PERPULUNGEN JABU-JABU TANGGA 18-24
OKTOBER 2020
TEK RAS ERBERITA (MINGGU ZENDING)
Yohanes 4:39-41
Kai nge bedana tukang pos ras penginjil reh kurumahta maba berita? Tukang Pos maba berita la tehna kai isi berita ibas surat si isehkenna e, tapi penginjil si reh maba berita e enggo leben itehna kai berita si isehkenna. Ija nari siteh si e? Ibas sikap, ibas cara, ibas gesturena. Tukang Pos e, adi sanga meriah ukurna alu senyum ramah isehkenna surat e, tapi sebalikna adi latih akapna, kai ka ibas ndarami alamat ndai agak susah banci saja ibas nehken surat e la siang ayona. Jadi sikap, cara ras gesturna la ipengaruhi isi berita si isehkenna e, tapi sebalikna sekalak penginjil la bage sabab enggo leben itehna kai berita si isehkenna e eme berita simeriah, berita keselamaten ibas Yesus krisstus emaka sikap, cara ras gesturna pasti beda.
Temata ibas Pjj berngi enda TEK RAS ERBERITA. Tema enda ngingetken maka tek ras erberita sada paket. Ertina sendalanen, sabab tek tanpa erberita, tekna e lenga bo payo, bagepe erberita tanpa tek bali ras tukang Pos ndai. Alu kata sideban tek tampa erberita adi erpalasken Jakub2:26 berarti mate. Sabab salah sada dampak kalak si tek eme erburak-burak ibas pusuhna guna erberita simeriah.
Enda me si I turiken ibas bagin kata Dibata Pjjta berngi
enda, Yohanes 4:39-42. Lit 3 hal si banci ibuat jadi persinget man banta arah
bagin kata Dibata enda.
1. Yesus
Kristus eme Mesias si ipadanken Dibata lako dalan keselamaten man kerina
manusia. Ibas ndahiken misi si ibabaNa e, teridah arah kesaksin Pustaka Sibadia
maka ibas kerina kesempaten secara konsisten iberitakenna berita keselamaten e.
Bagi nina Paulus ibas 2 Timotius 4:2 “Pembarkenlah
Berita e, subuk tengteng ras la tengteng paksana terusken gelah beritaken.
Cidahken salah kalak, persingeti dingen pegegehi ia sanga iajarkenndu ia alu
dem kesabaren”, enda me si ilakoken Yesus. Paksa latih pe akapan (Yohanes
4:6-8) ibas lit kesempaten jumpa ia ras diberu Samaria e mis beritakenna dalan
keselamaten. Enda ertina selaku kita kalak si enggo tek man Yesus siusihlah kai
si ilakoken Yesus eme ibas tiap kesempaten iberitakenna dalan keselamaten.
2. Perjumpanna
ras Yesus merubah kegeluhen diberu Samaria e secara total. Adi sedekah enda silahina
kal jumpa ras anak kuta erkiteken lagu langkahna desken diberu si perdenggal
tapi kenca jumpa ras Yesus dingen tek Ia maka Yesus e me Mesias si ipadanken Dibata (ayat 25), rempet bene
melana e. Lawes ia njumpai anak kutana isaksikenna kerna Yesus si enggo nuriken
perbahanenna si la payo e. Janah luar biasa jadina, diberu Samaria si la lit
ergana e ipake Dibata erberita kerna ise Yesus e janah anak kuta e nterem si
tek (ayat 39).
3. Lit 2 level kalak si enggo tek. Level 1, tek ia man Yesus Kristus selaku Juruslamat erkiteken bage nina pendeta, pertua sue ras isi Pustaka Sibadia. Level 2, tek ia secara penggejapen pribadi (tentuna tangtangna arah pemberitan berita simeriah, baik si isehken penginjil, pendeta, pertua ntah Diaken bagepe peribadi kalak si enggo leben tek man Yesus) maka Yesus Kristus e eme Juruslamat manusia. Level sipeduaken enda me si icidahken anak kuta Sihar e. Adi bage kita sipulung enda adi isungkun kita level siapai nge enggo kita. Sipasti adi tek-ta e level sipemena denga biasana adi pendeta, pertua ntah diaken ntah pe secara umum gereja inganna ergereja e la bagi ukurna mis merampek kinitekenna, akibatna banci masa bodoh ibas ngikuti kegiaten gereja ras banci ka salih. Tapi adi enggo level sipeduaken e la nai bage. Sekali uga gia pendeta, pertua ras diaken ntah pe gereja e la erbahansa urak kinitekenna sabab enggo lit pemahamen ibas ia secara mandiri maka gereja labo ngasup menyelamatken, bage pe pendeta ras serayan labo erkuasa menyelamatken, si menyelamatken eme Tuhan Yesus ibas kita tek man baNa ras nggeluh sue ras singena ateNa (Yohanes 3:16 “Sabab bage pengkelengi Dibata doni enda, e maka iberekenNa AnakNa Sitonggal gelah ola bene isie pe si tek man Bana, tapi gelah dat kegeluhen si tuhu-tuhu si la erkeri-kerin).
Alu bage dage arah Pjj-ta berngi enda mulihi
mpersingeti kita maka salah sada tugasta selaku kalak si enggo tek eme erberita
simeriah. Uga carana? Tentu banci mbue carana. Antara lain misalna:
1. Ibas jaman
IT genduari enda banci arah postingena ibas medsos si naksiken kinitekenta tanpa
menyinggung kiniteken kalak.
2. Erkiteken
la lit waktu ntah pe banci ka erkiteken keterbatasen kengasupenta erPI
sementara cukup buatenta lit, banci ka kita jadi donator ngelitken ras ngutus
tenaga PI e.
3. Secara
organisasi banci ka gereja erbahan kotak persembahen guna Pos PI, gelah alu
bage secara Runggun banci ka mengutus tenaga PI ntah detaser ku ingan-ingan
simembutuhken.
4. Tetap konsisten ncidahken sikap geluhta maka kita kalak si enggo tek man Yesus Kristus nandangi kerina kalak si lit isekelewetta, misalna man pembantuta adi lit, karyawanta adi kita pengusaha, rsd. Ibas si enda penting. Sabab lit kubaca sada kesaksin sekalak ratu Kristen, tading i dataran tinggi Nairobi, Kenya. Ratu enda ngangkat sekalak anak perana jadi pelayan ntah pembantu I rumahna. Wari lepas wari tanpa isedari ratu enda, anak perana e mengamati gerak-gerikna selaku kalak Kristen. Emaka kenca 3 bulan, anak perana e mindo ngadi erdahin ras ratu e, atena pindah erdahin ku sekalak Syekh deher ras rumah ratu e.
Engkai maka pindah atendu, kurang
belin kin akapndu gajindu banci ku tambahi nina ratu e.
Sentabi ratu, aku erdahin labo ndarami
gaji si lebih mbelin, tapi ateku memutusken apakah jadi kalak Kristen ntah
muslim, nina anak perana e polos. Eme sababna 3 bulan aku erdahin ras ratu,
emaka 3 bulan ka ateku erdahin ras Syekh si la ndauh ras rumah ratu.
Megi sie, seh kal erkadiolana ratu e
nginget uga perbahanenna sedekah 3 bulan e, ngerawai alu kasar, memandang
rendah, ras mbue denga perbahanen si la ncidahken sifat kalak Kristen. Emaka
lanai lit belas-belas ratu e seyakatan nina “engkai maka tantang kam erdahin la
ikatakenndu sura-surandu e”?
Kesaksin enda ngingetken kita gelah
tetap sisedari maka kita idilo lako jadi saksi, lako erberita arah kerina
dampar geluhta selaku kalak si enggo tek nandangi Yesus Kristus.
0 komentar:
Post a Comment