Monday 19 May 2014

Renungan / Khotbah 1 Timotius 4:12-15, Pekan Keluarga Wari III (Sipeteluken), 3 Juni 2014

Introitus : 
Jusup pe berkat i kuta Nasaret i Galilea nari ku kuta Betlehem i daerah Judea, kuta ketubuhen Raja Daud; sabab Jusup kesusuren Daud kap (Lukas 2:4)

Ogen : I Samuel 3:1-10, 19; Khotbah : I Timotius 4:12-15

Tema : "Anak (KAKR, PERMATA) Si Erkualitas"

Senina – turang kekelengen Tuhan,
Anak eme “permata kegeluhen”. Kerina si njabuken bana pasti ersura-sura gelah banci ndatken pemere Dibata si mbelin enda. Banci jadi enterem kita jumpa keluarga-keluarga si enggo erjabu piga-piga paksa dekahna, tapi lenga denga ndatken “anak”. Teridah maka “kai pe” icubakenna ilakokenna seh gelah banci ndatken pupus. Mulai ibas periksa kesehaten, erbahan “bayi tabung”, ngadopsi anak sebage “pancingen”. Krina si enda eme gelah kegeluhen kalak si erjabu e jadi “sempurna”.

Emaka adi lit kenca si begi berita, ntah si idah maka lit orang tua si la ngkelengi anakna tapi isiksana anakna maka minter kal “panas” ras “nembeh ateta” nandangi orang tua sib age tempasna. Entah kai deba komentar si ndaraten ibas kita nari. End ape nuduhken maka kehadiren anak I tengah-tengah jabu tuhu-tuhu jadi pengarapen si mbelin.

Senina – ras turang si ikelengi Tuhan,
Berngi enda ateta ngerana kerna kegeluhen anak ras uga ka sura-suranta kerna kegeluhen anak enda. Arah bagin ogen icidahken man banta uga Samuel “ngaloken” pendilo ibas Tuhan nari. Telu kali Tuhan erdilo man bana, janah perlebe iakapna maka manusia (oge : Eli) si erlebuh man bana. Kepeken lang, Eli pe kedungenna meteh maka Dibata ka psi erlebuh man Samue. Emaka lit katana man Samuel, gelah adi lit denga si ngelebuh ia maka kataken , “ngeranalah Kam o Tuhan, aku suruh….. (ay. 9). Eli nggo ngidah maka Dibata ersura-sura njadiken Samuel guna nggantiken dahin Eli. Enda ngataken maka lit perubahen kegeluhen si luar biasa si rehna ibas Dibata nari.

Perubahen kegeluehen enda ncidahken maka Dibata ersura-sura gelah Samuel jadi tinepa si istimewa ibandingken anak-anak si deban si lit bas sekelewet kegeluhen Samuel. Eli ngidah kai si ibahan Dibata nandangi Samuel, janah “labo lit sura-sura si lamehuli” ibas Eli. Justru lit nge peran penting Eli ibas proses kegeluhen Samuel enda. Enda ngataken maka tuhu mbelin “pengaruh” Eli ibas ikut ngubahken Samuel. Bahkan, Eli ikut mpersiaken Samuel gelah banci terealisasi “kiniukin” Tuhan ibas geluhn, bage ka pe tentuna kita ibas kegeluhen anakta.

Perpulungen kekelengen Tuhan,
Erbahan maka ula lit si mapas nandangi kegeluhen anak-anak I tengah jabu memang ibas paksa genduari enda tuhu-tuhu teridah ilakoken “kerina” orang tua. Menaken kin ibas bertin nari erbage-bage si enggo ilakoken. Mulai kin ibas USG, control rutin, mereken “suplemen ntah vitamin”, bahkan alu make “terapi music” nandangi anak si lit ibas bertin. Bage pe kenca anak e tubuh, entah kai deba si ilakoken orang tua; reh galangna anak e (mulai umur 3 tahun) enggo ka ipetandaken ku “lembaga pendidiken), mulai play group she ia mbelin tetap iupayaken namakenca ku sekolah-sekolah “si mejile”. La bias terjeng e, segala private, les, kursus, rsd ilakoken orang tua (si iakapna ngasup ia). Krina e ilakoken gelah anak e “jadi jelma”. Tuhu-tuhu luar biasa perbahanen orang tua nandangi anak-anakna. Tapi perlu si cermati maka ibas paksa end ape sehkal teremna anak-anak “kehilangen identitas” akibat “tekanen” si ibereken orangtua nandangi anak. Anak-anak banci lanai nandai “proses kegeluhen si normal” ija lit masa bermain, masa bergaul ntah erteman”, bahkan kegiaten “erkiniteken” labo jadi hal si utama tapi sampingen. Ndekahsa anak e ibas gereja banci ianggap sebage “penghambat masa depanna”.

Kitab Timotius si enggo iogeken man banta berngi enda ngajari dingen mbabai kita guna ngukuri maka “erpenandai” nandangi “keleng ate Tuhan” eme jadi palas ibas mpebelin-belin anak. Gelah alu anak e erpenandai ku Tuhan Dibata, banci erbahan anak e reh seimbangna ibas nggeluhken kegeluhenna ibas paksa-paksa siidalanina ibas kegeluhenna. “Kalak la mapas” man anak-anakta, tapi “takjub” banci teridah erkiteken lit “perbandingen antara mungkin ras la mungkin akapna jadi”. Bagi si enggo isenaken kami ndai, genduari enda “proses pendidiken anak” cenderung kubas sisi-sisi pendidiken formal saja, alu erpengakap adi anak e “beluh” maka ibas paksana anak e banci “menyesuaikan diri” ras bidang kegeluhen si deban bagi “erkiniteken ras ermasyarakat ntah erkade-kade”. Kenyataanna, genduari (khususna ibas kota-kota), anak-anakta nggo lanai mediate kerna si e.

Emaka arah pecan enda ipersingeti mulihi kita maka tuhu mbelin tanggungjawabta lako mbabai kegeluhen anak gelah lit keseimbangen nggeluh baik ibas pendidikan formal, pendidiken non formal (gereja ras budaya”, rasp e anak e la ka sirang ras komunitas sosialna.

Krina enda banci jadi adi itengah-tengah jabu lit orang tua si pentar dingen erkiniteken alu mehuli singgejabken belinna perkuah ate Tuhan. Alu bage anak sebage “pemere Dibata” si mbelin pe tetap ibabai nggeluh bagi si ngena ate Tuhan, ras kedungenna ngana ate manusia pe. Amin.

Pdt. Benhard Roy Calvyn Munthe
GBKP Cisalak
081361131151


Artikel lain yang terkait:



0 komentar:

Post a Comment