Bahan : Kejadin 12:1-3
Thema : “Ipasu-pasu Guna Jadi Pasu-Pasu”
Tujun :
- Gelah ngawan perpulungen meteh maka ia enggo ngaloken pasu-pasu ibas Dibata nari
- Gelah ngawan perpulungen ngusih tindaken/respon Abraham nandangi pendilo Dibata
- Gelah ngawan perpulungen ngasup nuriken kerna ulih sinialoken Abraham ibas kepatuhenna nandangi pendilo Dibata.
Kejadin 12:1-3
12:1 Nina TUHAN man Abram, "Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi.
12:2 Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.
12:3 Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa."
Perlebe
Ibas KBBI kata Berkat/Pasu-pasu iertiken : Karunia Tuhan yg membawa kebaikan dalam hidup manusia. Ibas bahasa Ibrani ipakai kata ברך - Barakh/berakha, siihubungken ras karunia benda, biasana material. (Ul. 11:26, Ams 10:22, 28:20; Yes 19:24). Ipertentangkan ras kutukan (Kej. 27:12; Ul. 11:26-28, 23:5, 28:2, 33:23) ras ipake ibas rumusen kata 'pemberkatan' (Kej. 27:36, 38, 41; Ul. 33:1). Ibas PB ipakai kata eulogia ibas erti terakhir (Yak. 3:10), tapi ditambahkan arti karunia rohani yg didatangkan oleh Injil (Rm. 15:29; Ef 1:3) dan karunia material pada umumnya (Ibr. 6:7; 12:17; 2 Kor 9:5, 'kemewahan')
Arah pengertin enda teridah maka Pasu-pasu/berkat eme simehuli siipeseh/sinialoken manusia. Tentu enda kerina siidarami manusia ibas kegeluhenna. Pasu-pasu/berkat enda situhuna enggo ibereken Dibata man manusia sebage bentuk keleng ate Dibata man kita tinepaNa simeherga, Erbage pemere iberekenNa guna kiniulinta manusia, Tujun pemere enda eme gelah kita pe jadi pasu-pasu man kalak sideban seh kerina nggejapken kekelengen Dibata ibas kegeluhen enda. Pengertin enda pe njadiken kita ngerenungken maka nggeluh enda arus “berbagi” seh maka kita jadi “ernanam” ibas kegeluhen enda.
Megati lit kecenderungenta siakap kita “kurang iberkati/ ipasu-pasu” erkiteken sinen kondisi, situasinta bagepe tupung siperhadapken /sibandingken dirinta ras kalak sideban, jenari enda kange siban alasen kita la nehken kekelengen (pasu-pasu) nandangi kalak sideban. Situhuna erbage-bage pemere Tuhan man banta bagepe pelain-lain bentukna sue ras “payo” pengidah Dibata tujunna eme gelah kita nggeluh nehken peratenNa. Kalak sierkiniteken arus mengamenken ras ngataken bujur ibas pemere/pasu-pasu Dibata ibas geluhna uga gia kecibalna alu banci ka nehken pasu-pasu man kalak sideban alu dem pengataken bujur.
Arah pendilo Dibata Abram ibas bahan PJJ enda sirenungken ka uga pendilo Dibata diri/geluhta bagepe uga kita arusna “meng-ayuken” pendiloNa ibas geluhta alu jadi pasu-pasu man kalak sideban.
Kejadin 12:1-3
Nats enda eme pendilo Dibata man Abram guna nehi rencanaNa nandangi bangsaNa. Nehi pendilo Dibata tentu lit ngenda siarus idalani Abram termasuk nadingken kerina silit (situasi aman dan nyaman) ibas kutana, tapi enda labo jadi alangen man Abram sebab “kinitekenna” nandangi sinuruh ia eme Dibata. Idalanina kerina sebab igejapna maka kai silit ibas ia eme ibas Dibata nari. Pendilo Dibata enda me jadi teladan man banta seh maka kita pe tek nandangi rancangen Tuhan man banta tetap nge mehuli. Teridah janji Tuhan man Abram:
1. Aku (Dibata) njadiken kam (Abram) jadi bangsa simbelin
2. Aku Masu-masu kam
3. Aku njadiken terberita gelarndu
4. Kam jadi pasu-pasu nandangi nterem kalak
5. Aku masu-masu kalak simasu-masu kam
6. Aku mengutuk/numpahi kalak sinumpahi kam
7. Erkiteken kam kupasu-pasu enterem kalak/bangsa-bangsa
Sienda me siijanjiken Dibata man Abram ibas pendilona, teridah maka ibas Dibata ndilo Abram ibas rancangenNa maka Dibata mperlengkapi Abram ibas erbage simehuli. Arah janji enda pe jadi renungen man banta ibas kegeluhenta jaman enda maka Tuhan pe nehken padanNa man banta alu mereken erbage pemere ras pasu-pasu guna kiniulinta.
Berkat/pasu-pasu nandangi keluarga/jabu subuk jasmani bagepe rohani. Sienda siertiken alu kiniteken ibas kita tek ras setia nandangi janji Tuhan maka ibas jabunta, kesusurenta (anak-anak), keluarga maba kemalemen ate ibas kegeluhen enda.
Berkat/Pasu-pasu ibas kiniliten / Keuangan. Enda pe jadi perenungen man banta maka Janji Tuhan man Abram ndube tetap nandangi kita ibas jaman enda. Erbage kiniliten iberekenNa guna banci kita ndatken kemalemen ate.
Berkat Pengaruh ras Kesaksin. Pasu-pasu ibas bentuk “kemuliaan/ kebanggaan” ibereken Di bata guna jadi saksi singgeluh man banta. Malem ateta erkiteken pemasu-masunNa kita pe terberita selaku kalak Kristen/sierkiniteken.
Berkat Pelayanan yang Efektif. Ibas kegeluhen enda pelain-lain sinibereken Dibata ibas bentuk pasu-pasuNa. Kalak sierkiniteken ibereken tanggungjawab guna ndahiken/ndalanken kegeluhenna ibas bentuk pelayanen ibas kerina dampar geluhna seh maka ibas kerina enda kita jadi pasu-pasu man kalak sideban.
Berkat Hubungan yang Sehat. Janji Tuhan jelas nandangi kita maka ibas kita nehken pasu-pasu nterem kalak ndatken kemalemen ate, ibas malem ate kalak jadi kemalemen ate man banta seh maka ertambah-tambah pemereNa man banta. Hubungenta simehuli nandangi kalak sideban jadi bagin hubungenta nandangi Dibata.
Berkat Perlindungan. Bagem janji Tuhan maka ikelengiNa kita ibas perukuren kalak jahat nari seh maka kita tetap jadi pemenang ibas Tuhan erkiteken Ia nge sinampati kita.
Berkat Keselamatan. Sada hal sipasti jadi tujun ras pengarapenta eme ndatken keselamaten. Kita jadi saksi singgeluh maka arah kita pe nterem kalak ndatken kemalemen ate bagepe keselamaten.
Arah pengertin enda teridah man banta uga arusna kita ndalani kegeluhen enda selaku anak Dibata. Abram enggo ncidahken kinitekenna nandangi Dibata sindilo ia alu dem kiniteken maka Dibata ngaturkensa kerina mehuli jadina. Uga ninta ibas jaman enda ? Perlu kiniteken sitetap bagi Abram ibas ia ndalanken pendilo Dibata. Mari kita jadi Abram-Abram simbaru ibas jaman enda sidem kiniteken ndalani kegeluhen alu tetap ncikep padan Dibata. Tek pe kita kai pe siinanami kita ibas geluh enda sijelas Dibata enggo nehken pasu-pasuNa simbelin man banta termasuk pemereNa ibas diri Yesus Kristus si jadi jaminen kemenangenta. Ulanai kita ragu ndalani kerina siisuruhNa eme jadi pasu-pasu nandangi kalak sideban. Kutera kai pe tantangen sinihadapi, Meriahlah ukurta adi erkiteken kita kalak sideban pe ndatken keriahen.
Pdt. Alexander. S
GBKP Bekasi - Galaxy
(081386498009; 087777100076)
0 komentar:
Post a Comment