni perpulungen ngerencanaken masa depan kegeluhen jabuna

Ise pe la meteh secara sempurna kuga pagi masa depanna. Saja selaku tinepa Dibata terlebih selaku kalak si erkiniteken lit jaminen masa depan simehuli adi erdahin alu tutus ras berhikmat ngaturken ulih pendahin alu tutus e. Akap kami masalah “berhikmat” ngaturken ulih pendahin enda la kalah pentingna adi ibandingken erkiniteken (mengandalken Tuhan) ras tutus erdahin. Enda itekanken kami erkiteken mbue jelma tutus kal atena erdahin rikut tutus ka atena ersembah man Dibata tapi kegeluhenna mulai kin paksa ia nguda she metua la naik kelas, adi ku juma kurumah kin pendahinna sedekah enda enggo pe metua bage ka denga, sabab adi la bage nakan pe la tertukur kai ka belanja ndahi kerja-kerja kade-kade selaku kalak karo. Bage pe adi ertoko/erbinaga kin ia lalap ngayak metuana bage la pensiun-pensiun latih lalap akapna, si ironisna mbue nge enggo ipepulungna ertana tapi enggo pe ia metua la lap denga lenga pensiun erkiteken ngukuri la nai terjeng ia ras anakna tape pe kempu-kempuna. Adi kuakap labo ndube lepak iban masa pensiunen man si erdahin ibas pemerintah bagepe ibas perusahan suasta. Lit batas umur erbintuas pepulung erta jenari pensiun guna menikmati kegeluhen alu dame, alu mbue ngelakoken kegiaten sosial, kegiaten gereja sabab erta si pepulung e labo pagi ibaba mate.

Ogenta ibas PJJ Minggu enda erpalasken Kejadin 41:53-57 naksiken uga Jusuf berhikmat ngaturken masa depan negeri Mesir. Adi sioge turi-turin enda, lit piga-piga hal si banci jadi renungen man banta, eme:
(1) Arah nipi raja Firaun e ngingetken kita maka bagi isingetken pe ibas kitab Pengerana maka kerina lit paksa-paksana (Pengerana 3), lit paksa riba-riba pangan ras lit paksa kelihen. Kerna si enda situhuna enggo alamiah, ibas paksa perudan sinuan-sunian turah alu mehuli mereken pangan man manusia, bagepe rubia-rubia ras kerina si enggeluh tercukupi panganna, rst, tapi ibas paksa perlego sinuan-sinuan pe kurang ulina peturahna bahken adi enggedang perlegona sinuan-sinian pe mate, kerina rubia-rubia pe kelihen erkiteken la cukup pangan.

(2) Arah kegeluhen Yusuf jadi motivasi man banta segelah tetap nggeluh ibas dalan Tuhan (erkemalangen man Tuhan) anem gia erbage-bage si la bagi ukur banci jadi ibas perdalinen geluhta. Bagi Yusuf erbage-bage kiniseran ibentasina tapi tetap ia nggeluh ibas dalan Tuhan. Kiniseran e adi siukuri secara manusia la nai tanggung beratna, bayangken seninanta ndayaken kita, tapi la e erbahansa Yusuf terjebak ku bas balas dendam sabab adi bage labo maler pasu-pasu Tuhan ibas geluhna, bagepe ia ifitnah she maka ipenjaraken, tapi e pe la erbahansa ia nalahken Tuhan si isembahna sebalikna tek Jusuf maka lit rencana Dibata arah kiniseran sinialamina e (oge Kejadin 50:20, bd. Roma 8:28).

(3) Yusuf sekalak Ibrani, statusna budak I Mesir, mantan narapidana banci ndatken kepercayan raja Firaun jadi nomor dua si erkuasa I Mesir. Engkai maka bage? Saba Dibata nemani ia. Arah enda nuduhken amin gia “minoritas” tapi labo berarti la lit kesempaten jadi kalak si erkuasa/penting itengah-tengah “mayoritas”. Adi tetap tutus ernalem man Dibata ras berintegritas igenapi nge Ulangen 28:13-14 “TUHAN akan mengangkat engkau menjadi kepala dan bukan menjadi ekor, engkau akan tetap naik dan bukan turun, apabila engkau mendengarkan perintah TUHAN, Allahmu, yang kusampaikan pada hari ini kaulakukan dengan setia, dan apabila engkau tidak menyimpang ke kanan atau ke kiri dari segala perintah yang kuberikan kepadamu pada hari ini, dengan mengikuti allah lain dan beribadah kepadanya”.

(4) Amin gia Yusuf enggo erkuasa tetap nge Yusuf erdahin alu tutus makeken kepentaren/hikmat si ibere Dibata eme alu makeken kesempaten pepulung ulih juma si pitu tahun paksa mehumur e ntah pe paksa riba-iba pangan e segelah paksa kelihen pitu tahun lit nakan I negeri Mesir. Arah sienda kita pe I ajuk segelah ibas kesempaten banci denga erdahin, erdahinlah alu tutus, jenari berhikmat/pintar mensikapi kecibal kegeluhenta paksa genduari ras paksa si reh alu realistis, alu erbahan perencanan si mehuli. Uga kegeluhenta paksa enda. Adi sangana paksa erkelebihen ula erpoya-poya (ula boros), ula pejanjang sura-sura/keingenen ibas nukur keperlun nggeluh tapi kebutuhenlah siban palasna, lenga bo siteh sicara pasti kai pagi jadi paksa sireh, banci jadi musim kelihen emaka berhemat ras menabung jadi kunci mengantisipasi masa depan. Jenari adi sangana rembang masa sulit ibas pendahin, ibas usaha she maka ngelitken keperlun si tep-tep wari pe susah ula jungut-jungut, tetaplah tutus erdahin, tetaplah berintegritas, adi arus kin ngutang, ngutanglah alu bujur, adi enggo ijanjiken paksana sigalar galarlah, adi e pe lenga tergalar jujurlah, ngatalah man perutangenta ope she tanggalna utang e igalar, ula erkiteken lenga tergalar ibas paksana lanai kita pang jumpa rassa, lanai pang ku gereja pe sebab mbiar jumpa kari igereja. Terlebih man kalak simehuli si enggit mereken perutangen pe la “bicok” (lanai nggit mereken utang) perbahanen si minjam e la bujur. Ula siban maka tangkel istilah enda: “sada kiniteken tapi la siteken”.

Mbue banci dat kita kepintaren arah ogenta enda. Si jelas kai pe si rencanaken kita guna kiniulin masadepan jabu ula penalem gegeh ras kepintarenta saja, tapi gegeh ras kepintaren Dibata sebab alu bage adi kune la bagi siirencanaken kita jadi, la mis putus asa ntah jadi perubaten ibas jabu. Inget uga perdalinen kegeluhen si Yusuf si mbue jumpa la bagi ukur tapi kedungenna sukses ia ibas ngerencanaken masadepan negeri Mesir alu mehuli she maka paksa kelihen 7 tahun negeri e la saja pulah ibas kiniseran kelihen tapi pe mbue bangsa iselamatken ibas paksa 7 tahun kelihen si mesangat e.

Diskusi (Bagi si enggo iban ibas Bimbingen PJJ GBKP)
  1. Arah pengogenta ndai, turiken uga maka Yusuf ngasup ngaturken negeri Mesir ibas paksa kelihen 7 tahun?
  2. Perlu nge siakap perlu arih-arih ibas ngaturken perbeliten ras masa depan jabunta? Turiken dingen bereken alasenta!
 Pdt. S. Brahmana


Artikel lain yang terkait:



0 komentar:

Post a Comment