Introitus :
La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi (Roma 1:16).
Ogen : Yohanes 21:15-19; Khotbah : Perb.Rasul 17:16-28
Thema : Jabu si Erberita Simeriah
Ibas wari si peduaken enggo kita ngerana kerna “Jabu eme Gereja”. Alu pemahamen e, maka ibas jabu leket pe pendilo Tritugas Panggilen Gereja, ija salah sada eme “marturia” (ersaksi/erberita simeriah). Ibas wari pe 7 ken, eme wari pendungi Pekan Keluarga tahun enda tole kita ipersingeti segelah silakoken ntah pe sitingkatken pendilonta selaku jabu, jabu si erberita simeriah.
Selaku jabu, enggo me sidahiken pendilo enda? Jabu si erberita simeriah tentuna perlebe itengah jabu e sendiri. Komponen isi jabu e saling erberita simeriah. Perbulangen erberita simeriah nandangi ndehara bagepe sebalikna. Jenari orang tua erberita simeriah nandangi anak, bagepe sebalikna, jenari kempak tetangga ras kerina jelma si ijumpaina.
Kai kin si iberitaken? Penungkunen enda penting sabab banci kari ningen erberita simeriah tapi labo siteh kai siman beritanken. Ngerana kerna erberita simeriah eme ngerana kerna keselamaten ibas Yesus Kristus ras keselamaten e “enggo ialoken” erdandanken tek kita man Tuhan Yesus, labo erkiteken metunggung kita ngalokenca perbahan kita kalak mehuli, lang, sabab kerina manusia enggo erdosa janah upah dosa eme kematen, tapi erdandanken perkuah ateNa saja nge (Bd. Roma 3:12, 23; Roma 6:23; Efesus 2:8-9). Kerna keselamaten enda me siberitaken/sisaksiken baik arah perbahanen eme buah keselamaten bagepe arah nuriken kai si enggo sialami kita kenca enggo sialoken keselamaten e; uga kita enggo jera janah uga siakap riahna nggeluh kenca enggo sialoken berita simeriah e jenari ngajuksa segelah kalak sideban pe ngaloken kegeluhen sibage. Alu bage, adi setiap jabu erberita simeriah ibas jabu, tetangga, ras kerina jelma si ijumpaina tek kita doni enda reh terangna labo sebalikna reh gelapna. Ertina lanai erbuena kejahaten ntahpe perbahanen-perbahanen si peturah la lit dame, la lit keriahen ras kemalemen ate. Silang-langna jabu-jabu kalak Kristen jadi terang itengah-tengah doni enda.
Payo erberita simeriah itengah-tengah doni enda labo mesunah, secara jujur sigejapken nge reh buena tantangen. Emaka turah me godan eme nggeluh tanpa tantangen. Si lebih parah, erkiteken mbiar ngalaken tantangen sibakal ihadapi, termasuk tandangen mela, sungkan, rsd, kita milih sinik ras la nai erberita simeriah. Ntahpe ninta erberita simeriah nge aku arah kesaksian nggeluhku, perbahanenku. Penungkunen eme kegeluhen si uga enggo sisaksiken?, perbahanen siuga enggo si cidahken?.
Kerina kita, tentu ateta jabuta e jabu si erberita simeriah. Sabab kalak si enggo tuhu-tuhu ngaloken berita simeriah, meriah pe akapna erberita simeriah. Emaka mari kita erlajar arah Kata Dibata ibas kebaktian Pekan Keluarga wari si VII enda. Sipemena Introitus, Roma 1:16 “La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi”. Ibas ayat enda, lit je rahasia si ibuka Paulus eme “Berita Simeriah e kap Kuasa Dibata guna nelamatken kerina kalak si tek man Yesus. Enda ngataken uga pentingna tugas ntah pe pendilo erberita simeriah segelah kalak sideban pe ngaloken keselamaten arah tek man Yesus. Inget, maka keselamaten labo man bangsa tertentu saja, ntah pe suku tertentu saja tapi man kerina jelma. Kai sikataken Paulus enda labo sekedar retorika tapi ilakokenna ibas geluhna. Ibas Perhahanen Rasul 17:16-28 bahan khotbahta ije ituriken erkiteken melala idah Paulus patung-patung I kuta Aten, berarti kute e dem alu penyembahen berhala emaka nembeh kal ate Paulus. Ibas Alkitab Terjemahen Indonesia kata “Nembeh” ibanna “sedih”. Emaka iberitaken Paulus berita simeriah. Ibas ayat 17b “… tep-tep wari ngerana ia I tiga ras kalak simentas, si nggit megiken ia. Ijenda teridah uga semangat Paulus meritaken berita simeriah, la ia mela, la ia mbiar tapi usur-usurna nge erberita simeriah e man kalak Aten. Tentuna labo asal la mbiar ntah mela, tapi pe alu kecerdiken. Alu kata sideban labo asal iberitaken, tapi idaramina cara ntah dalin sitepat nuriken berita simeriah (22-23). Kai nge sierbahanca maka bage tutusna, semangatna Paulus erberita simeriah? Adi sigargari surat-surat Paulus ije situhuna enggo iturikenna, antara lain:
- Perasan mekuah man kalak silenga nandai Kristus (Perb.Rasul 17:16-28). Perasan “nembeh” (sedih) isikapi Paulus alu tutus, la mela, la mbiar meritaken berita simeriah man kalak Aten.
- Perasan rutang (Roma 1:14-15). Perasan rutang enda mbelin kal ibas Paulus. Labo ia rutang man ise pe, tapi ibanna ia merasa rutang ntah pe erkewajipen meritaken berita si meriah erkiteken keselamaten si enggo ialokenna ras bagepe erkiteken ia enggo idilo jadi rasul man Jahudi ntah la jahudi, Kalak si enggo maju ntah kolot, erpemeteh ntah la erpemeteh, bagepe man kalak si lenga tek bagepe si enggo tek.
- Pengutusen Kristus. Jenari ipahami Paulus pe maka ia erberita simeriah erkiteken pengutusen Kristus. Emaka nina sada kearusen man bangku, janah e sada tanggung jawab si iendesken Dibata (1 Korinti 9:17).
- Dorongen keleng ate Kristus bagepe keleng ate man Yesus. Ibas Roma 5:8 bage pe ibas 2 Korinti 5:15 jelas kal ikataken Paulus kai sababna maka ia erberita simeriah eme dorongen keleng ate Kristus bagepe keleng ate man Kristus. Keleng ate Kristus e isikapi alu nggeluh lanai nggeluh erbana-bana, tapi guna Tuhan, guna meritaken berita simeriah (bd. Filipi 1:21-25). Tambah si e erpalasken ogenta, Yohanes 21:15-19 nina Yesus man Petrus “keleng kin atendu aku……?” Keleng ateta man Yesus arusna teridah kubas tindaken nyata eme ngelakoken kai siiperintahken Tuhan.
Begem ibas Pekan Keluarga si terakhir enda, mari sipeturah ibas jabuta selaku gereja ergiah-giah erberita simeriah. Terlebih itengah-tengah kondisi masyarakatta ibas paksa enda, ija teridah labo reh urakna kejahaten, pinakit social, terlebih I taneh Karo, kuta kemulihenta ija reh marakna judi, narkoba, seks bebas, bagepe pinakit HIV/AIDS, gara min pernembehta (sedih) ibas pusuhta bagi Paulus nandangi penduduk kuta Aten si nembah berhala, alu bage ergiah-giah kita baik secara pribadi, bagepe jabu erberita si meriah.
Pdt.S.Brahmana
0 komentar:
Post a Comment