Monday 29 February 2016

Khotbah II Korintus 5:16-21, Minggu 6 Maret 2016

Invocatio  : 
Tapi tedis Sakeus janah nina man Tuhan, "Setengah i bas erta-ertangku kubereken man 
kalak musil; janah adi lit kalak enggo kutipu, kuulihken man bana empat kali lipat." Ngaloi Jesus  nina, "I bas wari enda enggo reh keselamaten man isi jabu enda. 
Kam pe kesusuren Abraham kap.

Ogen: Josua 5:9-12 (Tunggal)

Khotbah: II Korinti 5:16-21 (Responsoria)

Thema: “Tinepa Si Mbaru”

Perlebe
Minggu enda eme Minggu Pasion si pe V ken, janah igelari pe Minggu Letare si ertina “teridahlah”. Kata enda senembas tempa petua-tuaken, mbiar la nduldul. Tapi pengertinna tentu labo bage. “Teridahlah” ibas kontek Kata Dibata siman oratenta Minggu enda eme teridah kita bagi anak-anak Dibata, teridah maka kita tuhu-tuhu enggo jadi “tinepa si mbaru” eme kalak si enggo iperdameken ras Dibata ibas Yesus Kristus. Teridah bagi anak-anak Dibata labo arah ornamen ntah pe poster-poster kristen i rumah, aksesoris mobil, salib bas kerahung, rsd, tapi arah kerina pengkebetta: carata rukur, ibas menilai segala sesuatu, ngerana ras perbahanen.

Pendalamen Nats
Surat II Korinti itulis Paulus paksa ia i Makedonia sekitar tahun 55/56, surat sipeduaken enda tole ilatarbelakangi erkiteken lit denga penentang Paulus si menyerang pribadina ras wewenang kerasulenna. Emaka arah surat enda isehken Paulus nasehatna si itujuken man 3 golongen. Golongen sipemena eme man ngawan perpulungen si setia denga man bana selaku bapa rohani alu arapen gelah kalak enda ula goyah tapi setia nandangi kai si enggo iajarkenna. Sipeduaken man penentang-penentangna. Arah surat enda ate Paulus banci menyingkapken rasul-rasul palsu siterus-menerus nerang ia ras memutar balikken pengajaren Paulus. Golongen si peteluken eme man ngawan perpulungen si enggo terpengaruh nandangi kai siikataken penentang-penentang Paulus seh maka enggo menolak wewenang ras teguren siisehken Paulus.

Secara khusus bagin khotbahta ibas Minggu enda, II Korinti 5:16-21, tole Paulus menekanken sisitikna lit 3 hal. Sipemena, kalak si ersada ras Kristus eme tinepa si mbaru. Keresadan ras Kristus menurut Paulus terjadi pembaharuan total, ntah pe terjadi perubahen si signifikan. Perubahen enda labo secara pisik tapi secara karakter siteridah kubas sikap, perilaku bagepe pandangen hidup/visi hidup.[1] Salah sada isingetken Paulus eme ayat 16. Ope tandaina Kristus penilaianna nandangi Yesus Kristus sebatas pemikiren manusia, tapi kenca enggo jumpa ras Yesus secara pribadi penilaianna lanai bage.[2] Sendalanen ras si e selaku tinepa si mbaru kita pe lanai menilai isepe rikutken ukuren manusia[3], terlebih menghakimisa.

Sipeduaken eme kerna perdamen si ibahan Dibata. Kita banci jadi tinepa simbaru pelin-pelin erkiteken keleng ate Dibata (perbahanen Dibata). La lit ije ngaruhta emaka la banci lit kalak meganjang rukur, sombong rohani, rsd[4]. Sebalikna meteruk ukur, ngasup ngaloken kalak uga ia litna bagi Dibata enggo ngaloken kita ula litna. Engkai maka bage? Sabab proses maka kita banci jadi tinepa simbaru erkiteken perdamen si ibahan Dibata. Kita sindube ermusuhen ras Dibata erkiteken dosanta genduari enggo ibahanNa jadi temanNa arah pengorbanen Yesus kristus eme amin pe Ia la erdosa jadi erdosa ibahan Dibata seh mata i kayu persilang (Yesus jadi “kahulta” = gancihta/sambarta).

Sipeteluken, Paulus eme termasuk utusen Kristus (rasul). Selakau utusen, Paulus menyakini maka Dibata erdahin arah ia. Ibas ayat 20 ije isingetken “Dage kami enda me utusen-utusen Kristus, bali ras Dibata jine si mindo man bandu arah kami”. Arah ayat enda berarti Kai si isehken Paulus ntah pe kai si iajarken Paulus Dibata jine kap sinuruhsa. Alu bage Paulus mpersingeti maka si la ngaloken pengajaren e labo pengajaren Paulus si la ialokenna tapi pengajaren Dibata kap.

Pointer Aplikasi
1.    Gelah jadi tinepa simbaru labo lit gegehta pelin-pelin erkiteken keleng ate Dibata[5] (Dibata erbanca). Rikutken Invocatio ras ogen proses jadi tenepa simbaru eme nggit ndahi Tuhan, megiken ntah patuh man Tuhan, ras menyikapi kepatuhen e alu pertobaten. Adi Sakeus setengah ertana isehkenna man kalak musil, janah man kalak si itipuna ndube iulihkenna empat kali lipat ertina karakter ras pandangen hidup (visi hidup) berubah. La gia bagi Sakeus radikalna, paling tidak tuhu teridah pertobatenta. Bagi nina lit syair lagu rohani “Hidupku bukannya aku lagi, tapi Yesus dalamku (2x). Yesus hidup, Yesus hidup dalamku. Hidupku bukannya aku lagi, tapi Yesus dalam ku”. Ntah pe lit syair laku Karo “aku lanai sigelgele” (bd. Ayat 15). Ertina berubah sekaligus erbuah. Uga nge kita?
2.    Kita kerina eme utusen Dibata itengah-tengah doni enda. Selaku utusen kita lebe payo enggo tinepa simbaru siteridah arah karakter ntah pe sifat batin simpengaruhi pikiren, prilaku, budi pekerti, tabiat bagepe pandangen nggeluh (visi) selaku kalak sienggo ersada ras Kristus. Jenari amin lit penentang-penentangta, baik interen ras pe eksteren la e erbahansa kita kote, ntah pe lanai ergiah-giah tapi bagi Paulus tetap semangat desken bola pimpong erkiteken lit tekanen reh kincarna (reh melentingna). Janari selaku utusen, bagi Paulus, kita pe mbelin kal pengarapenta segelah kalak sideban jadi tinepa si mbaru, ertina la erlatih-latih, la ermedu-medu nehken Kata Dibata segelah kalak sideban pe ngaloken perdamen e ntah pe keselamaten e. Selamat ber “Letare”.

Tiban Simalem, 29 Februari 2016
Pdt. S. Brahmana


[1] Bd. II Korinti 5:1-10
[2] Baca Perbahanen Rasul 22:1-30
[3] Biasana ukuren ntah pe penilaian manusia nandangi temanna erpalasken buatenna lit (erta), pangkat, rupa, rsd.
[4] Bd. Efesus 2:8-9
[5] Bd. Yohanes 3:16


Artikel lain yang terkait:



0 komentar:

Post a Comment