Khotbah - Renungan Kebaktian Minggu tgl. 3 Mei 2020, 1 Tawarikh (Kronika) 16:31-36

Invocatio:

Ersuraklah man TUHAN, o doni kerina, ersuraklah dingen rendelah perban riahna
(Masmur 98:4).

Ogen: Efesus 5:15-21; Khotbah: 1 Kronika/Tawarikh 16:31-36

THEMA:

ERSURAH MERIAHLAH I ADEP-ADEPEN TUHAN/

BERSORAH SORAILAH DI HADAPAN TUHAN

Ersurak meriahlah iadep-adepen Tuhan, enda me tema khotbah ibas Minggu enda. Sada tema si si ngingetken gelah kerina akak-anak Tuhan ersurah meriahlah I adep-adepen Tuhan. Saja ngenca relevan nge tema enda itengah-tengah keadanta genduari? Lit kalak singatakenca “adi sikaplah sekerajangenta banci kin kita tawa”  nina. Ertina adi bagi ukurlah sijadi, kerina nge jelma banci ermeriah ukur, tapi adi sebalikna labo. Enda me secara umum si teridah ibas kegeluhen manusia.

Emaka ibas minggu enda mulihi iuji penandaita kerna Dibata. Penandaita Dibata e tentuna mempengaruhi carata rukur, carata menyikapi kerina situasi siterjadi ibas geluhta, bagepe carata bertindak. Alu kata sideban penandaita Dibata mempengaruhi maindsetta kerna kegeluhen enda. Lit lagu “tersempul naken mbergeh. Kai nge sababna? Bagepe lit ka bagin syair lagu “ikan kepala batu, cina dua-dua, enggo naman rending lembu”. Banci kin? Secara pisik tentu lang. tapi penggejapen banci. Engkai? Sabab nina seterusna syair lagu e “adi ras kita manca”, enda banci erkiteken penggejapen ras suasana pusuh.

Mari siperdiateken tokoh ibas Alkitab, misalna Paulus. Engkai maka banci tetap lit keriahen ukur ibas ia amin gia ia ipenjaraken? Bahken ibas telu kali ia ertoto gelah pinakitna madan ternyata lang, e pe ngasup ia ngalokenca bahken ngasup ia ngataken bujur ibas pinakitna la madan. Engkai? Banci sioge ibas 2 Korinti 12:1-10.

Nats si jadi khotbah Minggu enda, 1 Kronika 16:31-36 eme bagin ende-enden pujin Daud man Dibata waktu maba Peti Perpadanen (Tabut Perjanjin) ku Yerusalem. Tabut Perjanjin ipahami bangsa Israel eme  tanda keleng ate Tuhan, bagepe tanda kehadiren Dibata itengah-tengah bangsaNa. Eme sababna Daud ngendeken-enden-enden pujin man Dibata. Isi puji-pujin e eme maka Dibata eme raja I babo kerina bangsa bagepe doni enda. La lit si la iteruh kuasaNa. Ia me Dibata si setia, keleng ateNa tetap rasa lalap. La e saja, bahken Dibata e eme Dibata si megiken pertoton bangsana, pertoton kalak sitek man bana (ayat 35). Ibas bagin pengogen Minggu tgl. 26 April 2020 eme Bilangen 14:17-19 ije ituriken uga Musa mindo gelah Dibata ngalemi salah dosa bangsaNa, janah adi iterusken si oge Bilangen 14:20 ije ituriken maka Dibata megiken pertoton Musa, padahal ibas ayat 11-12 ije enggo Dibata ngerana man Musa “maka la banci lang itamaken Dibata sada pinakit gelah kernep ia…… Bagem gambaren Dibatata, maka Ia setia kap, begikenna nge pertotonta.

Jadi eme alasen Daud engkai maka iajukna bangsana gelah ersurak meriah iadap-adepen Tuhan, ras tetap ngataken bujur, tentuna labo ibas paksa bagi ukur saja tapi ibas kerina keadan, sabab Dibata e eme Dibata I babo kerina sinasa lit. Permasalahen si ijumpai ibas kegeluhen, la ngurangi semangatta nehken pujian-pujinta bagepe pengataken bujurta man Dibata. Pengalamen geluh Daud ibas tek man Dibata tentu labo kerina mulus-mulus saja, mbue nge ijumpaina la bagi ukur, misalna pernah ibunuh mamana atena ia, tapi kerina si e la erbahansa Daud nundalken Dibata, la e erbahansa Daud la nai muji-muji Dibata ras ngataken bujur. Salah sada sinilakoken Daud selaku respons pengataken bujur man Dibata eme upaya maba Peti Perpadanen ku Yerusalem ibu kota kerajanna. Eme si ilakoken Paulus pe, ibas pengogen Efesus 5:15-21, khususna ayat 20, “Katawari pe katakenlah bujur man Dibata Bapa subuk kerna kai pe, i bas gelar Tuhanta Jesus Kristus”. Bagepe ibas 1 Tesalonika 5:18 nina “… katakenlah bujur man Dibata I bas si kugapana pe….Tentu hal enda sendalanen ras temata: “Ersurak meriahlah I adep-adepen Tuhan”.  Payo kalak sierkiniteken layak mensyukuri kinitekenna man Yesus Kristus lebih asa kai pe, sabab kita enggo itebusina ibas kuasa kematen sirasalalap nari. Suasana penggejapen si bage pasti erbahansa tiap wari kita ngataken bujur, tiap wari kita ersurak meriah iadep-adepen Dibata lanai ibatasi keadan. Bagi syair lagu “La lit dua” e: ikan kepala batu, cina dua-dua enggo nanam rendang lembu.

Dage mari, amin gia keadanta genduari sanga jaman virus corona, tetaplah kita muji-muji Dibata ras ngataken bujur. Tek kita eme singena ate Dibata, janah pasu-pasuna nge kita arah mulahi bangsanta, mulahi kita ibas kerina keadan si atena meneken kita. Amin.

Artikel lain yang terkait: