Monday 19 May 2014

Renungan / Khotbah Heber / Ibrani 13:16-21, Pekan Keluarga Wari V (Pelimaken), 5 Juni 2014

Introitus : 
Gelah kulae la erbelah-belah, tapi sada-sadai ringring e seri mpediateken ringring si deban (I Korinti 12:25)

Ogen : I Korinti 16:1-4; Khotbah : Heber 13:16-21

Tema : "Tanggungjawab Jabu Si Tek Nandangi Gereja Tuhan"

Kata Perlebe :
Erpalasken tema lit lima kata si arus jelas man banta eme:
Sipemena, tanggungjawab: kewajiban sesekalak (keadaan wajib menanggung segala sesuatunya (dapat dituntut, dipersalahkan, diperkarakan) ras litna hak fungsi menerima pembebanan, sebagai akibat sikap pihak sendiri atau pihak lain.

Sipeduaken, jabu: bapa, nande, anak-anak ras isi jabu (seisi rumah).

Sipeteluken, tek: Kalak si tek seri ertina ras kalak sierkiniteken. Rikutken Heber 11:1-3 erkiniteken ertina tek nandangi kai siniarapken kita ras tek kerna si la idah (bukti dari segala sesuatu yang tidak kita lihat).

Sipeempatken, gereja (ekklesia): kalak si idilo ibas gelap nari (kematen) ku bas terang (kegeluhen).

Sipelimaken, Tuhan (Kyrios): penguasa/pemilik.
Dage arah pengertian i data, tema ngajuk jabu si enggo ngaloken keselamaten ngelakoken kewajiban guna muat bagin bagin nehken pelayanan guna kemajuan gereja Tuhan.

Kai-kai saja sinilakoken jabu si tek ibas nehken tanggungjawabna nandangi gereja Tuhan?

Pembahasen nats Heber 13:16-21
Rikutken Heber 13:16-21, sinilakoken jabu si tek ibas nehken tanggungjawabna nandangi gereja Tuhan :
Sipemena, ula lupa erbahan simehuli dingen sisampat-sampaten, sabap si e me persembahen si ngena ate Dibata (ay.16).
Pinakit lupa banci engkenai ise saja, ajar-ajar Yesus lupa maka pernah nge ituriken Tuhan Yesus maka Ia keke ibas wari peteluken, Daud lupa ia raja si arus merentah bagi singena ate Tuhan (teokrasi), emaka ibuatna ndehara Uria panglimana. Heber 13:16 ningetken perpulungen gelah ola lupa erbahan si mehuli ras sisampat-sampaten (bukti nyata ibas kekelengen). Hal enda pe itekanken ibas Rm. 12:13 raskenlah kinilitenndu ras temanndu si sada kiniteken, janah alokenlah kalak si reh kesilang ku rumahndu.

Sipeduaken, patuhlah kam man pemimpinndu janah ikutlah katana (ay. 17).
Kepatuhen nandangi pemimpin (gembala umat=ngepkep perpulungen) la ngelebihi kepatuhen man Dibata (bd. Mat. 22:37 kelengilah Tuhan Dibatandu asa ukurndu…), ertina patuh man pemimpin gererja sedekah pemimpin gereja e sendiri setia man Dibata, KataNa ras tujuanNya man gereja. Alu bage la lit ruang/alasen la patuh man pemimpin gereja sebab pemimpin gereja ertanggung jabap man Dibata. Kelapatuhen nandangi pemimpin gereja danci ikataken seri/bali kelapatuhen nandangi Dibata. Tapi, sebalikna perpulungen arus mereken dukungen man pemimpin gereja gelah memimpin gereja meriah ndahiken dahin e (ngepkep perpulungen).

Sipeteluken, tetap ertoto (ay. 18-19).
Tetap ertoto ertina tetap tading ras Bapa, tetap erdilo (berseru) man Dibata ibas ketedehen nandangi perkuah ateNa, keleng ateNa, ras pasu-pasuNa. Tetap ertoto labo berarti terus menerus melasken pertoton si formal, tapi ibas setiap kesempaten lit hubungen/komunikasi ras Dibata gelah ngasup geluh mehuli.

Sipeempatken, Yesus permakan simbelin (ay. 20-21).
Perpulungen Heber ngakuken maka Yesus me permakan simbelin si mpermakani perpulungen e. Icukupi permakan e keperlun perpulungen bagi encukupi keperlun biri-biri. Kebutuhen biri-biri e eme: inemen, dukut simeratah, ras keamanen (bd. ay. 21).

Pengenaan
Sipemena, pepatah lupa kacang akan kulitnya banci saja engkenai jabu kalak si tek ibas nehken tanggungjawab man gereja Tuhan. Lupa maka Tuhan nge simereken perpulangen man ndehara bagepe Tuhan nge simereken ndehara man perbulangen, Tuhan ka nge simereken anak-anak man jabu, Tuhan ka nge sinaruhken jabunta bagi si genduari enda ras Tuhan Yesus enggo nelamatken jabu e. Enda kerina perbahanen si mehuli ibas Tuhan nari la patut silupaken. Tandana jabu e la lupa kerna perbahanen reh dekahna kegeluhen jabu e reh malem atena (isi jabu) ras jabu e ertanggungjawab pesehken kiniulin Tuhan man kalak sideban (gereja Tuhan). Jabu e jadi saluren pasu- pasu Tuhan ibas bentuk kiniulin ras sisampat-sampaten (bd. pipa lau jadi saluren ibas sumber lau nari, bageme kalak si tek pipa-pipa saluren berkat ibas sumberna eme Yesus nari).

Sipeduaken, tanggungjawab jabu sitek nandangi gereja Tuhan arus teridah ibas kepatuhen nandangi pemimpin gereja (ibas GBKP: Pdt. Pertua-Diaken, Pengurus Lembaga-lembaga). Alasen kepatuhen enda erdandanken ia (pemimpin gereja) pemilihen Tuhan. Sedekah pemimpin gereja dalanken kepemimpinenna sue ras Pustaka Sibadia ras aturen gereja siniakui ras ndahiken kebutuhen jemaat (hak-hak jemaat) la lit ruang jabu sitek guna la patuh man pemimpin gereja.

Sipeteluken, Tanggungjawab jabu si tek man gereja Tuhan pe teridah arah semangat ngikuti kegiaten-kegiaten siniaturken gereja bage muat bagin guna notoken dahin gereja. Mediate nandangi kebutuhen gereja ras alu ukur meriah muat bagin ibas dahin diakonia, persadan bage kekelengen baik tingkat perpulungen, Runggun, Klasis, Moderamen, ras PGI

Sipeempatken, gelah ngasup ndalanken tanggungjawab jabu si tek nandangi gereja Tuhan, jabu-jabu si tek arus mpebelin pengakun ras tetap mpelimbaruisa maka Tuhan Yesus kap jadi Permakan Simbelin man jabu e. Alu bage Dibata sumbul kemalemen ate e ncukupi keperlun guna ndalanken si sentudu ras peratenNa (la pernah penggejapen kurang, tapi cukup terus guna erbahan simehuli).

Oleh : Pdt. Rasmidi Sembiring MTh.


Artikel lain yang terkait:



0 komentar:

Post a Comment