Bahan : Pilipi 4:10-13
Thema : “Pentar Ibas Ngaturken Perbeliten Jabu”
Tujun :
- Gelah ngawan perpulungen ngasup ermeriah ukur ibas kerina kecibal geluhna
- Gelah ngawan perpulungen pentar/bijaksana ibas ngaturken perbeliten jabu
Erbage cara ibahan manusia ibas kegeluhenna segelah banci malem atena. Lit pe pengakap maka adi melala duit/ertanta maka enggo malem me ate. Kinatana melala kange siidah melala gia duitna lalap denga nge akapna susah ibas kegeluhen enda. Ibas upaya ndatken bagi sinisuraken e (duit) si melala erbage cara ilakoken manusia. Lit arah pendahinna sipayo, lit kange ersura-sura melala ndatken duit alu cara instant seh maka ngerugiken kalak sideban pe maun la siakap dalih segelah banci sidatken sura-suranta.
Adi siertiken kerna materi/duit, payo nge enda siidarami manusia ias kegeluhenna, perlu kange sirenungken maka duit/materi enda pe pemere Tuhan man banta anakNa. Tentu pemere Tuhan enda pelain-lain nge sada ras sidebanna. Gia bage iarapken segelah kitape jadi kalak pentar singaturken kerna pemere Tuhan e alu banci kape kita mperdiateken kalak sideban. Sebab kalak pentar ibas Tuhan kerna ngaturken perbeliten jabuna labo lalap ipakena tambah-tambah (+) ras kali-kali (x) saja tapi pe arus lit pe ilmu bagi-bagi (:) ibassa. Secara Teologi arus ngenda siimani maka kai silit ibas kita pemere Dibata janah la terjeng e jadi sikerajangenta saja sebab lit ije bagin Dibata ras pe bagin kalak sideban.
Pilipi 4:10-13
Surat Paulus man perpulungen Pilipi enda ituliskenna asum ia ibas penjara. Igejapken Paulus kerna keleng ate perpulungen Pilipi ibas banci perpulungen enda nampati ia ibas kesusahenna. Pengakun Paulus maka enda banci jadi erkiteken persadan ras Kristus seh maka banci sepenggejapen ibas ngenanami kiniseran. Pengataken bujur Paulus icidahkenna alu ungkapen tetap ermeriah ukur. Kinitekenna ncidahken pengakunna kerna kecukupen siibereken Dibata seh maka kai pe situasi sinihadapina : cukup entah kurang tetap ermeriah ukur. Janah isimpulkenna maka kengasupenna ngalaken sie kerina erkiteken kekelengen Kristus siicidahken kuasaNa.
Sijadi penekanen ibas nats enda ihubungken ras bahan PJJ minggu enda eme kerna management keuangen/perduiten silit ibas Perpulungen Pilipi bagepe Paulus. Tentu adi arah Paulus kita erlajar teridah maka kerna keadaan perbeliten litnge keterbatasen ibas ia apalagi masa sie ia ibas penjara. Tapi gia ibas situasi si sulit tetap ia ngasup ermeriah ukur ibas geluhna. Sienda pe jadi pelajaren man banta i bas ngaturken perbeliten ibas jabu : asakai pe situhuna bias/cukup nge sebab asakai ka pe banci kange lalap kurang, tergantung uga kita ngaturkensa. Paulus ibas situasi siihadapina ialakaenna kerina e alu meriah ukur. Jabunta pe siaturken ka lah guna tetap ngasup ermeriah ukur gia erbage situasi kerna perbeliten khususna langa bagi ukurta.
Arah perpulungen Pilipi banci siidah kerna kiniersadaan perpulungen ibas nehken penampat man Paulus. Labo ban buena silit ibas ia tapi ibas keterbatasen pe banci ia nehken peampat. Sie kerina pe ncidahken kerna keberadaan kiniteken perpulungen enda.
Adi siukuri jamanta gundari rusuren kita mengeluh kerna keberadaan ekonomi ibas jabunta. Lalap nge siakap kurang ibas kecibalta. Labo min enda jadi persoalen adi ibas kita erbintuas ncari tetap ka banci siaturken bagin-baginna. (waktu) : lit waktu erdahin, lit ka waktu istirahat, lit ka waktu mpermuliaken Dibata (waktu Tuhan). Ibas ngaturken enda alu payo tentu jadi keuntungen man banta minimal untuk masa depanta bagepe generasinta (anak-anakta), sebab ulihna maba keriahen man banta.
Megati sipaksaken dirinta ngayak-ngayak siman tadingenken e, lupa kita istirahat, lupa kita Dibata : ulihna Rumah sakit bagepe dem ibas kinilatenangen bagep dabuhna kubas dosa. Siniarapken eme kita jadi kalak pentar ibas mengelola kai siibereken Dibata man banta, mulai ibas proses kita ndatkensa seh pe kenca sialoken ulih pendahinta e.
Tupung banci kita nampati sada bagin kerna keriahen enggo jadi baginta. Sebab payo nge siakap ulin mere asangken mindo. Kai banci sibereken adi ibas kita pe labo lit tentu jadi si metahat. Emaka proses erdahin jadi bagin kegeluhen nandangi kalak sierkiniteke man Dibata.
Ibas bagin pengelolaan arus ngenda pe kita jadi kalak si berhikmat. Kecenderungen nggeluh materialis, konsumtif bahkan hanya guna ngejar prestise jadi tantangen ibas perkembangen jaman enda. Perlu kita nerapken kegeluhen sederhana seh banci tetap malem ateta.
Paulus ngajari kita arah suratna guna ncukupken kai silit ibas kita. Tapi sienda labo maksudna enggo banci man enggo, sebab kita arus jadi kalak pentar ngaturken pemere Tuhan subuk guna dirinta bagepe masa depan generasinta (anak-anakta). Erbage kebutuhen ibas jaman enda, reh tambahna reh dekahna. Siniarapken maka kita labo nggeluh ikut-ikuten sebab kita arus lit perencanaan guna kiniulin kegeluhenta. Mpersiapken masa depan jabu tentu mahan bana kita jadi kalak sipentar. Sieteh apai kebutuhen pokok, sekunder entah tertier. Segelah ula ka matanta jadi penggurunta, kepuasenta ateta sibaba : ingetlah labo pernah erbias-bias siakap ibas kegeluhen enda, sipasti ula ka “lebih besar pasak dari pada tiang”.
Erkira kita kerna kegeluhenta : piga dekah nari.... anak-anakta....uga masa depanna (persekolahenna). Sie kerina arus kita pentar. Pentar berarti mpergunaken kesempaten alu payo. Tupung banci denga kita erbintuas, megegeh siperjuangken sie kerina, sebab lit ka paksana kita lanai ngasup erbintuas. Ibas sie kerina ula pernah lupaken Dibata ulu kerina termasuk rejeki, jadi ibas kita erdahin lalap nge sitotoken janah sidahiken ka totonta e.
Pdt.Alexander Simanungkalit
0 komentar:
Post a Comment