Thema:
Makeken kiniliten guna ndatken kegeluhen situhu-tuhu
Introitus: Lukas 12:33b; Ogen: Masmur 49:2-14Khotbah: 1 Timotius 6:17-19
Perlebe
Kai kin situhuna tujun enggeluh? Tujun nggeluh menurut Paulus eme guna Kristus. Berarti guna ngelakoken kai singena ate Dibata ibas nggeluh enda. Adi seri tujunta ras Paulus, berarti cara pandangta lanai berpusat kubas dirinta bagepe pernak-pernik doni enda, termasuk kebayaken, tapi ku Dibata. Guna kai kin maka kita itepaNa? GunaNa. Emaka berekenlah geluhta ras kerina silit ibas kita ipakeken Dibata sue ras rencanaNa. Pustaka Sibadia ngataken “adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena.[1] “Nggeluh me ia dingin malem atena”, kuakap endame perayakenta. Malem ateta ibas doni enda ras sialoken ka kegeluhen si rasalalap. Adi bage bere pusuhta ikuasai Kesah Dibata, segelah reh terangna pengidahta ras pengangkanta kerna tujun nggeluh ibas doni enda. Segelah ula kita bagi kuan-kuan “taren-taren ngayaki siman tadingenken lupa siman ayaken”.
Payo nggeluh bas doni enda perlu erta, perlu kebayaken. Kuakap adi isungkun, kerina nge ateta gelah bayak. Sebab arah kebayaken e banci mbue siban si mehuli. Tambah si e Dibata pe labo ngelarang kalak kristen ndataken kebayaken. Pustaka Sibadia naksiken uga Dibata masu-masu kalak si tek man baNa alu mereken kebayaken, misalna Abraham (Kejadin 13:2), Ishak (Kejadin 26:12), Salomo (1 Raja-raja 3:13, 10:23), Job (Job 1:3), Hiskia (2 Kronika 32:37), rsd. Amin gia bage kalak bayak labo ka otomatis erkiteken pasu-pasu Dibata. Setan pe ngasup mereken kebayaken.[2] Emaka ibas pustaka sibadia pe mbue persinget kerna bahaya kinibayaken. Kebayaken banci maba kiniulin man banta, tapi pe banci ka sebalikna. Tergantung uga caranta ngidah ras makeken erta kebayaken e.
Penjelasen Teks
Perikop siman oratenta minggu enda eme pedah Paulus man Timotius segelah mpersingeti kalak bayak i doni enda. Amin gia ibas ayat 9-10 Paulus enggo ngerana kerna bahaya sura-sura bayak ras rangap nandangi duit, labo berarti Paulus anti kebayaken. Ntah memandang rendah kalak bayak. Tapi perlu akap Paulus kalak bayak e iajarken segalah orientasi kegeluhenna la saja terjeng doni enda (bayak bas doni enda saja),[3] tapi pe nandangi kegeluhen si rasal alap.
Perikop siman oratenta minggu enda eme pedah Paulus man Timotius segelah mpersingeti kalak bayak i doni enda. Amin gia ibas ayat 9-10 Paulus enggo ngerana kerna bahaya sura-sura bayak ras rangap nandangi duit, labo berarti Paulus anti kebayaken. Ntah memandang rendah kalak bayak. Tapi perlu akap Paulus kalak bayak e iajarken segalah orientasi kegeluhenna la saja terjeng doni enda (bayak bas doni enda saja),[3] tapi pe nandangi kegeluhen si rasal alap.
Lit 4 hal si jadi perhatin ibas bahan khotbahta enda:
1. Ula meganjang rukurna.
Salah sada kecendrungen kalak bayak eme meganjang rukur. Adi sioge pe ibas Esekiel 28:5-6, kalak bayak nukah kal ndabuh kubas nggeluh meganjang ukur. Terlebih kalak si iakapna ia bayak erkiteken beluhna erbinaga ntah pentarna erbisnis ibas istilah jaman genduari. Tapi sebalikna adi kalak si nggejapken ia bayak erkiteken pemasu-masun Dibata, tentuna labo meganjang ukurna.[4] Meganjang ukur la ngena ate Dibata. Kalak meganjang ukurna ipeteruk Dibata (Job 22:29), Pertotonna la ialoi Dibata (Job 35:12), iukum Dibata (Jesaya 10:12), Ikernepken Dibata (Esekiel 16:50, 28:5-6, Hosea 13:6-9), itulak Dibata (Yakobus 4:6, 1 Johanes 5:5), rsd.
2. Ula ernalem man erta si la tetap, tapi man Dibata.
Lit kalak ngatakenca “adi litlah sen kai kin la banci iban”? Nuduhkenca uga pentingna ras belinna kuasa sen/erta/kebayaken. Eme sebabna erlumba-lumba jelma ndarami sen. Deba cara kai pe ilakokenlah guna ndatken erta kebayaken e. Tapi payokin adi enggo bayak banci kai pe ibanna? Kinatana lang. Mbue pe depositota ibas Bank la lit jaminen maka malem nari nge ateta, lanai kita mbiar ntah pe aru ate ibas geluh enda. Emaka nina Paulus ula ernalem man erta si la tetap, tapi man Dibata. La tetap ertina la kekal, bagepe sendah bayak lenga tentu ku pudi wari enda tetap bayak[5]. Eme sebabna perlu akap paulus mpersingeti kalak bayak segelah tetap ernalem man Tuhan si enggo jadiken kerina si nasa lit termasuk kebayaken e, ras makekenca sentudu ras peraten Dibata. Ernalem man Dibata nge maka dat kita kemalemen ate situhu-tuhu.
Enda ka me si isengetken ibas Masmur 49:2-14. Amin gia sekalak jelma mbue ertana, mbelang jumana tapi mate ka nge ia bali ras kerina jelma. Bedana eme kalak siernalem man ertana pinter ia lawes ku kuburen, janah tading ibas doni kalak mate. Tapi la bage nandangi kalak siernalem man Dibata ipulahi ras iklini ibas kuasa kematen nari.[6]
3. Gunaken ertandu alu erbahan simehuli.
Paulus pe mpersingeti kalak bayak segelah makeken erta kebayakenna e la saja guna dirina ntah keluargana, tapi pe guna erbahan simehuli man kalak sideban. Kalak Israel jelas kal pengangkanna kerna sienda. Ibas Keluaren 23:10-11 isingetken ibas erta si lit ibas ia (kebun anggur), lit kap hak kalak musil ije si perlu iperdiateken. Enem tahun banci iusahai kebun e, tapi tahun si pepituken ipelepas ngadi, la banci iperani kai pe si ije. Sie kerina guna kalak musil bagepe rubia-rubia. Bagepe ibas Padan Simbaru, Yesus mpersingeti kalak sitek segelah mperdiateken kalak sideban, khususna kalak musil (Lukas 14:13, 18:22). Lebih tegas ikataken ibas Matius 25:40,45, si la erbahan simehuli alu la mperdiateken ras nampati kalak musil berarti la erbahan simehuli man Yesus.
Kalak bayak situhuna mbelin kal nilai plusna. Sidah saja ibas jamanta genduari. Adi lit pembangunen gereja, iangkat me ketua panitia si la saja luas pergaulenna tapi pe si mbue ka senna. Bagepe adi lit kegiaten perayaan gerejawi idarami nge donatur si “bayak”. Berarti alu kebayaken si lit banci ibahan mbue dahin si mehuli.
4. Mere alu meriah ukur.
Perlu sigejapken, maka kerina si it ibas kita eme pemere Dibata, janah situhuna la kap kita metunggung ngalokenca. Adi sigejapken si enda, Dibata enggo melumbar man banta, maka ate Dibata kita pe melumbar ka nandangi kalak sideban. Ula kita la mere kalak si perlu ibere (musil) erkiteken mbue alasen, misalna “manja kari ia adi ibere”, “banci kari i salah gunakenna”, rsd. Alasen-alasen enda me erbahansa la nai kita ngasup ntah pe nggit nampati kalak, mere alu meriah ukur. Adi la kita nggit nampati kalak sideban alu meriah ukur, situhuna kegeluhenta enggo bagi “lawit mate”[7]. Ngalo ras ngalo ngenca tapi la i palirken, la isalurken. Eme sebabna laut e jadi laut mate, la lit kegeluhen. Bage me pe kita, adi ngalo ngenca ateta tapi la nggit mere alu meriah ukur man kalak sideban, maka erta kebayaken si ibereken Dibata e erbahansa kita erdauhna ras Dibata. Emaka bagi kata bahasa Indonesia “Terima Kasih” bagelah siban, eme terima dan kasih, terima dan kasih, maksudna ialoken ibas Dibata nari jenari bereken ka deba man kalak sideban. Adi bage siban rejeki/pasu-pasu e pe bagi siencaleng/mutikken taruk jambe man banta. Icaleng sada, turah dua, caleng dua turah empat ntah lebih pe. Tambah si e, si lebih penting bagi ikataken ibas ayat 19, “Alu bage ipepulungna erta guna dirina si banci iarapkenna i bas paksa si reh, gelah idatna kegeluhen si tuhu-tuhu.[8]
Pengkenaina
Kalak kristen labo ilarang bayak. Kebayaken labo jahat, amin gia la bo ka la lit bahayana. Eme sebabna Paulus mpersingeti Timotius guna ngajarken kalak bayak. Bahaya kebayaken eme banci ibanna jelma lanai ernalem man Dibata. Ertana enggo jadi penalemenna. Adi enggo bage biaren ia la bayak ketimbang la er-Dibata. Ciri kalak sibage teridah arah reh bayakna ia labo reh tutusna atena ersembah man Tuhan. Uga kalak sibage? Bagi ende-enden lagu rohani si iendeken Ramona Purba: labo reh malemna atena, tapi sebalikna. Pinakit, enggo sada kurang denga, enggo dua kurang denga mekelek kal ibas kalak sibage. Padahal isadarina nge maka gegeh erta terjeng nggeluh bas doni enda ngenca, epe labo kerina banci ibereken erta e man bana. Saja e me maka mbue pe ibas Pustaka Sibadia persinget nandangi kalak bayak ras kerna kebayaken. Lenga marenda reh belangna jumana, sekali-kalin ku gereja denga nge ia, tapi kenca enggo reh belangna jumana lanai sempat pe reh ku gereja. Bagepe ikota, lenga marenda reh majuna usahana sempatkenna denga nge rusur ku gereja, tapi kenca reh suksesna usahana, ntah pe reh buena kiosna, lanai sempat reh ku gereja. Payo nge bage? Tentu lang. Arusna kin reh buena maler pasu-pasu Dibata si ipepalerna arah usaha sinilakoken kita reh tutusna pe ateta ersembah man Dibata, ras reh buena sibahan pe si mehuli, reh melumbarna kita. Adi enda sicidahken ibas geluhta berarti enggo payo pengangkanta kerna kiniliten e. Kiniliten ibereken Dibata gelah reh ngasupna kita nggeluh sue ras singena arena.
By.Pdt.S.Brahmana
Kalak kristen labo ilarang bayak. Kebayaken labo jahat, amin gia la bo ka la lit bahayana. Eme sebabna Paulus mpersingeti Timotius guna ngajarken kalak bayak. Bahaya kebayaken eme banci ibanna jelma lanai ernalem man Dibata. Ertana enggo jadi penalemenna. Adi enggo bage biaren ia la bayak ketimbang la er-Dibata. Ciri kalak sibage teridah arah reh bayakna ia labo reh tutusna atena ersembah man Tuhan. Uga kalak sibage? Bagi ende-enden lagu rohani si iendeken Ramona Purba: labo reh malemna atena, tapi sebalikna. Pinakit, enggo sada kurang denga, enggo dua kurang denga mekelek kal ibas kalak sibage. Padahal isadarina nge maka gegeh erta terjeng nggeluh bas doni enda ngenca, epe labo kerina banci ibereken erta e man bana. Saja e me maka mbue pe ibas Pustaka Sibadia persinget nandangi kalak bayak ras kerna kebayaken. Lenga marenda reh belangna jumana, sekali-kalin ku gereja denga nge ia, tapi kenca enggo reh belangna jumana lanai sempat pe reh ku gereja. Bagepe ikota, lenga marenda reh majuna usahana sempatkenna denga nge rusur ku gereja, tapi kenca reh suksesna usahana, ntah pe reh buena kiosna, lanai sempat reh ku gereja. Payo nge bage? Tentu lang. Arusna kin reh buena maler pasu-pasu Dibata si ipepalerna arah usaha sinilakoken kita reh tutusna pe ateta ersembah man Dibata, ras reh buena sibahan pe si mehuli, reh melumbarna kita. Adi enda sicidahken ibas geluhta berarti enggo payo pengangkanta kerna kiniliten e. Kiniliten ibereken Dibata gelah reh ngasupna kita nggeluh sue ras singena arena.
By.Pdt.S.Brahmana
----------------------------------
[1] Roma 8:9
[2] Matius 4:9
[3] Kalak si bage ibas Lukas 12:20, ikataken ia kalak boodoh.
[4] 1 Korintus 4:7
[5] Sienda banci sinin contoh kegeluhen kalak bayak ibas jamanna. Ibas tahun 1922, siwah pengusaha paling berhasil I doni enda erbahan perjumpan I Chicago. Lit kuasa si mbelin ibas kelompok enda erban sen. Tapi uga ujung kegeluhenna? Kenca 27 tahun:
Charles Schwab (Presiden perusahaan baja terbesar) mate ibas keadan bangkrut ras nggeluh ngasamken sen pinjamen ibas akhir geluhna; Samuel Insull (Presiden perusahaan Bahan Kebutuhan Pokok terbesar) mate selaku burunan ras nggeluh mesera ibas negeri kalak; Howard Hopson (Presiden perusahaan Gas terbesar) menderita sakit ingatan; Arthur Cutter (Spekulan gandum terbesar) mate i negeri asing ibas keadan musil; Richard Whitney (Presiden Bursa Saham New York) isekap ibas tahanan penjara Sing Sing; Albot Fall (seorang anggota Kabinet Presiden) ibereken pengampunen darat ibas penjara nari segelah banci mate i rumahna (http://www.our.web.id/wise_words/akar_segala_kejahatan_adalah_cinta_uang/1)
[1] Roma 8:9
[2] Matius 4:9
[3] Kalak si bage ibas Lukas 12:20, ikataken ia kalak boodoh.
[4] 1 Korintus 4:7
[5] Sienda banci sinin contoh kegeluhen kalak bayak ibas jamanna. Ibas tahun 1922, siwah pengusaha paling berhasil I doni enda erbahan perjumpan I Chicago. Lit kuasa si mbelin ibas kelompok enda erban sen. Tapi uga ujung kegeluhenna? Kenca 27 tahun:
Charles Schwab (Presiden perusahaan baja terbesar) mate ibas keadan bangkrut ras nggeluh ngasamken sen pinjamen ibas akhir geluhna; Samuel Insull (Presiden perusahaan Bahan Kebutuhan Pokok terbesar) mate selaku burunan ras nggeluh mesera ibas negeri kalak; Howard Hopson (Presiden perusahaan Gas terbesar) menderita sakit ingatan; Arthur Cutter (Spekulan gandum terbesar) mate i negeri asing ibas keadan musil; Richard Whitney (Presiden Bursa Saham New York) isekap ibas tahanan penjara Sing Sing; Albot Fall (seorang anggota Kabinet Presiden) ibereken pengampunen darat ibas penjara nari segelah banci mate i rumahna (http://www.our.web.id/wise_words/akar_segala_kejahatan_adalah_cinta_uang/1)
[6] Bd.Yohanes 11:25
[7] Laut Mati eme danau si membujur i daerah antara Israel, Daerah Otoritas Palestina ras Yordania. Launa seh masinna, emaka la mungkin lit mahluk nggeluh ije, kecuali piga-piga jenis bakteri.
[8] Ayat enda ngingetken kita kai siikataken Yesus ibas Lukas 12:33b (introitusta) bagepe Matius 6:20. Sinimaksud Paulus arah ayat enda eme adi kita ngelakoken bagi isingetken ibas ayat 18, berarti kita pepulung erta sibanci iarapken ibas paksa sireh (kegeluhen situhu-tuhu) sierlawanen ras kegeluhen si la tetap (semu) si iayaki kalak bayak (ayat 17). Enda labo berarti, alu erbahan simehuli maka banci ndatken kegeluhen situhu-tuhu. Sebab ibas 2 Timotius 1:9 jelaskal ikataken Paulus “Kita enggo iselamatkenNa janah enggo kita ipilihNa jadi sikerajangenNa, labo erkiteken kai si ibahan kita, tapi erkiteken sura-suraNa dingen lias ateNa nge. Lias ateNa e iberekenNa arah Kristus Jesus ope denga tembe si nasa lit enda” (bd.1 Timotius 1:14, 16). Amin gia bage man Paulus kiniteken labo tiori, tapi sada kebenaren siharus ihayati alu sikap nggeluh si ibuktiken arah perbahanen (Bd.Galatia 5:6, 1 Timotius 4:7).
[7] Laut Mati eme danau si membujur i daerah antara Israel, Daerah Otoritas Palestina ras Yordania. Launa seh masinna, emaka la mungkin lit mahluk nggeluh ije, kecuali piga-piga jenis bakteri.
[8] Ayat enda ngingetken kita kai siikataken Yesus ibas Lukas 12:33b (introitusta) bagepe Matius 6:20. Sinimaksud Paulus arah ayat enda eme adi kita ngelakoken bagi isingetken ibas ayat 18, berarti kita pepulung erta sibanci iarapken ibas paksa sireh (kegeluhen situhu-tuhu) sierlawanen ras kegeluhen si la tetap (semu) si iayaki kalak bayak (ayat 17). Enda labo berarti, alu erbahan simehuli maka banci ndatken kegeluhen situhu-tuhu. Sebab ibas 2 Timotius 1:9 jelaskal ikataken Paulus “Kita enggo iselamatkenNa janah enggo kita ipilihNa jadi sikerajangenNa, labo erkiteken kai si ibahan kita, tapi erkiteken sura-suraNa dingen lias ateNa nge. Lias ateNa e iberekenNa arah Kristus Jesus ope denga tembe si nasa lit enda” (bd.1 Timotius 1:14, 16). Amin gia bage man Paulus kiniteken labo tiori, tapi sada kebenaren siharus ihayati alu sikap nggeluh si ibuktiken arah perbahanen (Bd.Galatia 5:6, 1 Timotius 4:7).
0 komentar:
Post a Comment