Thursday 19 May 2011

Khotbah Matius 6:24-34, Pekan Keluarga Wari III (Selasa, 7 Juni 2011)

Introitus:
Dungna rukur ia,janah nina ibas ukurna,”Kerina si erdahin bapangku riba-iba panganna,tapi aku ijenda menam mate kelihen”.(Luk.15:17)

Ogen: Lukas 15:11-17; Khotbah: Matius 6 :24-34

Thema:
“Jabu ras Kinibayaken”

Kata Perlebe
Nina kuan-kuan karo: “Bagi persumpamana kerbo gunduk,tertatap lau meciho teri nem lau megembur,tertatap bulung meratah tergagat bulung kerah”.lau meciho si inem kerbo gunduk jadi megembur perbahan tandukna tondel ku kubang. Meratah gia teridah dukut gagaten adi la mbages la tergagatsa,erkiteken tandukna nungkat kutaneh,emaka dukut sigedang ngenca terpan.Kerah lit,kerah me ipan. Andingenna : Arapen tempa mehuli tapi kenca idalanken la bage si idapet.

Mbera me,mbelin sura-suranta,erbage-bage perayakenta nggeluh,jore me sekali enda adi igegehi ateta,kepeken lahang. Lain si isura lain ka si idapet,seh sura-sura turah ka sinanggelta.Kecibal sibage mpeturah aru ate seh jabu pe lanai dame. Arah ogen Lukas 15:11-17,nuriken kerna perumpaman anak si bene,anak si nguda mindo man bapana kerna erta si jadi sikerajangenna,jenari i dayakenna janah duitna i sia-siakenna.Paksa jadi kelihen inegeri e,dungna susah kal akapna. Jadi pe lajaren si meherga man jabu kalak keristen erkiteken geluhta labo tergantung kubas erta entah kebayaken.Dibata ersura-sura gelah kita bayak ,bayak kerna keleng ate,bayak guna nehken si mehuli,(band.Roma 13:8-10). Perayakenta eme erta surga,labo erta doni si banci lesap.(Mat.6:19-21). Gelah dame sejahtra jabu e,labanci lang palasna eme erkemalangen man Dibata.(Mas.128).

Pendalaman Nats
Ibas bahan khotbah,Matius 6:24-34 eme sada bagin khotbah Yesus idatas uruk nuriken kerna aru ate.Jabu si la erkemalangen man Dibata,mpeturah aru ate ibas perdalanen geluh jabuna. Ay.24-27,Yesus ngidah seh kubas palas erta simpanen manusia,terus ku pusuh peratenna.Enterem jelma, erta/kebayaken jadi ukuren –

Sukat-sukat keriahenna nggeluh ibas doni enda. Erta/kebayaken doni mpengaruhi penembahen ras kinitekenna man Dibata. Manusia labo ngasup ersembah ras erkiniteken alu bulat ukur man Dibata,adi erta nge jadi perayaken ibas geluhna. Tole Yesus negasken maka ergan kegeluhen entah pe kesah asangken keperlun kula(Pangan,inemen,uis,barang perabotan ras perlengkapen si deban). Jabu kalak Kristen eme sada lembaga si itepa Dibata,(Kejadin 2:21-22).Erkiteken si e,jabu e ipelihara,ibangun erpalasken keleng ate Kristus. Erta/kebayaken labo jaminen si erbanca rakut jabu e enteguh,harmonis ras bahagia.Erta/kebayaken doni la erbanca kita terkelin.

Ay.28-32,Manusia eme tinepa Dibata si meganjangna ras si muliana asa tinepa si deban,e pe icukupken Dibata keperlunna,tentu Dibata lebih emperdiateken kecukupen geluh anak-anakNa.Kecukupen keperlun geluta la terdungi alu aru ate, tapi alu pengarapen ras kiniteken maka lit Tuhan si emperdiateken,encukupken dingen singaturkenca(Mas.127:1-5)

Ay.33-34,Ndatken,makeken ras ndarami erta/kebayaken doni enda labo salah,si penting eme motip si pemena si la banci lang eme erpalasken sura-sura ras kebenaren Dibata. Mengedepanken sura-sura Dibata.Turah penggejapen arah kinitekenta maka silit e,eme pemere Dibata.Labo kita ngasup erbahan kai pe adi la ersada ras Ia,erkiteken persadanta ras Ia maka kita erbuah meramis,(Yoh.15:5-7)

Pointer Aplikasi
  1. Perayaken geluh jabu kalak Kristen labo erpalasken erta entah kebayaken doni. Sebab geluh kalak si tek labo tergantung kubas erta ras kebayaken doni,tapi ku bas erta surga si kekal.Dibata ersura-sura gelah kita bayak,bayak ibas kelengate ras perbahanen si mehuli.
  2. Erta entah kebayaken la erbanca geluhta terkelin ras la jaminen si banci mereken kemalemen ate dingen dame jabunta.
  3. Erta ras kebayaken labo erbanca reh rembakna kita ras Dibata,tapi kerembaken ras Dibata nge erbanca kita bayak.
GBKP Rg.Tambun
Pdt.Terima Tarigan

Catatan sermon:
  1. Adi sipelebe hal rohani, hal doni pe ibereken Dibata (Matius 6:33). Mari si pelebe hal rohani.
  2. Burung-burung juga ketika bangun memuji-muji Tuhan lalu terbang mencari makan (bekerja keras), ketika kenyang pulang kembali dan memuji Tuhan. Burung juga bekerja keras, bagaimana dengan kita?.


Artikel lain yang terkait:



0 komentar:

Post a Comment