KEBAKTIAN MINGGU TGL. 18 OKTOBER 2020
(MINGGU MORIA)
Invocatio:
Ukurkenlah mbages-mbages ope denga
idalankenndu maka kai pe si ilakokenndu tuhu mehuli jadina (Kuan-kuanen 4:26)
Ogen: Titus 2:3-5 (Tunggal); Khotbah: Masmur 131:1-3 (Resp[onsoria)
Tema: NANDE SIMEREKEN
KEDAMEN
Mejuah-juah man banta kerina,
shalom, salam sehat, Tuhan Yesus simasu-masu kita kerina.
Perpulungen sinikelengi Tuhan, kita kerina pernah nge ibas pase anak-anak. Janah kenca kita enggo mbelin megati kange si idah uga anak-anak tangis, deba tangis mekelek, tapi bage iangkip nandena mis ia sinik, bahken deba mis teridah meriah akapna tempa la ia sitangis ndai. Penungkunenna engkai maka bage? Engkai maka adi iangkip ntah adi ibas ampun nandena mis tenang, mis akapna dame. Dame berarti la lit igejapna kebiaren si erbahansa stress ntah pe si banci nakiti ia. Menurut penelitian ntah studi Unicharm Jepang berkolaborasi ras Profesor Hideki Ohira Nagoya Univesity Jepang nandangi ibu ras bayi usia dini antara umur 3 she 5 bulan ternyata peluken sekalak ibu ntah nande nandangi anakna, efek rasa nyaman ras bahagia meningkat she 106% ibandingken kondisi sebelum dipeluk[1]. Berarti lit pengaruh positif si mbelin man anak e adi ibas pelukan nandena.
Ibas Minggu enda eme Minggu Moria, bagin kata Dibata siman oratenta eme Mazmur 131:1-3 ndai enggo iogeken man banta. Mazmur enda eme pengakun Daud kerna dirina jine, uga ia menyikapi persoalen si sangana nderpa ia eme ifitnah raja Saul ras pegawaina si ngataken maka Daud kalak si berambisi ndatken kekuasan. Tentuna fitnahen si bagenda erbahansa turah aru ate, kebiaren, ras sidebanna sabab sangat berbahaya nandangi keselamatenna. Ibas keadaan sibage, kai banci ibahan Daud? Arah bagin kata Dibata enda icidahken maka hal utama sinilakoken Daud eme ertoto man Dibata, ibas pertotonna e I evaluasina dirina. Payo nge ia bagi si ifitnahken raja ras pegawaina e ntah lang? Enda penting sabab banci saja alu gampang kita teraku-aku, labo aku kalak si bage ninta, deba ersumpah pe ia gelah menyakinken kalak maka labo tuhu si ifitnahken e. Tapi kinatana labo kepe bagi si ikatakenna e. Misalna drama Ratna Sarumpaet, katakenna ia ianiaya kalak tapi kinatana oprasi ayo, bagepe lit ka ikatakenna labo ia dalang penggerak demo si berujung tindaken anarkis tapi kenca itangkap ras HP-na isita enggo sinik ras kedungenna ngakuisa. Jadi pengakun I ilebe-lebe Dibata she kal pentingna sabab ilebe-lebe Dibata la lit si terbuni, kerina iteh Dibata. Emaka Daud ibas perikopta enda ku Dibata ia ngadu, ku Dibata isehkenna maka kai si ifitnahken e labo tuhu. Ikataken Daud maka ia labo kalak megombang, labo ayakina perkara-perkara si mbelin, tapi enggo puas dingen dame akapna ernalem saja man Dibata bali ras sekalak anak dame iakapna ibas ampun nandena. Arah pengakun enda isaksiken Daud dirina man Dibata, janah payo memang bage. Pengakun enda erbahansa tetap ukur Daud, Dame pe iakapna sabab tek ia maka ernalem man Dibata terkawal me ia. Janah penggejapen enda pe isaksikenna ka man kalak sideban eme kalak Israel nina “ernalemlah man Tuhan, genduari nari she rasa lalap”. Engkai maka bage? Sabab enggo igejapken Daud nanamna uga damena ernalem man Dibata.
Perpulungen sinikelengi Tuhan, ibas ayat 2 ikataken “tapi enggo puas dingen dame pe kuakap, bali ras sekalak anak, dame iakapna ibas ampun nandena, bage me pe damena pusuhku”. Ibas ayat enda Daud menganalogiken kemalemen atena ernalem man Dibata ras sekalak anak dame akapna ibas ampun nandena. Arah ayat enda paling tidak lit dua hal penting jadi penekanen. Sipemena eme arah sisi anak, dame akapna ibas ampun nandena. Engkai maka bage? Idas ndai enggo ikataken maka anak e merasa terkawal, terlindungi. Merasa nyaman ras bahagia. Sipeduaken, arah sisi nande eme kehadirenna ntah keberadanna, khususna ampunna e mereken perasan dame man anak-anakna. Luar biasa tuhu pemere Dibata nandangi sekalak pernanden eme ibas dirina, ibas ampunna maler dame e man anak-anakna. Penggejapen enda arusna erbahansa pernanden memahami pentingna keberadanna nandangi anak-anakna. Adi anak-anak e ibas pertumbuhenna senantiasa iliputi perasan dame maka mahan bana ibas ia enggo mbelin teridah anak e lebih cerdas, percaya diri, la nukah stress, sehat, mudah bersosialisasi (enda rangkuman kami ibas 10 dampak positif sering memeluk si kecil). Menyadari pentingna fungsi nande e arusna labo erbahansa pernanden merasa lebih hebat ka akabna bana asangken perpulangenna, sabab tiap jelma enggo ibereken Dibata kelebihen masing-masing, emaka fungsi enda desken talenta ngenda arus iberdayagunaken sabab kerina pemere Dibata e ibas paksana arus ipertanggungjawabken ka nge man Dibata si mere kelebihen ntah talenta e. Emaka ibas kelebihen e malem ras megahlah akap pernanden ndalanken fungsi e eme bagi temata Minggu enda “Nande si mereken kedamen”. Pertahanken ras optimalken fungsi e alu cara bagi si isingetken ibas ogenta, Titus 2:3-5, terlebih itengah-tenga jaman genduari ija seolah-olah dame ningen e terjeng belas-belas sabab si idah ijah ije la siangkan, masalah sitik lenai siperiahen, rubati bahken sibunuhen. Si lebih miris agama arusna erbahan tidak kacau sue ras erti agama e malah sebalikna, kadang ibas gereja pe seolah kata dame e hanya sebatas ibas khotbah ntah pe belas-belas, terbukti lit masalah mesera ndungisa alu dame. Bageme pe si idah genduari itengah-tengah bangsanta sehubungen ras UU Cipta Kerja, ipertontonken me seolah-olah dame ningen e barang langka sebab masing-masing mpertahanken kebenarenna amin gia kadang ndauh ibas logika. Ngidah kinita enda maka keberadan ras fungsi sekalak nande sangat strategis guna menciptaken generasi si cinta damai. Perban fungsi nande e ibas dirina pe situhuna mereken kedamen man anak-anakna alu bage arusna setiap nande la erdobahen, khususna pe moria arusna kehadiren terdepan mereken kedamen e, baik itengah-tengah jabu, I gereja bagepe itengah-tengah masyarakat labo sebalikna. Adi sebalikna labo metunggung igelari “nande ntah moria”. Jenari nandangi anak-anak arusna ngergaken ras pehagakenna pe nandena (orang tuana). Sabab ngerana kerna ernalem man Dibata berarti pe ngergaken ras sekaligus megi ajar orang tua.
Selamat HUT man Moria GBKP pe 63 tahunken. Teruslah
jadi pasu-pasu arah kehadirenndu terlebih arah fungsundu selaku nande. Bagi
temata Minggu enda “Nande si mereken kedamen”. Amin.
Pdt. Sabar S. Brahmana
[1]
Nova, Ade Ryani HMK - 22 Oktober 2016 (https://nova.grid.id/read/07654050/kenapa-bayi-langsung-tenang-jika-dipeluk-ibunya-ini-penjelasan-ilmiahnya?page=all)
0 komentar:
Post a Comment