Introitus :
Labo lit keleng ate si belinen asangken keleng ate kalak si nggit ngasamken kesahna guna teman-temanna (Yohanes 15:13).
Ogen : Yohanes 10:1-5; Khotbah : 1 Petrus 2:9-10
Thema : Jabu Si Ngelai
Adi sioge mulai ayat 1 nari ibas 1 Petrus pasal 2 ije ituriken lit 2 tujun kalak Kristen iselamatken. Sipemena, gelah kita banci jadi alat ibas tan Tuhan majekken gerejaNa. Sipeduaken, gelah kita jadi pasu-pasu man doni enda. Duana tugas enda sendalanen.
Guna nerangken duana tugas enda, isehken Petrus dua ilustrasi. Sipemena, Batu si nggeluh (ayat 5). Batu si nggeluh nuduhken tugas kalak Kristen guna majekken kula Kristus eme GerejaNa. Bagi isingetken ibas ayat 6 Bd. Efesus 2:20 ikataken maka Yesus Kristus enggo jadi batu penjuru/batu simeherga nandangi bangunen “rumah rohani” bageme harusna setiap anak-anak Tuhan jadi batu-batu singgeluh guna mbangunsa. Istilah imam-imam raja (imamat rajani) ibas ayat 9 nuduhken fungsi imam eme jembaten/kelang-kelang manusia ras Tuhan. Sienda berarti setiap anak-anak Tuhan erfungsi jadi imam nandangi sesamana ras jadi alat man kalak si lenga tek gelah nandai Tuhan Yesus. Sipeduken, ilustrasi bangsa sekerajangen Dibata (Bangsa Kudus) ncidahken tugas kalak kristen si peduaken. Istilah “Bangsa Kudus” ibuat ibas PL ras nuduh ku kalak Israel si enggo ipilih Tuhan jadi bangsa si ikususkenNa (Keluaren 19:6). Tujunna eme segelah kalak Israel jadi teladan sada bangsa si enggeluh ngikutken Kata Dibata/Firman Tuhan, jenari sekaligus jadi saluren berkat man bangsa sideban gelah bangsa sideban pe nandai Tuhan si tuhu-tuhu.
Kita kerina selaku kalak si enggo tek nandangi Tuhan Yesus, kita me bangsa Israel rohani si enggo ikhususken Tuhan guna jadi pasu-pasu man doni enda. Kita idilo guna jadi saksi singgeluh badia ibas persadan imam-imam raja (tugas sipemena), ras guna mbaba kalak silenga tek gelah jumpa ras Tuhan Yesus ras ngaloken keselamaten (tugas sipeduaken).
Themata ibas Pekan Keluarga sip e 5 enda, “Jabu Singelai”/Keluarga yang melayani. Palas pendilo man banta guna ngelai enggo jelas. Sipemena, ibas introitus Yohanes 15”13 “Labo lit keleng ate si belinen asangken keleng ate kalak si nggit ngasamken kesahna guna teman-temanna”. Ayat enda situhuna lenga terjadi ibas konteks ayat enda tapi bakal igenapi ija Yesus mate guna nebusi dosa manusia, janah arah ayat enda ate Yesus segelah kai si ikatakenNa sebelumna eme ibas ayat 12 ilakoken ajar-ajarna, bagepe man banta selaku kalak si ngaku tek man Yesus ibas paksa sigenduari. “Enda me pedahKu: Sikeleng-kelengen min kam bagi Aku engkelengi kam”. (Ende-enden: mengasihi-mengasihi lebih sungguh, melayani-melayani lebih sunggun. Tuhan lebih dulu melayani kepadaku, melayani-melayani lebih sungguh). Janah ibas Yohanes 15:14, iban Yesus ukurenna “Kam teman-temanKu adi idalankenndu kai si Kupedahken man bandu”. Berarti si la ndalanken pendilo sikeleng-kelengen e, labo teman-teman Yesus, berarti la ngaloken penebusen, la ngaloken keselamaten. Kerna sienda banci pe sibandingken ras ogenta Yohanes 10:1-5, ije itekanken, Yesus me permakan situhu-tuhu, itandaina biri-biriNa ras biri-biri ngikutken Ia. Ijendape isingetken ukuren payo ntah lang kita biri-biri Tuhan Yesus. Ukurenna eme siikutken Ia ntah lang, sidalanken perintahNa ntah lang. Bagepe nerpalasken 1 Petrus 2:10, adi payo kita enggo ngaloken perkuah ate Dibata pati kita ergiah-giah meritaken ntah pe naksiken perbahanen-berbahanen Dibata si mbelin.
Sipeduaken, sue ras nas khotbah 1 Petrus 2:9-10. Ayat 9 “Kita kap imam-imam raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin”. Kai kin perbahanen-perbahanen Dibata si mbelin? Tentu mbue, saja sue ras themata kita iarahken kubas perbahanen Dibata sireh ku doni enda labo guna ielai tapi ngelai/melayani (Bd.Matius 20:28, Markus 10:45). Hal enda tuhu sada hal luar biasa. Bisana si ngelai eme budak/hamba, suruh-suruhen. Tapi Dibata memposisiken dirina selaku hamba/suruh-suruhen ngelai labo ielai, guna kai? Sipemena, segelah kita terkelin ibas kita enggo I elaiNa, eme mereken kesahna mate I kayu persilang nebusi salah dosanta. Sipeduaken, gelah kai sibanna e jadi usihenta. Ia Dibata ipersilahangna dirina ngelai kita, emaka kita, kita taneh dah enda (Ayub 10:9), mantan kalak siperdosa enda arusna mejingkat saling ngelai labo erlumba segelah ielai.
Ngerana kerna Jabu si Ngelai, tentuna perlebe itengah-tengah jabu. Bapa nande, anak-anak saling ngelai ibas porsina. Ibas ngelai enda labo soal metunggung ia ielai ntah lang, tapi kita ngelai erpalasken keselamaten si enggo ialoken kita arah pengelai Tuhan Yesus, bagepe usihen si enggo iban Tuhan Yesus. Inget kita lengabo seh mate ituntut guna ngelai. Jenari seterusna ngelai kalak si lit isekelewetta. Engkai maka mbue tantangen ibas kita ergereja, terlebih membangun gereja itengah-tengah simayoritas la kalak Kristen? Adi kuakap salah sada eme erkiteken lenga secara optimal silakoken pendilonta guna ngelai. Kecendrungen manusia eme ielai, pasti meriah ukur tetanggata, sekelewetta adi kita, baik secara pribadi, jabu, bagepe gereja ngelai. Inget bagekin tugasta selaku kalak sitek, selaku gereja eme ngelai. Kecuali labo kita tuhu-tuhu kalak sitek.
Ulihna man banta, man jabunta pe luar biasa. Adi itengah jabu saling ngelai pasti jabu e jabu si harmonis. Banci sibayangken, mulih kita erdahin ndeharanta ngalo-ngalo alu senyum pepsoden, jenari mis nina enda mama bayang menemken, ntah uga mama tigan minem kopi lebe kam ntah mis ridi, rsd. Bagepe adi sieteh ndeharata latih akapna miska sisampati ndahiken ndahin singasup kita ndahikenca ibas jabu, bagepe anak-anak. Melayani orang tua labo berarti kita jadi suruh-suruhen orang tua, tapi kai nasehat orang tua silakoken e pe enggo melayani orang tua. Tambah si e secara teologisna adi sidalanken singena ate Dibata maka simper pasu-pasuNa isehkenna man banta, ras ku tengah-tengah jabunta (Bd.Matius 6:33).
Jadi bagem, mari sijadiken jabunta jabu si ngelai. Amin.
Pdt.S.Brahmana
0 komentar:
Post a Comment